శ్రీవారి దర్శనానికి ఎన్నెన్ని దారులో - సర్వదర్శనం నుంచి స్లాటెడ్‌ బుకింగ్‌ వరకు మీకోసం

భక్తులకు మరింత సౌకర్యాలు కల్పించేందుకు వివిధ ఏర్పాట్లు చేస్తొన్న టీటీడీ - గంటల తరబడి క్యూలైన్లు, కంపార్టుమెంట్లలో నిరీక్షణ కష్టాలకు చెక్ - ఈ సౌకర్యాలను ఉపయోగించుకుంటే సప్తగిరుల్లో దివ్యానుభూతి

Different Types Of Darshan information at Tirumala Temple : ఆ ఏడుకొండలపై కొలువైన అఖిలాండకోటి బ్రహ్మాండ నాయకుడి దర్శనానికి కోట్లది మంది భక్తులు తపిస్తుంటారు. తమ ఇష్ట దైవాన్ని కనులారా వీక్షించి తన్మయత్వంతో దివ్యానుభూతిని పొందుతారు. ఆ శ్రీవారి దర్శన మార్గాలు, టికెట్లు, అవకాశాల పైనే భక్తులకు ఎన్నెన్నో సందేహాలు వస్తుంటాయి. తిరుమల శ్రీవారి దర్శనానికి ఆన్‌లైన్, ఆఫ్‌లైన్‌లలో టిటీడీ కల్పిస్తున్న అవకాశాలను ఎప్పటికప్పుడు తెలుసుకునేందుకు భక్తులు ఆరాటపడుతుంటారు. అందుకే భక్తులకు సౌకర్యాలు కల్పించేందుకు టీటీడీ వివిధ ఏర్పాట్లను చేస్తోంది. ఆ శ్రీనివాసుడి దర్శన అవకాశాలు, ఇతర వివరాలపై ప్రత్యేక కథనం.

తిరుమల కొండకు ప్రణాళికాబద్ధంగా వచ్చే భక్తులకు శ్రీనివాసుడి దర్శనం కష్టమేమి కాదు. ప్రస్తుతం టీటీడీ కల్పిస్తున్న సౌకర్యాల గురించి తెలుసుకుంటే భక్తులు వ్యయప్రయాసలను తప్పించుకోవచ్చు. గంటల తరబడి క్యూలైన్లు, కంపార్టుమెంట్లలో నిరీక్షణ కష్టాలు లేకుండ దూరం కావచ్చు. దర్శనాన్ని సులభతరం చేసుకోవచ్చు. ఇలా నిత్య శోభితంగా విరాజిల్లే ఆ సప్తగిరుల్లో దివ్యానుభూతిని పొందవచ్చు. దర్శన మార్గాలివి.

శ్రీవారి సర్వదర్శనం...

తిరుమలకు వచ్చే భక్తులు ఎలాంటి టికెట్లు లేకుండా ఆ శ్రీవారిని దర్శించుకోవచ్చు. వీరందరిని క్యూలైన్ల నుంచి వైకుంఠం-2లోని 32 గదుల గుండా (ఒక్కో గదిలో 450 మంది వరకు) పంపిస్తారు. అక్కడినుంచి స్వామివారి దర్శనానికి అనుమతిస్తారు. ఈ గదులు నిండితే నారాయణగిరి గార్డెన్స్‌ వద్ద ఏర్పాటుచేసిన మరో తొమ్మిది కంపార్టుమెంట్లలో (ఒక్కో దానిలో 900 మంది) దర్శనానికి వేచి చూసే అవకాశం ఉంటుంది. చివరికి అవీ కూడా నిండితే క్యూలైన్లలో నిల్చోవాల్సి వస్తుంది.

క్యూలైన్‌ నుంచి వైకుంఠం-2లోకి ప్రవేశించే సమయంలో దర్శనం ఎన్ని గంటలకు ఉంటుందో సూచిస్తూ ఓ టోకెన్‌ ఇస్తారు. దర్శనానికి ఎక్కువ సమయం ఉంటే అక్కడినుంచి బయటకు వచ్చి కేటాయించిన దర్శన సమయానికి గంట ముందు పశ్చిమ మాడ వీధి నుంచి మ్యూజియం వెళ్లే దారిలో ఉన్న మార్గంలో కంపార్టుమెంటులోకి నేరుగా వెళ్లవచ్చు.

సౌకర్యాలు : కంపార్టుమెంట్లు, గదుల్లో ఉండే భక్తులకు టీటీడీ సిబ్బంది భోజనం, టీ, పాలు సరఫరా చేస్తారు. అలాగే అవసరార్థులకు వైద్య సదుపాయమూ కూడా లభిస్తుంది. అదేవిధంగా క్యూలైన్లలో ఉన్న భక్కులకు ఆహారం, ఇతర సౌకర్యాలు కల్పిస్తారు.

దర్శనానికి పట్టే సమయం : సుమారు 15 నుంచి 16 గంటలు పడుతుంది. రద్దీ రోజుల్లో మరింత ఎక్కువ.

• స్లాటెడ్‌ సర్వదర్శనం (ఎస్‌ఎస్‌డీ)...

సర్వదర్శనం గుండ వచ్చే భక్తులకు నిర్దేశిత సమయాన్ని సూచిస్తూ శ్రీవారి దర్శనానికి టైమ్‌స్లాట్‌ టోకెన్ ఇస్తారు. వారికి నిర్దేశించిన సమయానికి వైకుంఠం-1 నుంచి కంపార్టుమెంట్లలోకి వెళ్లాలి. అలిపిరి వైపు నుంచి తిరుమల కొండపైకి నడిచి వచ్చేవారు ఇక్కడ దర్శన టోకెన్లు తీసుకోవచ్చు.

• దర్శనానికి పట్టే సమయం: సాధారణ రోజుల్లో 4 గంటలు ఉంటుంది. రద్దీ రోజుల్లో 7 నుంచి 8 గంటలు.
• టికెట్లు ఎక్కడెక్కడ? : తిరుపతిలోని విష్ణునివాసం, భూదేవి కాంప్లెక్స్, శ్రీవారి మెట్టు, శ్రీనివాసం.
• ఎప్పుడు ఇస్తారు?: తెల్లవారుజామున 4 గంటల నుంచి.
• రోజుకు ఎన్ని టోకెన్లు: తిరుపతిలో 14 వేలు, శ్రీవారిమెట్టు వద్ద 6 వేలు.

ప్రత్యేక ప్రవేశ దర్శనం (ఎస్‌ఈడీ) టికెట్‌ రూ.300..

దీనికి మూడు నెలల ముందు ఆన్‌లైన్‌లో టికెట్లు ఇస్తారు. టికెట్‌లో నిర్దేశించిన టైంకు వైకుంఠం-1 వద్దకు చేరుకోవాలి. 12ఏళ్ల లోపు పిల్లలకు టికెట్‌ తీసుకోవాల్సిన అవసరం లేదు.

దర్శనానికి పట్టే సమయం: సుమారు 3 నుంచి 4 గంటలు.

బుక్‌ చేసుకోవాల్సిన వెబ్‌సైట్‌: https://ttdevasthanams.ap.gov.in

• ప్రవాసాంధ్రులకు ప్రత్యేక ప్రవేశ దర్శనం (ఎస్‌ఈడీ)...

వారి పాస్‌పోర్టుపై ఇమ్మిగ్రేషన్‌ స్టాంపు చూసి నెలలోపు తిరిగి వెళ్లాల్సి ఉంటే దర్శన అవకాశం కల్పిస్తున్నారు. వీరు ఆధార్‌ కాపీ, పాస్‌పోర్టులతో దరఖాస్తు చేసుకోవాలి.

అలాగే ఏపీఎన్‌ఆర్‌టీఎస్‌ (ఆంధ్రప్రదేశ్‌ నాన్‌రెసిడెంట్‌ తెలుగు సొసైటీ) ద్వారా రోజుకు రెండు సిఫారసు లేఖలు ఇస్తారు. ఒక్కో లేఖపై ఆరుగురికి ప్రవేశం ఉంటుంది.

• దరఖాస్తు ఎక్కడ?: సుపథం వద్ద
• టికెట్‌: రూ.300
• దర్శనానికి పట్టే సమయం: సుమారు 3 నుంచి 4 గంటలు.

శ్రీవాణి దర్శనం టికెట్‌ రూ.10వేలు...

శ్రీవేంకటేశ్వర ఆలయ నిర్మాణ ట్రస్టుకు రూ.10 వేల విరాళమిచ్చే వారి నుంచి అదనంగా రూ.500 తీసుకుని టికెట్‌ ఇచ్చి ఒకరికి స్వామివారి దర్శనం కల్పిస్తారు.

రోజుకు ఎన్ని టికెట్లు ఇస్తారు?: 1,500

టికెట్లు ఎక్కడ?: రేణిగుంట విమానాశ్రయం, తిరుమలలో ఇచ్చే టికెట్లతో మరుసటి రోజు దర్శనం చేసుకోవచ్చు. మూడు నెలల ముందు ఆన్‌లైన్‌లోనూ తీసుకోవచ్చు.

దర్శనానికి పట్టే సమయం : గంట నుంచి రెండు గంటలు.

• శ్రీనివాస దివ్యానుగ్రహహోమం : ఇద్దరికి దర్శనం

తిరుపతిలోని అలిపిరి వద్దనున్న సప్తగోప్రదక్షిణ మందిరంలో శ్రీనివాస దివ్యానుగ్రహ హోమం నిర్వహిస్తారు. దీనికి వేయ్యి రుపాయలు చెల్లించి ఆన్‌లైన్‌లో టికెట్‌ తీసుకోవాలి. ఆఫ్‌లైన్‌లో కూడా రోజూ ఉదయం ఐదింటికి ఇక్కడే టికెట్లు ఇస్తారు. హోమం తర్వాత అక్కడి అధికారి స్టాంప్‌ వేసి ఇస్తే దానిపై ఇద్దరికి రూ.300 శ్రీవారి దర్శనం టికెట్ల అవకాశం లభిస్తుంది.

• దర్శనానికి పట్టే సమయం: 3 నుంచి 4 గంటలు.

సిఫార్సు దర్శనం (బ్రేక్‌ దర్శనం)...

• ఏపీ శాసనసభ్యులు, శాసనమండలి సభ్యులు, లోక్‌సభ, రాజ్యసభ సభ్యులు ఇచ్చే సిఫార్సు లేఖలపై బ్రేక్‌ దర్శనం, గది ఇస్తారు.
• ఏపీ ఐఏఎస్, ఐపీఎస్‌ అధికారుల సిఫార్సు లేఖలపైనా బ్రేక్‌ దర్శనం, గది లభిస్తుంది.

రోజుకు ఒక్కొక్కరికి ఎన్ని లేఖలు అనుమతిస్తారు?: ప్రజాప్రతినిధులైతే రోజుకు ఒకటి, ఐఏఎస్, ఐపీఎస్‌లకు వారానికి రెండు.

ఒక్కో లేఖపై గరిష్ఠంగా ఎంతమందికి ప్రవేశం: ఆరుగురు.

దర్శనానికి పట్టే సమయం: సుమారు 1 నుంచి 2 గంటలు.

నవదంపతులైతే...

• తిరుమలలో పెళ్లి చేసుకున్న దంపతులకు ఆరు టికెట్లు (వరుడు, వధువు, వారి తల్లిదండ్రులకు) ఇస్తారు. సుపథం ద్వారా లోనికివెళ్లి దర్శనం చేసుకోవచ్చు.
• నూతన దంపతులు సైతం కల్యాణోత్సవం (టికెట్‌ రూ.1,000)పైనా దర్శనం చేసుకోవచ్చు. అయితే వీరు వారంలోపు పెళ్లి జరిగినట్లు వివాహ ధ్రువీకరణ (శుభలేఖ, ఫొటోలు, ఆధార్‌)ను సీఆర్వో కార్యాలయంలో చూపి ప్రతి రోజు ఉదయం 10 గంటల నుంచి సాయంత్రం 5 గంటల మధ్య నమోదు చేసుకోవాలి. వీరికి తర్వాత రోజు జరిగే కల్యాణోత్సవం (రోజుకు 25) టికెట్లు ఇస్తారు. కల్యాణం తర్వాత స్వామి దర్శనం కల్పిస్తారు.

దర్శనానికి పట్టే సమయం: 3 నుంచి 4 గంటలు.

చిన్నపిల్లలు, వృద్ధులు, దివ్యాంగులు, అనారోగ్యంతో ఉన్నవారికి...

• తిరుమల శ్రీవారి దర్శనానికి చిన్నపిల్లలున్న వారికి ప్రత్యేక కోటా ఉంది. సంత్సరంలోపు వయస్సున్న పిల్లల తల్లిదండ్రులు మూడు నెలల ముందు ఆన్‌లైన్‌లో బాబు లేదా పాప పుట్టిన తేదీ ధ్రువీకరణ పత్రంతో బుక్‌ చేసుకోవాల్సి ఉంటుంది. వీరికి ప్రతి నెలా కోటా విడుదల చేస్తారు. శ్రీవారి ఆలయం ముందునుంచి వీరికి ప్రత్యేక క్యూలైన్‌ ఉంటుంది.
• అలాగే దివ్యాంగులు, వృద్ధులు మూడు నెలల ముందు ఆన్‌లైన్‌లో నమోదు చేసుకోవాలి. సాయంత్రం మూడింటికి వీరికి ప్రత్యేక స్లాట్లు కేటాయిస్తారు. ఆన్‌లైన్‌లో రోజుకు 750 టికెట్లు ఇస్తున్నారు.
• అనారోగ్యంతో ఉన్న భక్తులను దేవస్థానం బయోమెట్రిక్‌ ద్వారం నుంచి లోనికి అనుమతిస్తారు. ఈ విషయాన్ని ముందుగా వైకుంఠం-1 వద్దనున్న టికెట్‌ తనిఖీ సిబ్బందికి రోగి, ఆయన వెంటనున్నవారు చెప్పాలి. అనంతరం తనిఖీ సిబ్బంది మహద్వారం వద్దకు రోగిని, కుటుంబసభ్యుడిని పంపుతారు. అక్కడి టీటీడీ ఉద్యోగి రోగి వివరాలను నమోదు చేసుకుని వారిని సేవకులతో పంపించే ఏర్పాట్లు చేస్తారు. వీలునుబట్టి కుటుంబసభ్యుడికే ఈ బాధ్యతను అప్పగిస్తారు. లేదా అతన్ని ప్రధాన ద్వారం వద్దకు తిరిగి పంపించి దర్శన ఏర్పాట్లు చేస్తారు. ఇక్కడ రోగి అవసరాలపై ఒక అంచనాకు వచ్చి తదనుగుణంగా నిర్ణయాలు తీసుకుంటారు.

సైనికులు, రక్తదానం చేసేవారు...

• భారత సైన్యంలో పనిచేసేవారికి (ఫీల్డ్‌స్టాఫ్‌కు మాత్రమే) రూ.300 టికెట్‌ ఇస్తారు. తమ ఐడీ కార్డు చూపి టికెట్‌ తీసుకోవచ్చు.
• అశ్వనీ ఆసుపత్రిలో రక్తదానం చేసిన వారికి సుపథం మార్గంలో ప్రవేశం కల్పిస్తారు. అయితే వైద్యుల నుంచి తీసుకున్న ధ్రువీకరణ పత్రం చూపాలి.

దర్శనానికి పట్టే సమయం: 3 నుంచి 4 గంటలు.

ఎక్కడి నుంచి ఎలా ప్రవేశం?..

సర్వదర్శనం: వైకుంఠం-2

ఎస్‌ఎస్‌డీ, ఎస్‌ఈడీ టోకెన్లు, బ్రేక్‌దర్శనం, శ్రీవాణి: వైకుంఠం-1

బోర్డు సభ్యులు, ఎన్‌ఆర్‌ఐ, సైనికులు, కల్యాణోత్సవం, చంటిబిడ్డలున్న వారు, శ్రీనివాస దివ్యానుగ్రహ హోమం చేసినవారు : సుపథం