Dasara Celebrations in Vijayawada 2024 : ఇంద్రకీలాద్రిపై దసరా శరన్నవరాత్రి ఉత్సవాలు వైభవంగా జరుగుతున్నాయి. నవరాత్రుల్లో భాగంగా ఏడోరోజు అమ్మవారు సరస్వతీ దేవి అలంకారంలో భక్తులకు దర్శనమిస్తున్నారు. భారీగా తరలివస్తున్న భక్తులతో ఇంద్రకీలాద్రిపై కోలాహలం నెలకొంది.ఈ క్రమంలోనే దుర్గమ్మను దర్శించేకునేందుకు మంత్రులు క్యూ కడుతున్నారు. ఇందులో భాగంగా ఉప ముఖ్యమంత్రి పవన్‌కల్యాణ్‌ కుమార్తె ఆద్యతో కలిసి అమ్మవారిని దర్శించుకున్నారు.
Pawan Kalyan Visit Indrakeeladri : మొదట ఆలయం వద్ద అధికారులు పవన్‌కు స్వాగతం పలికి దర్శన ఏర్పాట్లు చేశారు. అనంతరం తీర్థప్రసాదాలు, అమ్మవారి చిత్ర పటం అందజేశారు. పవన్‌తో పాటు హోంమంత్రి అనిత, ఎంపీ కేశినేని శివనాథ్ జగన్మాతను దర్శించుకున్నారు. ఈ క్రమంలోనే దుర్గమ్మకు ఎంపీ కేశినేని శివనాథ్ దంప‌తులు పట్టువస్త్రాలు సమర్పించారు. అమ్మవారికి పట్టువస్త్రాలు సమర్పించే అవకాశం పూర్వజన్మ సుకృతమని భక్తులందరికీ జగన్మాత దర్శనం క‌లిగేలా ఏర్పాట్లు చేశామని ఆయన వివరించారు.
అంతకుముందు మరో మంత్రి నిమ్మల రామానాయుడు కుటుంబసభ్యులతో కలిసి దుర్గమ్మ దర్శనం చేసుకున్నారు. వారికి దుర్గగుడి ఈవో రామారావు సాదరంగా స్వాగతం పలికారు. నిమ్మలకు పండితులు వేద ఆశీర్వచనం అందించారు. అనంతరం అమ్మవారి చిత్రపటాన్ని, ప్రసాదాన్ని అందించారు. అమరాతి నిర్మాణం, పోలవరం ప్రాజెక్టు త్వరితగతిన పూర్తి కావాలని అమ్మవారిని వేడుకున్నట్లు నిమ్మల రామానాయుడు తెలిపారు. రాష్ట్రం ఉద్యోగ, ఉపాధి పారిశ్రామికంగా అభివృద్ధి చెందాలని ప్రార్థించినట్లు ఆయన చెప్పారు.
