CM Chandrababu Naidu Attend Parent Teacher Meeting in Bapatla : రాష్ట్రవ్యాప్తంగా ఒకే రోజున నేడు తల్లిదండ్రులు - ఉపాధ్యాయుల మెగా సమావేశాన్ని ప్రభుత్వం నిర్వహిస్తోంది. శనివారం మెగా పేరెంట్స్-టీచర్స్ మీటింగ్ ఉదయం ప్రారంభం అయ్యాయి. రాష్ట్రవ్యాప్తంగా 45,094 ప్రభుత్వ, ఎయిడెడ్‌ పాఠశాలల్లో ఈ కార్యక్రమం కొనసాగుతోంది. ఈ కార్యక్రమాన్ని ఎలాంటి రాజకీయ ప్రమేయం లేకుండా విద్యాశాఖ నిర్వహిస్తోంది.
టగ్‌ ఆఫ్‌ వార్‌లో పాల్గొన్న చంద్రబాబు : బాపట్ల పురపాలక ఉన్నత పాఠశాలలో కార్యక్రమానికి సీఎం నారా చంద్రబాబు నాయుడు, విద్యాశాఖ మంత్రి నారా లోకేశ్ హాజరయ్యారు. ఉపాధ్యాయులు, విద్యార్థులతో చంద్రబాబు ముచ్చటించడంతో పాటు వారి ప్రగతి నివేదికలను పరిశీలించారు. వారి విద్యాభ్యాసన సామర్థ్యాలను పరీక్షించారు. వారితో ముఖాముఖి సంభాషించిన ముఖ్యమంత్రి పిల్లల జీవిత లక్ష్యాలను తెలుసుకున్నారు. వారికి పలు సూచనలు చేశారు. తరువాత విద్యార్థుల తల్లిదండ్రులు, పూర్వవిద్యార్థుల సూచనలు, సలహాలు ఆయన విన్నారు. అనంతరం పాఠశాల ప్రాంగణాన్ని సీఎం పరిశీలించారు. బాపట్లలో విద్యార్థుల క్రీడా పోటీలను చంద్రబాబు ప్రారంభించారు. సరదాగా కాసేపు వారితో కలిసి టగ్‌ ఆఫ్‌ వార్‌లో పాల్గొన్నారు.
డ్రగ్స్‌ను కూరగాయ పంటల్లా సాగు చేస్తున్నారు : పిల్లల చదువును తల్లిదండ్రులు పర్యవేక్షించాలని, వారు స్మార్ట్‌ఫోన్లకు బానిసలు కాకుండా చూసుకోవాలని చంద్రబాబు తెలిపారు. డ్రగ్స్ వ్యసనానికి విద్యార్థులు దూరంగా ఉండాలని అన్నారు. డ్రగ్స్ వ్యతిరేక పోరాటం పాఠశాలల నుంచే ప్రారంభం కావాలని చంద్రబాబు అన్నారు. మానవ సంబంధాలను డ్రగ్స్ నాశనం చేస్తాయని తెలిపారు. కొందరు డ్రగ్స్‌ను కూరగాయ పంటల్లా సాగు చేస్తున్నారన్న ఆయన వారిపై ఉక్కుపాదం మోపుతామని వెల్లడించారు. ఈగల్ పేరుతో డ్రగ్స్ నిరోధక వ్యవస్థ ఏర్పాటు చేసినట్లు గుర్తు చేశారు. డ్రగ్స్ రక్కసిని కర్కశంగా అణచి వేస్తామని తేల్చి చెప్పారు.
డ్రగ్స్ వద్దు బ్రో : గంజాయి, డ్రగ్స్ వంటి మత్తుపదార్థాలతో వచ్చే అనర్థాలపై బాపట్లలో నిర్వహించిన మెగా పేరెంట్స్ - టీచర్ మీట్లో విద్యార్థి చేసిన ప్రసంగం అందర్నీ ఆలోచింపజేసింది. మత్తు పదార్థాలకు బానిసై బంగారు భవిష్యత్తును నాశనం చేసుకోవద్దంటూ జాన్ ప్రకాష్ సూచించారు. 'డ్రగ్స్ వద్దు బ్రో' అంటూ పిలుపునివ్వడంతో సీఎం చంద్రబాబు ప్రశంసించారు.
24 గంటలూ ఫోన్ చూడటం వ్యసనం: ఎలక్ట్రానిక్ పరికరాలతో జాగ్రత్తగా ఉండాలని, సైబర్ నేరగాళ్లు చాలామంది తయారయ్యారని సీఎం చంద్రబాబు అన్నారు. మాయమాటలతో జీవితాలు నాశనం చేస్తున్నారని, సాంకేతికతతో మంచితో పాటు చెడూ ఉంటుందని సూచించారు. 24 గంటలూ ఫోన్ చూడటం వ్యసనమని, అదొక బలహీనతని తెలిపారు. టీచర్లు, తల్లిదండ్రులు అన్ని జాగ్రత్తలు తీసుకోవాలని, డ్రగ్స్ వ్యసనంలో పడితే మామూలు మనిషి కావడం కష్టమని హెచ్చరించారు. గంజాయిని కూరగాయల్లా ఇంటి వద్దే పండించే స్థాయికి వచ్చారని, ఈగల్ వ్యవస్థ ద్వారా గంజాయి వినియోగం పూర్తిగా నివారిస్తామని స్పష్ట చేశారు.
మెగా పేరెంట్, టీచర్స్ డే గిన్నిస్ రికార్డ్‌కు ఎక్కుతుంది: మెగా పేరెంట్, టీచర్స్ డే గిన్నిస్ రికార్డ్‌కు ఎక్కుతుందని సీఎం చంద్రబాబు తెలిపారు. తాను నేర్చుకున్న అంశాలను సమాజాభివృద్ధికి ఉపయోగిస్తుంటానని, పిల్లల భవిష్యత్తు కోసం ఎస్‌పీటీపీ పనిచేస్తుందని, ఎస్‌పీటీపీ అంటే స్టూడెంట్, పేరెంట్, టీచర్, ప్రభుత్వం అని అన్నారు. పిల్లల భవిష్యత్తు తల్లిదండ్రులు, టీచర్ల చేతుల్లోనే ఉందన్న సీఎం, 2047కి రాష్ట్రం ఎలా ఉండాలో విజన్ తయారుచేశామని పేర్కొన్నారు. ప్రైవేటు కంటే ఉత్తమంగా ప్రభుత్వ పాఠశాలలను తయారుచేస్తామన్న సీఎం, ఏటా డిసెంబర్ 7న పేరెంట్, టీచర్స్ సమావేశం జరుగుతుందని తెలిపారు. పేరెంట్, టీచర్స్ సమావేశం అనేది చరిత్రను తిరగరాసే ఆలోచన అని, పిల్లలు స్కూల్‌కు రాకపోతే తల్లిదండ్రుల ఫోన్‌కు మెసేజ్‌లు వస్తాయన్నారు. పరీక్షా ఫలితాలు, ఆరోగ్య విషయాలు కూడా మెసేజ్‌లు వస్తాయని వెల్లడించారు.
మనదేశ గొప్ప సంపద కుటుంబ వ్యవస్థ అని, పిల్లలు ఆడుతూ, పాడుతూ ఆనందంగా చదువుకోవాలని సీఎం సూచించారు. ఆటలు ఆడితే పిల్లల్లో మానసిక ఒత్తిడి తగ్గుతుందని, పాఠశాలల్లో ఉపాధ్యాయుల కొరత లేకుండా చూస్తామని తెలిపారు. కుటుంబ వ్యవస్థను, విలువలను కాపాడే బాధ్యత అందరిపైనా ఉందని అన్నారు. విద్యాశాఖలో చేసిన పనుల ఫలితాలు భవిష్యత్తులో కనిపిస్తాయని, ప్రతి మహిళ ఇద్దరు పిల్లలకు జన్మనివ్వాలన్నారు.
విద్యార్థుల భవిష్యత్తు కోసమే ప్రభుత్వం పని చేస్తోంది: పవన్‌ కల్యాణ్‌
ప్రభుత్వ పాఠశాలల్లో మెగా పేరెంట్స్-టీచర్స్ మీటింగ్ - ముఖ్య అతిథులుగా చంద్రబాబు, లోకేశ్
