అందరికీ సమానపని - గ్రామ, వార్డు సచివాలయ వ్యవస్థపై సీఎం చంద్రబాబు సమీక్ష

గ్రామ, వార్డు సచివాలయ పటిష్టంగా తయారుచేయాలని అధికారులకు సూచించిన సీఎం చంద్రబాబు- సచివాలయ వ్యవస్థ పునర్‌వ్యవస్థీకరణే ప్రధాన అజెండాగా సమావేశం

CM Chandra Babu Naidu Review On GSWS: గ్రామ-వార్డు సచివాలయాల పునర్ వ్యవస్థీకరణపై ప్రభుత్వం దృష్టి పెట్టింది. సమర్థవంతమైన సేవలు అందించేలా తీర్చిదిద్దే అంశంపై ముఖ్యమంత్రి చంద్రబాబు కసరత్తు ప్రారంభించారు. సచివాలయ వ్యవస్థలో సమూల మార్పులు తీసుకువచ్చి మరింత పటిష్టంగా తయారు చేసి ప్రజలకు ఉపయోగకరంగా నిలపాలని ముఖ్యమంత్రి చంద్రబాబు అధికారులకు దిశానిర్దేశం చేశారు. ఉండవల్లిలోని తన నివాసంలో జీఎస్‌డబ్ల్యూఎస్ పై సీఎం సమీక్ష నిర్వహించారు.

ప్రజలకు మరింత చేరువయ్యేలా: గ్రామాలు, పట్టణాలు, నగర ప్రాంతాల్లో సైతం సచివాలయాలు ప్రజలకు మరింత చేరువయ్యే విధంగా మెరుగైన సేవలు అందించాలనే దానిపై ప్రధానంగా అధికారులతో ఆయన చర్చించారు. సచివాలయ వ్యవస్ధ పునర్ వ్యవస్థీకరణ ప్రధాన అజెండాగా జరిగిన సమావేశంలో వ్యవస్థ పనితీరు, ప్రజలకు అందుతున్న సేవలపై అధికారులు ప్రజెంటేషన్ ఇచ్చారు. ఈ వ్యవస్థ ద్వారా అత్యుత్తమ ప్రజాసేవలు అందించడంతో పాటు సచివాలయ ఉద్యోగులకు కూడా ఒక క్రమబద్ధమైన బాధ్యతలు కల్పించి ఈ వ్యవస్ధను సమర్థవంతంగా ఉపయోగించుకునే అంశంపై చర్చించారు. మానవ వనరులను సక్రమంగా వినియోగించుకోవడంతో పాటు ఉద్యోగుల అవసరాలు, సౌకర్యాల అంశం కూడా చర్చకు వచ్చింది. సచివాలయ ఉద్యోగుల్లో కొందరికి ఎక్కువ పని, మరికొందరికి తక్కువ పని ఉండటం సరికాదని అందరికీ సమానమైన పని బాధ్యత ఉండేలా చూడాలని చంద్రబాబు సూచించారు. ప్రభుత్వ కార్యకలాపాలకు అనుగుణంగా ఉద్యోగుల సర్థుబాటు, శిక్షణ వారికి ఇవ్వాలని సమావేశంలో ఆయన చర్చించారు.

ప్రస్తుతం రాష్ట్రంలో 13,291 గ్రామ పంచాయతీలుఉండగా కేవలం 11,162 గ్రామ సచివాలయాలు మాత్రమే ఉన్నాయి. మిగిలిన విభాగాల వారిని కూడా కలుపుకొని చూస్తే మొత్తం 1,27,175 మంది గ్రామ-వార్డు సచివాలయాల్లో ప్రస్తుతం ఉద్యోగులుగా పనిచేస్తున్నారు. విభాగాల వారీగా చూస్తే గ్రామ సచివాలయాల్లో 95,533 మంది, వార్డు సచివాలయాల్లో 31,592 మంది ఉన్నారు.