Amul Stopped Milk Collection in AP : చంద్రబాబు సహా తెలుగుదేశం నేతల ఆర్థిక మూలాల్ని దెబ్బతీయడమే లక్ష్యంగా మాజీ ముఖ్యమంత్రి జగన్ అమూల్‌ను ఏపీకి తీసుకొచ్చారు. వీరవిధేయులైన కొందరు అధికారులు నిబంధనలను కూడా పట్టించుకోకుండా సుమారు 4 వేల కోట్లకుపైగా విలువైన సర్కార్ ఆస్తుల్ని అమూల్కు ధారాదత్తం చేశారు. పాలసేకరణకు అవసరమైన యంత్రాలు, మౌలిక సౌకర్యాల్నీ ప్రభుత్వ నిధులతోనే సమకూర్చారు. అప్పు తెచ్చి మరీ నిర్మాణాలు చేయించారు. రాష్ట్ర, జిల్లా స్థాయి నుంచి గ్రామాల్లో పొదుపు సంఘాల మహిళల మెడపై కత్తి పెట్టి పాలసేకరణకు రోజువారీ లక్ష్యాలు విధించారు.
AP Govt Focus on Amul Dairy : కూటమి ప్రభుత్వ రాకతో వీరందరికీ స్వేచ్ఛ లభించింది. అమూల్కు పాల సేకరణ తగ్గుముఖం పట్టింది. గతంలో గరిష్ఠంగా రోజుకు 3 లక్షల 90 వేల లీటర్ల వరకూ వచ్చిన పాలు ఇప్పుడు 3 లక్షల లీటర్లు దిగువకు తగ్గిపోయాయి. ఫలితంగా అమూల్కు చెందిన సహకార సమాఖ్యలు పాలసేకరణ నిలిపేస్తున్నాయి. ధరల్లోనూ లీటరుకు 5 రూపాయలకు పైగా కోత పెట్టింది.
అమూల్ ముసుగులో గత ప్రభుత్వం 11,800 గ్రామాల్లో మహిళా సహకార పాల సేకరణ కేంద్రాల పేరుతో రూ.250 కోట్లు ఖర్చు చేసింది. సంఘానికి లక్షన్నర వెచ్చించి యంత్రాలు కొన్నారు. ఇప్పటికే 7 వేలకు పైగా గ్రామాలకు కేటాయించిన యంత్రాలు ఆర్‌బీకేలు, పశుసంవర్థక కార్యాలయాల్లో మూలనపడ్డాయి. ఇందులో భారీ ఎత్తున కమిషన్లు పొందారనే ఆరోపణలున్నాయి. ఇంత ప్రజాధనం దుర్వినియోగానికి బాధ్యులైన అందరినీ శిక్షించాలనే డిమాండ్లు వినిపిస్తున్నాయి.
"జగన్ ప్రభుత్వం అమూల్ సంస్థకు ఎర్రతివాచీ పరిచింది. విజయ డెయిరీని అమూల్కు కట్టబెట్టారు. ప్రభుత్వమే నిధులు వెచ్చించి వారికి మౌలిక వసతలు సేకరించారు. కానీ ఇప్పుడు పరిస్థితి తారుమారైంది. ఇప్పుడు వారు పాలసేకరణ చేయమని చేతులెత్తేశారు. ఇప్పటికైనా కూటమి ప్రభుత్వం వీటిపై విచారణ జరిపి తగిన చర్యలు తీసుకోవాలని కోరుతున్నాం." - నేతలు
మాకొద్దంటూ చేతులెత్తేసిన అమూల్ : వైఎస్సార్సీపీ హయాంలో జగన్, ఆయన విధేయ అధికారులు రాత్రింబవళ్లూ శ్రమించినా అధికారాంతానికి 19 జిల్లాల్లోని 4798 గ్రామాల్లో గరిష్ఠంగా రోజుకు పాలు సేకరించింది 3,90,000ల లీటర్లే! కానీ రాష్ట్రంలో ప్రైవేట్, ఇతర సహకార డెయిరీల పాలసేకరణ రోజూ 22 లక్షల లీటర్లకుపైనే! అమూల్ కోసం రోజుకు లక్ష లీటర్ల పాలు సేకరించే ఒంగోలు డెయిరీని మూసేయించిన జగన్ రూ.700 కోట్ల విలువైన ఆస్తుల్ని పాడుబెట్టించారు. పాలపొడి పరిశ్రమనూ తుప్పుపట్టించారు. ఇంతచేస్తే ఒంగోలు డెయిరీ మాకొద్దంటూ అమూల్ చేతులెత్తేసింది.
ఏలూరు, మదనపల్లిలోని 21 బల్క్‌ మిల్క్‌ కూలింగ్‌ యూనిట్లనూ 33 ఏళ్ల లీజుపై అమూల్కు అప్పగించారు. చిత్తూరు డెయిరీ ప్లాంట్‌తోపాటు 27 ఎకరాల భూములను ఏడాది కోటి రూపాయల చొప్పున 99 ఏళ్లపాటు అమూల్కు లీజుకిచ్చారు. చిత్తూరు డెయిరీకి ఉన్న రూ.182 కోట్ల అప్పులు ప్రభుత్వమే తీర్చేసి, రూ.650కోట్ల విలువైన భూములు, భవనాలు కట్టబెట్టారు. అక్కడ ఏడాదిలోగా కార్యకలాపాలు మొదలు పెడతామనే హామీ అమలు కాలేదు.
అమూల్పై ఎనలేని ప్రేమ - కోట్ల విలువైన సహకార డెయిరీలు అప్పగింత
