Hardik Pandya T20 World Cup: టీమ్ఇండియా ఆల్రౌండర్ హార్దిక్ పాండ్య అద్భుత ప్రదర్శనతో బంగ్లాదేశ్పై విజయంలో కీలక పాత్ర పోషించాడు. సూపర్- 8లో జరిగిన తాజా మ్యాచ్లో హార్దిక్ తొలుత బ్యాట్తో అజేయంగా 50 పరుగులు బాదగా, అనంతరం బంతితోనూ రాణించి 1 వికెట్ పడగొట్టాడు. దీంతో ఆల్రౌండ్ ప్రదర్శనతో కనబర్చిన పాండ్యకు 'ప్లేయర్ ఆఫ్ ది మ్యాచ్' అవార్డు కూడా లభించింది. ఈ క్రమంలోనే టీ20 వరల్డ్కప్లో ఏకైక భారత ప్లేయర్గా హార్దిక్ పలు రికార్డులు తన ఖాతాలో వేసుకున్నాడు.
2016 నుంచి హార్దిక్ టీ20 వరల్డ్కప్లో భారత్కు ప్రాతినిధ్యం వహిస్తున్నాడు. ఈ నేపథ్యంలో పొట్టికప్ చరిత్రలో 300 పరుగులు, 20+ వికెట్లు సాధించిన ఏకైక టీమ్ఇండియా ప్లేయర్గా రికార్డు సృష్టించాడు. టీ20 ప్రపంచకప్లో హార్దిక్ ఇప్పటివరకు 21 మ్యాచ్లు ఆడగా 137.89 స్ట్రైక్రేట్తో 302 పరుగులు చేశాడు. అటు బంతితోనూ రాణిస్తూ 21 వికెట్లు పడగొట్టాడు. ఈ క్రమంలో ప్రపంచవ్యాప్తంగా ఈ ఘనత అందుకున్న 5వ ప్లేయర్గానూ నిలిచాడు. పాండ్య కంటే ముందు ఈ ఘనత సాధించిన ప్లేయర్లు.
- షకీబ్ అల్ హసన్ (బంగ్లాదేశ్)- 853 పరుగులు, 50 వికెట్లు
- షాహిద్ అఫ్రిదీ (పాకిస్థాన్)- 546 పరుగులు, 39 వికెట్లు
- షేన్ వాట్సన్ (ఆస్ట్రేలియా)- 537 పరుగులు, 22 వికెట్లు
- డ్వేన్ బ్రావో (వెస్టిండీస్)- 530 పరుగులు, 27 వికెట్లు
పాండ్య ఖాతాలోకి ఆ రికార్డు కూడా
ఈ మ్యాచ్లో పాండ్య ఆరో స్థానంలో బ్యాటింగ్కు దిగాడు. టీ20 ప్రపంచకప్లో ఆరో స్థానంలో బ్యాటింగ్కు వచ్చి 50 పరుగులు చేసిన తొలి ప్లేయర్గానూ పాండ్య రికార్డు కొట్టాడు. ఈ రికార్డు ఇదివరకు సురేశ్ రైనా (45 పరుగులు), ధోనీ (45) పేరిట ఉండేది. కాగా, హార్దిక్ తాజా ఇన్నింగ్స్తో ఈ రికార్డు బద్దలైంది.
ఇక మ్యాచ్ విషయానికొస్తే, రోహిత్ సేన 50 పరుగుల భారీ తేడాతో నెగ్గింది. టీమ్ఇండియా నిర్దేశించిన 197 పరుగుల భారీ లక్ష్య ఛేదనలో బంగ్లాదేశ్ తేలిపోయింది. 20 ఓవర్లలో 8 వికెట్లు కోల్పోయి 146 పరుగులకే పరిమితమైంది. నజ్ముల్ హసన్ శాంటో (40 పరుగులు) టాప్ స్కోరర్. భారత బౌలర్లలో కుల్దీప్ యాదవ్ 3, అర్షదీప్ సింగ్, జస్ప్రీత్ బుమ్రా చెలో 2, హార్దిక్ పాండ్య 1 వికెట్ దక్కించుకున్నారు.
హార్దిక్, కుల్దీప్ అదరహో- బంగ్లాపై భారత్ గ్రాండ్ విక్టరీ - T20 World Cup 2024
సెమీస్పై భారత్ కన్ను - టీమ్ఇండియాను కలవరపెడుతున్న సమస్య అదొక్కటే! - T20 Worldcup 2024
