డేవిడ్ వార్నర్‌‌ను రీప్లేస్ చేస్తాడనుకున్నారంతా - కానీ 26 ఏళ్లకే రిటైర్మెంట్‌! - Will Pukovskis Retirement

Will Pukovskis Retirement : ఆస్ట్రేలియా విధ్వంసక మాజీ ఓపెనర్ డేవిడ్ వార్నర్ స్థానాన్ని భర్తీ చేసే ఓపెనర్‌గా వెలుగులోకి వచ్చిన విల్‌ పుకోవ్‌స్కీ తన కెరీర్‌ను అర్ధాంతరంగా ముగించేశాడు. పూర్తి వివరాలు స్టోరీలో.

Will Pukovskis Retirement : ఆస్ట్రేలియా క్రికెట్ జట్టులో ఎంతో టాలెంట్​ ఉన్న ప్లేయర్ విల్‌ పుకోవ్‌స్కీ. ఆస్ట్రేలియా భవిష్యత్‌ బ్యాటింగ్‌ స్టార్‌గానూ ఎన్నో ప్రశంసలను అందుకున్నాడు. డేవిడ్‌ వార్నర్‌ స్థానాన్ని భర్తీ చేసే ఓపెనర్‌గానూ అతడిపై ఎన్నో అంచనాలు ఏర్పడ్డాయి. కానీ ఇప్పుడు అతడి ఆటకు కంకషన్‌ అడ్డుకట్ట వేసింది. తలకు పదే పదే గాయాలవ్వడం వల్ల విల్​ క్రికెట్​ కెరీర్‌కు గుడ్​ బై చెప్పేశాడు.

డాక్టర్ల సూచన మేరకు విల్‌ పుకోవ్‌స్కీ క్రికెట్‌కు రిటైర్మెంట్‌ ప్రకటించాలని డెసిషన్ తీసుకున్నాడు! దీంతో అతడి కెరీర్‌ పూర్తిగా ఇంకా మొదలు కాక ముందే ముగింపునకు వచ్చేసింది. చివరగా విల్​ ఈ ఏడాది మార్చిలో షెఫీల్డ్‌ షీల్డ్‌లో మ్యాచులో కంకషన్‌కు గురయ్యాడు. అతడి హెల్మెట్‌కు బంతి బలంగా తాకింది. దీంతో ఆ తర్వాత సీజన్‌ మొత్తానికి అతడు దూరమవ్వాల్సి వచ్చింది. ఇక ఇంగ్లాండ్‌ కౌంటీ జట్టు లీసెస్టర్‌షైర్‌తోనూ అగ్రీమెంట్​ను కూడా రద్దు చేసుకున్నాడు.

విల్​​ ఇప్పటివరకు మొత్తంగా 13 సార్లు కంకషన్‌కు గురైనట్లు క్రికెట్ వర్గాల సమాచారం. అంతర్జాతీయ క్రికెట్లో విల్​ పుకోవ్‌స్కీ ఇప్పటివరకు కేవలం ఒక్క టెస్టు మాత్రమే ఆడాడు. అది కూడా 2021లో టీమ్​ ఇండియాపై ఆడాడు. సిడ్నీలో జరిగిన ఈ మ్యాచ్‌తో అతడు అరంగేట్రం చేశాడు. ఈ మ్యాచ్​లో తొలి ఇన్నింగ్స్‌లో 62 పరుగులు చేసి ఆకట్టుకున్నాడు. కానీ అదే మ్యాచ్‌లో భుజం గాయం అవ్వడం వల్ల ఆరు నెలలు ఆటకు దూరమయ్యాడు.

గతంలో విక్టోరియా తరపున షెఫీల్డ్‌ షీల్డ్‌ టోర్నీలో రెండు ద్విశతకాలు బాదాడు. దీంతో టీమ్‌ఇండియాతో సిరీస్‌కు విల్​ సెలెక్ట్ అయ్యాడు. కానీ ఆస్ట్రేలియా - ఎ తరపున ఆడేటప్పుడు కంకషన్‌కు గురయ్యాడు.

2017లో ఫస్ట్‌క్లాస్​ క్రికెట్​లో అరంగేట్రం చేశాడు పుకోవ్‌స్కీ. 36 మ్యాచుల్లో 45.19 సగటుతో 2350 పరుగులు సాధించాడు. ఇందులో ఏడు శతకాలు ఉన్నాయి. 14 లిస్ట్‌- ఎ మ్యాచ్‌ల్లో 333 పరుగులు చేశాడు. ఒక్క టీ20 కూడా ఆడలేదు.

Barinder Sran Retirement : టీమ్‌ఇండియా లెఫ్టార్మ్‌ పేసర్‌ బరీందర్‌ శ్రాన్‌ కూడా అన్ని ఫార్మాట్ల క్రికెట్‌కు రిటైర్మెంట్ ప్రకటించాడు. 31 ఏళ్ల శ్రాన్‌ భారత్‌ తరఫున ఆరు వన్డేలు(ఏడు వికెట్లు), రెండు టీ20లు(ఆరు వికెట్లు) ఆడాడు. టీ20ల్లో భారత్ తరఫున అరంగేట్రంలోనే అత్యుత్తమ బౌలింగ్ ప్రదర్శన చేసిన రికార్డు కూడా అతడి పేరిట ఉంది. 2016 జూన్‌ 20న ధోనీ నాయకత్వంలో జింబాబ్వేపై మొదటి టీ20 మ్యాచ్‌ ఆడాడు. ఈ మ్యాచ్​లో 10 పరుగులే ఇచ్చి నాలుగు వికెట్లు తీశాడు.

ఐపీఎల్‌లో రాజస్థాన్ రాయల్స్, పంజాబ్ కింగ్స్, సన్‌రైజర్స్ హైదరాబాద్‌, ముంబయి ఇండియన్స్​కు ప్రాతినిథ్యం వహించాడు. 2015-2019 మధ్య ఐపీఎల్‌లో మొత్తంగా 24 మ్యాచ్‌లు ఆడాడు. 9.40 ఎకానమీతో 18 వికెట్లు పడగొట్టాడు.