‘న్యూడ్‌ వీడియోల నేత మాకొద్దు’ - షాక్ ఇచ్చిన సొంత పార్టీ నేతలు - రిలే దీక్షలకు సిద్ధం

ఎమ్మెల్సీ అనంతబాబుపై వైఎస్సార్సీపీ నాయకుల తిరుగుబాటు

YSRCP MLC Anantha Babu Issue : వైఎస్సార్సీపీ అధికారంలో ఉండగా ఎమ్మెల్సీ అనంత ఉదయభాస్కర్‌ (అనంతబాబు) అరాచకాలకు అంతే లేదు. గంజాయి రవాణా నుంచి కలప స్మగ్లింగ్‌ వరకు అంతా ఆయన కనుసన్నల్లోనే! అలాంటి ఎమ్మెల్సీ ఓ మహిళ విషయంలో అడ్డంగా బుక్కయిపోయారు. సొంత పార్టీకి చెందిన ఓ మహిళతో వీడియో కాల్‌లో మాట్లాడుతూ జుగుప్సాకరంగా ప్రవర్తించిన దృశ్యాలు సామాజిక మాధ్యమాల్లో వైరల్​ అయిన విషయం తెలిసిందే.

ఇదే కాక అవతలి వారితో అనంతబాబు మాట్లాడుతూ వారికి ముద్దులు పెట్టడంతోపాటు జుగుప్సాకరంగా ప్రవర్తించినట్లుగా మరో వీడియో కూడా వైరల్ అయింది. తన ఫొటోలు, వీడియోలను మార్ఫింగ్‌ చేసి కొన్ని నెలలుగా బ్లాక్‌మెయిల్‌ చేస్తున్నారని అనంతబాబు చెప్పుకొచ్చారు. తన వీడియోలను మార్ఫింగ్‌ చేసి, దుష్ప్రచారానికి పాల్పడుతున్న వారిపై విచారించి చర్యలు తీసుకోవాలని ఆయన పోలీసులకు ఫిర్యాదు చేసిన విషయం తెలిసిందే.

YSRCP Leaders Fires on Anantha Babu : తాజాగా ఎమ్మెల్సీ అనంతబాబుపై సొంత పార్టీ నేతల నుంచి ఊహించని షాక్ ఎదురైంది. ‘న్యూడ్‌ వీడియోల నాయకుడు మాకొద్దు. విలువలు, విశ్వసనీయత లేని నాయకుడి నేతృత్వంలో పనిచేయబోం’ అని అల్లూరి సీతారామరాజు జిల్లా ఎటపాక మండల నాయకులంతా తిరుగుబాటు బావుటా ఎగురవేశారు. పార్టీ మండల అధ్యక్షుడు తానికొండ వాసు, రాష్ట్ర సంయుక్త కార్యదర్శి నర్సింహరావు ఆధ్వర్యంలో సోమవారం ఎటపాకలో పార్టీ సమావేశం నిర్వహించారు.

ఎమ్మెల్సీ అనంతబాబు ఆగడాలు, నియంతృత్వ పోకడలపై వైఎస్సార్సీపీ నేతలు ఆగ్రహం వ్యక్తం చేశారు. ఎన్నికల్లో పార్టీ అభ్యర్థి ధనలక్ష్మి ఓటమికి ఆయనే కారణమని పలువురు బహిరంగంగా మాట్లాడారు. ధనలక్ష్మి ఎమ్మెల్యేగా ఉన్న సమయంలో అధికారాన్ని తన గుప్పిట్లో పెట్టుకుని నియోజకవర్గంలోని పార్టీ నేతలకు స్వేచ్ఛ, గౌరవం లేకుండా చేశారని ఆరోపించారు. దళితుని హత్య చేసి డోర్‌ డెలివరీ చేయడం, న్యూడ్‌ వీడియోల ఆరోపణల ఘటనలతో పార్టీని కోలుకోలేని దెబ్బకొట్టారని ఆవేదన వ్యక్తం చేశారు. ఈ విషయాలన్నింటిపై పార్టీ అధినేత జగన్‌ను కలిసి వివరిస్తామని చెప్పారు. అనంతబాబు నాయకత్వంలో ఇక పనిచేయలేమని చెప్పారు. ఇకనైనా నాయకత్వం మార్చాలని కోరతామని పేర్కొన్నారు. అప్పటివరకు రిలే నిరాహార దీక్షకు దిగుతామని వారు స్పష్టం చేశారు.