Land Encroachments in Dharmavaram: శ్రీసత్యసాయి జిల్లా ధర్మవరం సమీపంలోని రేగాటిపల్లిలో కాలన్తజేషన్ కోఆపరేటివ్ సొసైటీని బ్రిటీషు కాలంలో ఏర్పాటు చేశారు. ఈ సొసైటీ ఆధీనంలో ఉన్న 13 వందల ఎకరాల భూమిని గ్రామంలోని 72 కుటుంబాలకు చెందిన రైతులు సాగు చేసుకుంటూ జీవనం సాగిస్తూ వచ్చారు. 1995లో అప్పటి రాష్ట్రప్రభుత్వం సొసైటీని రద్దుచేసింది. పరిటాల రవీంద్ర ఆధ్వర్యంలో గ్రామంలోని 93 కుటుంబాలకు 5 ఎకరాల చొప్పున భూమిని పంపిణీ చేసి పట్టాలు ఇచ్చింది.
మిగిలిన 800 ఎకరాల భూమిని గ్రామస్థులు అనధికారికంగా సాగు చేసుకుంటూ ఉండేవారు. 2004లో కాంగ్రెస్ ప్రభుత్వ హయాంలో అప్పటి ముఖ్యమంత్రి వైఎస్ రాజశేఖర రెడ్డి 300 ఎకరాలను ఇళ్ల స్థలాల కోసం తీసుకున్నారు. ఆ భూముల్లో సాగులో ఉన్న పేదలకు పరిహారం సైతం ఇవ్వలేదు. 2009, 2012 సంవత్సరాల్లో భూమిని పంపిణీ చేస్తాం అంటూ మరో 300 ఎకరాలు పంచారు. మిగిలిన 500 ఎకరాలపై కన్నేసిన ఎమ్మెల్యే కేతిరెడ్డి వెంకట్రామిరెడ్డి అనుచరులు రెవెన్యూ అధికారిణి సహకారంతో భూ పంపిణీ పేరుతో రాయించేసుకున్నారు. ఇలా సుమారు 200 ఎకరాల వరకు పంచేశారు.
గుడ్‌మార్నింగ్‌ ముసుగులో ఆస్తులపై రెక్కీ! - భూములు, వ్యాపారాలు ఆయన కన్నేస్తే కనుమరుగే
ఎమ్మెల్యే అనుచరుడి కనుసన్నల్లోనే: ప్రభుత్వ భూముల్లో అనధికారికంగా సాగు చేసుకుంటున్న పేదలకు పట్టాలు పంపిణీ చేయాలని 2021లో వైసీపీ ప్రభుత్వం నిర్ణయించింది. ఇదే అదనుగా భావించిన ఎమ్మెల్యే కేతిరెడ్డి అనుచరులు రేగాటిపల్లెలో 200 ఎకరాలు కొట్టేసేందుకు ప్రణాళికలు సిద్ధం చేశారు. అప్పటికే వారంతా ఆ భూములను సాగుచేసుకుంటున్నట్లు రికార్డులు సృష్టించి భూ పంపిణీకి దరఖాస్తు చేసుకున్నారు. ఎమ్మెల్యే కేతిరెడ్డికి ప్రధాన అనుచరుడైన రేగాటిపల్లి సర్పంచ్ సురేశ్‌రెడ్డి కనుసన్నల్లోనే ఈ దందా సాగింది.
సర్పంచి కుటుంబసభ్యులు, బంధువుల పేరిట 200 ఎకరాలకు సాగుపట్టాలు సిద్ధం చేసి ఎమ్మెల్యే చేతుల మీదుగానే పంపిణీ చేశారు. మొత్తం 43 మందికి ఐదెకరాల చొప్పున ఇవ్వగా, ఇందులో 36 మంది ఎమ్మెల్యే అనుచరులే ఉన్నారు. వీరందరికీ ఇతర భూములు కూడా ఉన్నాయి. ప్రభుత్వ నిబంధనల ప్రకారం కుటుంబంలో ఏ ఒక్కరి పేరిట భూమి ఉన్నా, వారు భూ పంపిణీకి అనర్హులు. ఇవేమీ పట్టించుకోకుండా సుమారు 200 కోట్ల విలువైన భూములు వారికి అప్పనంగా దోచిపెట్టారు.
ఇళ్ల స్థలాలను ఆక్రమించేందుకు వైసీపీ నేత యత్నం - బాధితుల ఆవేదన
రేగాటిపల్లి సొసైటీ భూములు పొందిన వారిలో సర్పంచ్ సురేశ్‌రెడ్డి సోదరి ఉంది. ఆమె ఆశా వర్కర్. ఈమెకు 2012లోనే భూ పంపిణీ కింద 2 ఎకరాల భూమిని ప్రభుత్వం మంజూరు చేసింది. అయినా సరే తాజాగా మరో 2 ఎకరాలకు సాగు పట్టా ఇచ్చారు. సురేశ్ రెడ్డి సోదరుడి కుమారుడు సూర్యప్రతాప్ రెడ్డి బెంగళూరులో సాప్ట్‌వేర్ ఇంజినీర్. ఆయన కుటుంబానికీ ఇది వరకే భూమి ఉంది. అయినా సరే మరో ఐదు ఎకరాలు రాసిచ్చేశారు. ఆయన తల్లి లీలావతికి మరో 4 ఎకరాలు ఇచ్చారు.
స్థానిక వైసీపీ నాయకుడు అశోక్‌కుమార్‌రెడ్డి వైసీపీ సోషల్ మీడియా కార్యకర్త, ఆయనకు ఇదివరకే 4 ఎకరాల సొంత భూమి ఉంది. ఈయనకూ మరో 4.18 ఎకరాలు పంచి ఇచ్చారు. సర్పంచి సురేశ్‌రెడ్డి సోదరుడు కొండారెడ్డికి సొంత భూమి ఉన్నా, మరో 4. 65 ఎకరాలు కట్టబెట్టారు. కొత్తచెరువు మండలం కేశాపురం సర్పంచి నరేంద్ర రెడ్డి రేగాటిపల్లి సర్పంచ్ సురేశ్‌రెడ్డికి మేనమామ. నరేంద్రరెడ్డి కుటుంబసభ్యురాలు మాలతి పేరుతో రేగాటిపల్లిలో 2 ఎకరాల భూమిని కట్టబెట్టారు. సురేశ్ రెడ్డి బావమరిది మారుతీరెడ్డి భార్య కల్పనకు రేగాటిపల్లిలో 2 ఎకరాలు రాసిచ్చేశారు.
వైఎస్సార్సీపీ నేతల కనుసన్నల్లో భూకబ్జాలు - మౌనముద్ర వహించిన అధికారులు
2009లో ప్రభుత్వం పేదల ఇళ్ల స్థలాల కోసం రేగాటిపల్లి సొసైటీ భూములను కేటాయించింది. అదే లేఔట్‌లో గుడి, బడి, మసీదు నిర్మాణాలకు కొంత భూమిని కేటాయించారు. తెలుగుదేశం హయాంలో ఆ 13 ఎకరాల భూమిని బీసీ రెసిడెన్షియల్ పాఠశాలకు కేటాయించింది. వైసీపీ ప్రభుత్వం వచ్చిన తర్వాత సర్పంచి సురేశ్ రెడ్డి ఆ 13 ఎకరాలను ఆక్రమించి చుట్టూ కంచె వేసుకుని చినీ తోట సాగు చేస్తున్నాడు. భార్య, సోదరుల పేరుతో ఆ భూమిని ఆన్‌లైన్‌లోకి ఎక్కించారు. ఈ 13 ఎకరాల భూమి విలువే 15 కోట్ల వరకు ఉంటుందని అంచనా.
