కేసీఆర్‌ అధ్యక్షతన రేపు బీఆర్​ఎస్​ పార్లమెంటరీ పార్టీ సమావేశం - అదే ఎజెండా

BRS Parliamentary Party Meeting Tomorrow : మాజీ సీఎం, బీఆర్​ఎస్​ పార్టీ అధినేత కేసీఆర్ అధ్యక్షతన రేపు ఆ పార్టీ పార్లమెంటరీ పార్టీ సమావేశం జరగనుంది. ఎర్రవల్లిలోని వ్యవసాయ క్షేత్రంలో పార్టీకి చెందిన లోక్​సభ, రాజ్యసభ సభ్యులతో కేసీఆర్ సమావేశం కానున్నారు. పార్లమెంట్ సమావేశాల్లో అనుసరించాల్సిన వ్యూహంపై భేటీలో చర్చించనున్నారు.

BRS Parliamentary Party Meeting Tomorrow : భారత రాష్ట్ర సమితి పార్లమెంటరీ పార్టీ రేపు సమావేశం కానుంది. పార్టీ అధినేత కేసీఆర్ అధ్యక్షతన సిద్దిపేట జిల్లా ఎర్రవల్లిలోని వ్యవసాయ క్షేత్రంలో భేటీ జరగనుంది. రానున్న పార్లమెంట్ సమావేశాల నేపథ్యంలో పార్టీకి చెందిన లోక్​సభ, రాజ్యసభ సభ్యులతో కేసీఆర్ సమావేశం కానున్నారు. పార్లమెంట్ సమావేశాల్లో అనుసరించాల్సిన వ్యూహం, పార్టీ వైఖరిపై భేటీలో చర్చించనున్నారు. లోక్​సభ ఎన్నికలకు ముందు జరుగుతున్న చివరి సమావేశాలు కావడంతో కీలక బిల్లులు సహా ఇతర అంశాల్లో పార్టీ అనుసరించబోయే వైఖరి కీలకం కానుంది. ఈ పరిస్థితుల్లో పార్టీ విధానం, సమావేశాల్లో లేవనెత్తాల్సిన అంశాలపై ఎంపీలకు అధినేత కేసీఆర్ దిశానిర్దేశం చేయనున్నారు.

ఈ సమావేశంపై ఆ పార్టీ ఎంపీ రంజిత్​ రెడ్డి స్పందించారు. రానున్న బడ్జెట్ సమావేశాల్లో అనుసరించాల్సిన వ్యూహంపై పార్టీ అధినేత కేసీఆర్ శుక్రవారం దిశానిర్దేశం చేస్తారని ఆయన తెలిపారు. ఎర్రవల్లిలోని వ్యవసాయ క్షేత్రంలో మధ్యాహ్నం పార్లమెంటరీ పార్టీ సమావేశం ఉందని వెల్లడించారు. ఈ క్రమంలోనే బడ్జెట్​పై కేంద్రం ఎంత మేరకు సీరియస్​గా ఉందో చూడాలన్న ఆయన, కేవలం ఓటాన్ అకౌంట్ బడ్జెట్​కే పరిమితం అవుతారా, పూర్తి స్థాయి సమావేశాలు నిర్వహిస్తారా వేచి చూడాలన్నారు.

తెలంగాణ ప్రయోజనాల కోసమే బీఆర్​ఎస్​ ఉందన్న రంజిత్ రెడ్డి, పార్లమెంట్ సమావేశాల్లో తెలంగాణకు సంబంధించిన అన్ని అంశాలను ప్రస్తావిస్తామని తెలిపారు. ఈ క్రమంలోనే తనపై ఎందుకు కేసు పెట్టారో మాజీ ఎంపీ విశ్వేశ్వర్ రెడ్డినే అడగాలన్న ఆయన, ఆ తర్వాత తాను స్పందిస్తానని చెప్పారు. 60 ఏళ్ల జీవితంలో ఇప్పటి వరకు తనపై ఒక్క ఎఫ్​ఐఆర్ కూడా నమోదు కాలేదని, తనకు సంస్కారం ఉందని రంజిత్ రెడ్డి వ్యాఖ్యానించారు.

ఎర్రవల్లిలోని వ్యవసాయ క్షేత్రంలో రేపు మధ్యాహ్నం పార్లమెంటరీ పార్టీ సమావేశం ఉంది. రానున్న బడ్జెట్ సమావేశాల్లో అనుసరించాల్సిన వ్యూహంపై పార్టీ అధినేత కేసీఆర్ దిశానిర్దేశం చేస్తారు. బడ్జెట్​పై కేంద్రం ఎంత మేరకు సీరియస్​గా ఉందో చూడాలి. కేవలం ఓటాన్ అకౌంట్ బడ్జెట్​కే పరిమితం అవుతారా, పూర్తి స్థాయి సమావేశాలు నిర్వహిస్తారా వేచి చూడాలి. తెలంగాణ ప్రయోజనాల కోసమే బీఆర్​ఎస్​ ఉంది. పార్లమెంట్ సమావేశాల్లో తెలంగాణకు సంబంధించిన అన్ని అంశాలను ప్రస్తావిస్తాం. - జి.రంజిత్ రెడ్డి, బీఆర్​ఎస్​ ఎంపీ

ఎల్లుండి నుంచి అసెంబ్లీ నియోజకవర్గ సమావేశాలు : మరోవైపు ఈ నెల 27 నుంచి బీఆర్​ఎస్​ అసెంబ్లీ నియోజకవర్గాల వారీగా సమావేశాలు జరగనున్నాయి. లోక్‌సభ ఎన్నికల సన్నద్ధత కోసం అసెంబ్లీ స్థాయి భేటీలు నిర్వహించనున్నారు. ఇందులో భాగంగా మైనార్టీ ప్రతినిధులతో పార్టీ కార్యనిర్వాహక అధ్యక్షుడు కేటీఆర్ శనివారం సమావేశం కానున్నారు.