Rayalaseema NatuKodi Vepudu in Telugu : రాయలసీమ అనగానే మనందరికీ నాటుకోడి పులుసు, రాగి సంగటి గుర్తుకొస్తుంటాయి. కారంగా ఉండే నాటుకోడి కూర రాగి సంగటితో తింటే టేస్ట్ అద్భుతంగా ఉంటుంది. అయితే, ఈ సంక్రాంతికి నాటుకోడి పులుసు కాకుండా ఓసారి ఇలా వేపుడు ట్రై చేయండి. టేస్ట్ ఎంతో బాగుంటుంది. ఒక్కసారి ఇలా నాటుకోడి ఫ్రై చేస్తే మళ్లీ మళ్లీ చేసుకుంటారు. మరి ఇక ఆలస్యం చేయకుండా సింపుల్గా నాటుకోడి వేపుడు ఎలా చేయాలి ? రెసిపీకి కావాల్సిన పదార్థాలు ఏంటి ? అనేది ఇప్పుడు చూద్దాం.
కావాల్సిన పదార్థాలు :
- నాటు కోడి ముక్కలు - అరకేజీ
- నూనె- అరకప్పు
- ఉప్పు - రుచికి సరిపడా
- కారం - రుచికి సరిపడా
- పసుపు- అర టీ స్పూన్
- ధనియాలపొడి -2 టీస్పూన్లు
- అల్లం వెల్లుల్లి పేస్ట్ - టేబుల్స్పూన్
- ధనియాలు - 1 టేబుల్ స్పూన్
- జాజికాయ పొడి - 2 చిటికెలు
- దాల్చిన చెక్క - 2 ఇంచ్లు
- లవంగాలు - 5
- యాలకులు -3
- జీలకర్ర- అర టీ స్పూన్
- బిర్యానీ ఆకు- 1
- మిరియాలు - 10
- ఎండుమిర్చి-3
- అనాసపువ్వు - 1
- వెల్లుల్లి రెబ్బలు - 8
- పచ్చిమిర్చి - 3
- కరివేపాకు రెమ్మలు -2
- కొత్తిమీర తరుగు - కొద్దిగా
తయారీ విధానం:
- ముందుగా చికెన్ శుభ్రంగా కడిగి ఒక అరగంట పాటు ఉప్పు నీటిలో నానబెట్టుకోండి. ఇలా సాల్ట్ వాటర్లో నానబెట్టుకోవడం వల్ల ముక్క త్వరగా ఉడుకుతుంది.
- ఆపై స్టవ్ ఆన్ చేసి పాన్ పెట్టి ధనియాలు, దాల్చిన చెక్క, లవంగాలు, యాలకులు, జీలకర్ర, మిరియాలు, బిర్యానీ ఆకు, ఎండుమిర్చి, అనాసపువ్వు, జాజికాయ పొడి వేసి మంచి వాసన వచ్చేవరకు దోరగా వేయించుకోవాలి.
- కొద్దిసేపటికి వెల్లుల్లి రెబ్బలు వేసి వేపుకోండి. ఆ తర్వాత స్టవ్ ఆఫ్ చేసి ఒక ప్లేట్లోకి తీసుకోండి.
- ఇవి చల్లారిన తర్వాత మిక్సీజార్లోకి వేసి గ్రైండ్ మెత్తగా పొడి చేసుకుని పక్కన పెట్టుకోవాలి.
- ఇప్పుడు స్టవ్పై పాన్ పెట్టి ఆయిల్ వేసి వేడి చేయండి. నూనె వేడయ్యాక కరివేపాకు, పచ్చిమిర్చి, ఎండుమిర్చి వేసి వేపండి.
- ఆపై ఫ్రెష్ అల్లం- వెల్లుల్లి పేస్ట్ వేసి పచ్చివాసన పోయే వరకు వేపండి. ఇప్పుడు ఉప్పు, పసుపు వేసి వేపండి.
- అనంతరం ధనియాలపొడి, కారం రుచికి సరిపడా వేసి నూనెలో బాగా ఫ్రై చేయండి.
- ఇప్పుడు ఉప్పు నీటిలో నానబెట్టుకున్న చికెన్ ముక్కలు వేసి వేపండి.
- ఒక 5 నిమిషాల తర్వాత ఒక నాలుగు గ్లాసుల నీరు పోసి బాగా కలపండి. ఇప్పుడు స్టవ్ మీడియం ఫ్లేమ్లో ఉంచి మధ్యమధ్యలో కలుపుతూ ముక్క మెత్తగా అయ్యేంత వరకు ఉడికించుకోండి.
- ముక్క ఉడికిన తర్వాత గిన్నెపై మూత తీసేసి నీరు ఇగిరిపోయేంత వరకు కలుపుతూ వేపుకోండి.
- ముక్క క్రిస్పీగా అయిన తర్వాత గ్రైండ్ చేసుకున్న మసాలా పొడి రెండు టీస్పూన్లు వేసి మిక్స్ చేయండి.
- ఒక 5 నిమిషాల తర్వాత కాస్త కొత్తిమీర తరుగు, కరివేపాకు వేసి కలపండి.
- ఒక నిమిషం తర్వాత స్టవ్ ఆఫ్ చేసి సర్వ్ చేసుకుంటే సరిపోతుంది. అంతే ఇలా సింపుల్గా చేసుకుంటే ఘుమఘుమలాడే నాటుకోడి వేపుడు మీ ముందుంటుంది.
- ఈ రాయలసీమ నాటుకోడి ఫ్రై మీకు నచ్చితే, ఈ సంక్రాంతికి తప్పక ట్రై చేయండి.
"ఆంధ్రా స్టైల్ నాటుకోడి బిర్యానీ"- ఈ సంక్రాంతికి మరింత స్పైసీగా!
టేస్టీ అండ్ స్పైసీ "గార్లిక్ చికెన్ ఫ్రై" - ఇంట్లో ఇలా చేస్తే అందరూ ఫిదా అవ్వాల్సిందే!
