LIC unsettled claim amount : 'నేను లేకపోయినా నా కుటుంబం ఆర్థికంగా ఇబ్బంది పడొద్దు'అనే ఉద్దేశంతో ఎంతో మంది బీమా పాలసీ తీసుకుంటారు. అందులోనూ లైఫ్ ఇన్సూరెన్స్ కార్పొరేషన్ (LIC) పాలసీ తీసుకున్నవారే ఎక్కువగా ఉంటారు. కానీ, చాలా మంది ఇన్సూరెన్స్ తాలూకూ విషయాల్లో నిర్లక్ష్యంగా ఉంటున్నారు. పాలసీ తీసుకున్న విషయం కూడా కుటుంబ సభ్యులతో చెప్పకపోవడం సమస్యగా మారింది. పాలసీదార్లు క్లెయిమ్ చేయని డబ్బు భారతీయ జీవిత బీమా సంస్థ వద్ద కొన్ని వందల కోట్లు ఉంది. 2023- 2024 ఆర్థిక సంవత్సరంలో దాదాపు రూ.880.93 కోట్ల మెచ్యూరిటీ డబ్బు ఉందని కేంద్ర మంత్రి వెల్లడించారు. ఇది గడిచిన ఐదేళ్లలో 3,726 కోట్లకు పైగా ఉంటుందని సమాచారం.
జీవిత బీమా తీసుకునే వారిలో గ్రామీణ నేపథ్యం కలిగిన నిరక్షరాస్యులు ఎంతో మంది ఉన్నారు. వారికి పాలసీల గురించి, వాటిని క్లైయిమ్ చేసుకోవడంపై పెద్దగా అవగాహన లేదు. మరికొంత మంది పాలసీ విషయం తమ కుటుంబ సభ్యులకు చెప్పే వాళ్లు కాదు. అలాంటి సందర్భాల్లో పాలసీ తీసుకున్న వ్యక్తి మరణించినప్పుడు ఎల్ఐసీ నుంచి డబ్బు వస్తుందన్న విషయం కూడా ఆ కుటుంబ సభ్యులకు తెలిసేది కాదు. ఇలా పాలసీదారులు క్లయిమ్ చేయని డబ్బు చాలా ఉంది.
అల్యూమినియం పాత్రల్లో వంట ప్రమాదకరమా? - డాక్టర్లు ఏం చెప్తున్నారంటే!
క్లయిమ్ చేయని డబ్బు ఎల్ఐసీ దగ్గరే ఎక్కువ
ఎల్ఐసీ మన దేశంలో అతి పెద్ద, ప్రభుత్వ రంగ జీవిత బీమా సంస్థ కావడంతో కోట్లాది మంది ప్రజలు పాలసీలు తీసుకున్నారు. గతంలో కుటుంబ పెద్దలు మాత్రమే ఎల్ఐసీ పాలసీలు తీసుకునేవాళ్లు. అలాంటి సందర్భాల్లో పాలసీ కొన్న వ్యక్తి హఠాత్తుగా మరణించినప్పుడు కుటుంబ సభ్యులు క్లయిమ్ కోసం దరఖాస్తు చేయకపోవడంతో పెద్ద మొత్తంలో డబ్బు అలాగే ఉండిపోయింది. పాలసీ ఉందన్న విషయం తెలియక కుటుంబ సభ్యులు సెటిల్ చేసుకోకపోవడం, మరి కొందరు పాలసీహోల్డర్లు జీవించి ఉన్నా కొన్నాళ్లు కిస్తీలు చెల్లించి వదిలేయడం ఇలా పలు కారణాలతో దశాబ్దాలుగా ప్రజలు క్లెయిమ్ చేయని డబ్బు ఎల్ఐసీ దగ్గర కుప్పలుతెప్పలుగా పేరుకుపోయింది.
క్లెయిమ్ చేయని డబ్బు అంటే ఏంటి?
క్లెయిమ్ చేయని పాలసీలు అంటే పాలసీదారులు మెచ్యూరిటీ తర్వాత కూడా విత్‌డ్రా చేయని డబ్బు అని అర్థం. నిబంధనల ప్రకారం పాలసీ మెచ్యూరిటీ ముగిసిన తర్వాత మూడు సంవత్సరాలు లేదా అంతకంటే ఎక్కువ కాలం బీమా సంస్థ నుంచి డబ్బును తీసుకోకపోతే దానిని క్లెయిమ్ చేయని డబ్బుగా పరిగణిస్తారు. పాలసీదారుడు ప్రీమియం చెల్లింపులను మధ్యలోనే నిలిపేసినా, ఆ పాలసీ గురించి మర్చిపోయినా, పాలసీ గురించి ఎవరికీ చెప్పకుండా చనిపోయినా క్లెయిమ్ చేయని డబ్బు పోగుపడుతుంది. పాలసీ మెచ్యూరిటీ తర్వాత కూడా చాలా మంది మర్చిపోతున్నారు. తిరిగి తీసుకోకుండానే వదిలేస్తుండడంతో ఇలాంటి పరిస్థితి వచ్చింది.
క్లెయిమ్ చేయని డబ్బు కోసం ఇలా చెక్ చేసుకోండి!
లైఫ్ ఇన్సూరెన్స్ కార్పొరేషన్ వద్ద క్లయిమ్ చేయని ఖాతాలు ఆన్లైన్లో చెక్ చేసుకోవచ్చు. అన్క్లెయిమ్డ్ మెచ్యూరిటీ అమౌంట్‌ను చెక్ చేయడానికి LIC అధికారిక వెబ్‌సైట్ https://licindia.in/home ను సందర్శించాలి. హోమ్‌ పేజీలోని "కస్టమర్ సర్వీస్" ఆప్షన్‌పై క్లిక్ చేసిన తర్వాత "అన్క్లెయిమ్డ్ అమౌంట్స్‌ ఆఫ్‌ పాలసీహోల్డర్స్‌" ఎంచుకోవాలి. పాలసీ నంబర్, పేరు, పుట్టిన తేదీ, పాన్ కార్డ్ నంబర్ తదితర వివరాలను అందించి చివరగా సబ్మిట్ బటన్ పై క్లిక్ చేయాలి. క్లెయిమ్ పొందడానికి ఎల్ఐసీ కార్యాలయం నుంచి సంబంధిత ఫారం తీసుకోవచ్చు లేదా సైట్ నుంచి డౌన్‌లోడ్ చేసుకోవచ్చు. పాలసీకి సంబంధించిన ప్రీమియం రసీదులు, ఇతర ధ్రువీకరణ పత్రాలను ఆ ఫారంతో పాటు సమర్పించాలి. ఒకవేళ పాలసీదారుడు మరణించినట్లయితే, అతని డెత్ సర్టిఫికెట్ అందజేయాల్సి ఉంటుంది. LIC మీ క్లెయిమ్‌ను పరిశీంచిన తర్వాత సాధ్యాసాధ్యాలను బట్టి క్లెయిమ్ చేయని డబ్బు మీ బ్యాంక్‌ ఖాతాకు బదిలీ చేసే వీలుంది.
పిల్లల షూ ఎలా క్లీన్ చేయాలి? - వాషింగ్ మిషన్లో వేయొచ్చా!
రూ.40కోట్లు పలికిన 'నెల్లూరు ఆవు' - బహిరంగ వేలంలో ప్రపంచ రికార్డు
