రోజురోజుకీ ఉద్యోగంపై ఆసక్తి తగ్గుతుందా?- ఇలా చేస్తే ఫస్ట్​ రోజూ జాయిన్​ అయిన ఫీలింగ్​ కలుగుతుంది!!

-ఉద్యోగం పట్ల ఆసక్తి తగ్గడం కామన్​ -ఓ సారి ఇలా ప్రయత్నించండి

How to Find Job Satisfaction: సాధారణంగానే ఉద్యోగం చేసే చాలా మందికి.. కొన్ని రోజుల తర్వాత చేసే జాబ్​పై ఆసక్తి తగ్గిపోతుంటుంది. రోజూ ఉదయాన్నే ఆఫీస్​కి వెళ్లి ఇంటికి రావడం, మరుసటి రోజూ మళ్లీ ఆఫీస్​కి వెళ్లడం.. ఇదంతా ఎంతో బోరింగ్​గా అనిపిస్తుంది. ఈ క్రమంలో కొంతమంది అనుకున్నంత ఉల్లాసంగా, ఉత్సహంగా పని చేయలేకపోతారు. దీంతో ఆఫీస్​లో చివాట్లు తప్పవు. ఫలితంగా ఒత్తిడి, ఆందోళనకు లోనవుతారు. మీరు కూడా మీ లైఫ్​లో ఇలాంటి పరిస్థితులనే ఎదుర్కొంటున్నారా? అయితే, దీని నుంచి బయట పడడానికి నిపుణులు కొన్ని చిట్కాలు సూచిస్తున్నారు. అవేంటో ఈ స్టోరీలో చూద్దాం.

ఆలోచించి నిర్ణయం తీసుకోండి
ఆఫీసులో చేస్తున్న పని మీద ఆసక్తి తగ్గిపోవడానికి మీరు ఏదో విషయంలో టెన్షన్​కి గురవడమో లేక మీరు పని చేస్తున్న రంగం మీద కాకుండా వేరే రంగం మీద ఆసక్తి ఉండడమో కారణం కావచ్చు. ఇలాంటి సందర్భాల్లో మీరు ఆలోచించి సరైన నిర్ణయం తీసుకోవడం మంచిది. లేకపోతే.. మీ జీవితం ప్రమాదంలో పడే అవకాశం ఉంటుందని నిపుణులు అంటున్నారు.

మీకు తగ్గట్టుగా మల్చుకోండి
ప్రతిరోజు రొటీన్ జాబ్ చేస్తున్నామనే భావన కలుగుతోందా? పనిలో ఆసక్తి తగ్గడానికి అదే కారణమని ఫీల్​ అవుతున్నారా..? అయితే, ఇటువంటి టైమ్​లోనే మీ పనిని మీకు తగ్గ విధంగా మలచుకోండి. డైలీ చేసే పనినే విభిన్నంగా చేయడానికి ట్రై చేయాలట. అంతకు మించి మీరు చేస్తున్న పనిలోనే రోజుకో కొత్త విషయాన్ని నేర్చుకోవడానికి ప్రయత్నించాలని సలహా ఇస్తున్నారు.

స్నేహపూర్వకమైన వాతావరణంలో
మీ తోటి ఉద్యోగులతో విభేదాలే మీకు ఆఫీసు పనిలో నిరాసక్తతను, నిస్పృహను కలిగిస్తున్నాయా? అయితే, అలాంటి విభేదాలను సాధ్యమైనంత వరకు పరిష్కరించుకోవడానికి ట్రై చేయండి. స్నేహపూర్వకమైన వాతావరణంలో అందరినీ గౌరవిస్తూ, నిబద్ధతతో ఆఫీసులో పని చేయాలని చెబుతున్నారు.

కష్టపడి పని చేయండి
ఒక వేళ శాలరీ, ప్రమోషన్​ విషయాల్లో తగిన ప్రతిఫలం అందడం లేదనే భావనే మీకు పనిలో అనాసక్తిని కలిగిస్తోందా? అటువంటప్పుడు ఇంకా కష్టపడి పని చేయడానికి, మీ స్కిల్స్​ పెంచుకోడానికి ప్రయత్నించాలట. ఇలా చేయడం వల్ల మీకంటూ ఆఫీసులో ఒక గుర్తింపు లభిస్తుంది. కేవలం కొన్ని విషయాలకే పరిమితమైపోకుండా, ఇతర విషయాల్లో కూడా కంపెనీ పురోభివృద్ధిని కోరుకొనే వారినే సంస్థ ప్రోత్సహిస్తుందని అర్థం చేసుకోండి.

ఆ విషయాలు ఆలోచించవద్దు
మీరు ఏవైనా కుటుంబ సమస్యలు, వ్యక్తిగత సమస్యలతో బాధపడుతున్నప్పుడు వాటి గురించి పదే పదే ఆఫీసులో ఆలోచించి మనసు పాడు చేసుకోవద్దు. వాటి ప్రభావం మీ వర్క్​ మీద పడకుండా జాగ్రత్తపడాలి. ఈ విషయంలో ఏ మాత్రం తేడా వచ్చినా మీరు పని మీద ఫోకస్​ చేయలేరు. తరచూ తప్పులు చేస్తూ ఇబ్బంది పడే అవకాశం ఉంటుంది.

అలవాటు పడండి
ప్రతి కంపెనీకి ప్రత్యేకంగా కొన్ని నియమ నిబంధనలుంటాయి. మీరు ఆఫీసు పద్ధతులకు అలవాటు పడకపోవడం వల్ల కూడా మీకు పని మీద ఆసక్తి తగ్గే అవకాశం ఉంది. కాబట్టి, ఈ విషయాన్ని గుర్తుపెట్టుకోని వాటికనుగుణంగానే నడుచుకోవాలట. అందుకే సాధ్యమైనంత వరకు ఉత్సాహంగా పని చేయాలనుకొంటే వాటికి అలవాటు పడడమే మేలని అంటున్నారు.

• ఆఫీసులో ప్రణాళికాబద్ధంగా పని చేయకపోవడం కూడా.. జాబ్​పై ఆసక్తి తగ్గిపోవడానికి కారణం కావచ్చు. కాబట్టి, మీకిచ్చిన పనిని నిర్ణీత సమయానికి అనుకున్న విధంగా పూర్తి చేయడానికి ట్రై చేయండి.
• పని చేయడానికి బద్ధకం పెంచుకున్నా కూడా ఆఫీసు పని చేయాలని అనిపించదు. అందుకే పనులను వాయిదా వేయడం, లేట్​గా పనులను ప్రారంభించడం.. వంటివి చేయకూడదు.
• కొంతమంది కొన్ని ఫుల్‌టైమ్ కోర్సులు చేస్తూ కూడా, 8 గంటల డ్యూటీ చేయడానికి ట్రై చేస్తుంటారు. అలా చేయడం కూడా ఉద్యోగ జీవితంలో టెన్షన్​కి కారణమవుతుంది. అలాంటి వారు రెండు పడవల మీద ప్రయాణం చేయడం మానుకోవాలి. కెరీర్ మీదే దృష్టి కేంద్రీకరించాలి. అప్పుడే వారు ప్రొఫెషనల్‌గా ఎదగగలరని నిపుణులు చెబుతున్నారు.

ఇవి కూడా చదవండి :