గ్యాస్ సిలిండర్ వాడుతున్నారా?- ఈ జాగ్రత్తలు పాటించకపోతే ముప్పు తప్పదట!

-సిలిండర్ కన్నా గ్యాస్ స్టవ్ ఎత్తులో ఉండాలట! -గ్యాస్ వాడేటప్పుడు తీసుకోవాల్సిన జాగ్రత్తలు!

LPG Gas Cylinder Safety Precautions: ప్రస్తుతం ప్రతి ఇంట్లో ఎల్​పీజీ గ్యాస్ సిలిండర్లను తప్పక వాడుతుంటారు. ఇది ఎంత ఉపయోగకరమో.. అజాగ్రత్తగా వ్యవహరిస్తే అంతే ప్రమాదమని నిపుణులు చెబుతున్నారు. గ్యాస్ సిలిండర్లను ఉపయోగించేటప్పుడు కొన్ని జాగ్రత్తలు తీసుకోకపోవటం వల్ల భారీ ప్రమాదాలు జరిగే అవకాశం ఉందని హెచ్చరిస్తున్నారు. ఈ నేపథ్యంలో సిలిండర్ ఉపయోగించే క్రమంలో తీసుకోవాల్సిన జాగ్రత్తలు ఏంటో ఇప్పుడు తెలుసుకుందాం.

• గ్యాస్ సిలిండర్​ను ఎప్పుడూ నిలువుగానే ఉంచాలని నిపుణులు చెబుతున్నారు. ఎట్టిపరిస్థితుల్లోనూ అడ్డంగా పడుకోబెట్టకూడదని సూచిస్తున్నారు.
• ఇంకా స్టవ్​ను సిలిండర్ కంటే ఎత్తులో ఉంచి వంట చేయాలి.
• గ్యాస్​ను ఆన్ చేయడం, అగ్గి పుల్ల గీయడం లేదా లైటర్ అంటిచడం ఒకేసారి చేయాలి. ఆన్ చేశాక అగ్గి పుల్లని గీయకూడదు.
• గ్యాస్ పైపులకు ఎలాంటి జాయింట్లు ఉండకూడదు. ఇంకా ఒక కనెక్షన్​కు ఒక స్టవ్​ను మాత్రమే వినియోగించాలి.
• సిగరెట్లు, దీపాలు, కిరోసిన్ స్టవ్​లు, లాంతర్​లను సిలిండర్​కు దూరంగా ఉంచాలి.
• సిలిండర్ వినియోగించకపోతే గ్యాస్ ఉన్నా లేకున్నా.. మూత బిగించే ఉంచాలి. వినియోగిస్తున్నట్లైతే పని పూర్తవ్వగానే రెగ్యులేటర్ ఆఫ్ చేయాలి.
• ముఖ్యంగా బయటకు వెళ్తున్నప్పుడు, రాత్రి పడుకునే ముందు గ్యాస్ ఆఫ్​ చేశామో లేదో ఓసారి చెక్​ చేసుకుంటే మంచిది.
• గ్యాస్ ట్యూబ్లు కంపెనీవి మాత్రమే వినియోగించాలి. వీటిని 4-5 ఏళ్లకు ఒకసారి తప్పనిసరిగా మార్చాలి.
• వంట చేస్తున్న సమయంలో నూలు వస్త్రాలు, కాటన్ యాప్రాన్​లనే ధరించాలి. ముఖ్యంగా స్టవ్​ ఆన్​లో ఉంచి ఇతర పనులు చేయకూడదు.
• స్టవ్ లేదా కనెక్షన్ సమస్య వస్తే సొంతంగా రిపేర్ చేయకూడదు. సంబంధిత నిపుణులతో మాత్రమే రిపేర్ చేయించాలి.
• ఇంకా మీకు సిలిండర్​ను సరిగా అమర్చటం రాకుంటే సర్వీస్​ మ్యాన్ లేదా డెలివరీ పర్సన్​ సహాయం తీసుకోవాలి.
• సిలిండర్​ను గాలి, వెలుతురు బాగా తగిలే ప్రదేశంలోనే పెట్టాలి. ఒకవేళ కిచెన్ కబోర్డ్​లో ఉంచితే డోర్​ దిగువ, పై భాగాల్లో వెంటిలేషన్ ఉండేలా చూసుకోవాలి.
• ఇంకా డెలివరీ సమయంలో గ్యాస్ సిలిండర్ సీల్ సరిగ్గా ఉందో లేదో చెక్​ చేసుకోవాలి.
• పిల్లలను ఎప్పుడూ వంటగదికి, ఎల్​పీజీ సిలిండర్​కు దూరంగా ఉండేలా చూసుకోవాలి.
• ఒకవేళ ప్రమాదవశాత్తూ గ్యాస్ లీక్​ అయినట్లయితే కిటికీలను తెరచి, ఆ ప్రాంతాన్ని ఖాళీ చేసేయాలని నిపుణులు సూచిస్తున్నారు. వెంటనే LPG సప్లయర్ లేదా ఎమర్జెన్సీ సర్వీసులను సంప్రదించాలని సలహా ఇస్తున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.