5 నిమిషాల్లో అద్దిరిపోయే మిరియాల చారు - సీజనల్​ జ్వరాలకు సూపర్ రెమిడీ! - Miriyala Charu Recipe

How to Make Pepper Soup : వర్షాకాలం వచ్చేసింది. సీజన్ జ్వరాలు ఇబ్బంది పెడుతుంటాయి. దగ్గు, జలుబుతో పిల్లల నుంచి పెద్దల వరకు బాధపడుతుంటారు. ఇలాంటి సమయంలో.. మిరియాల చారు తీసుకుంటే ఎంతో ఉపశమనం లభిస్తుందని నిపుణులు చెబుతున్నారు. ఈ నేపథ్యంలో మిరియాల చారు ఎలా తయారు చేయాలో ఇప్పుడు చూద్దాం.

How to Make Miriyala Charu : తెలుగు రాష్ట్రాల్లో దాదాపుగా ప్రతి ఇంట్లోనూ మిరియాల చారు చేసుకుంటారు. ముఖ్యంగా వర్షాకాలంలో ఈ చారు కంపల్సరీగా చేసుకుంటారు. అద్భుతమైన రుచికోసమే కాకుండా.. జలుబు, దగ్గు వంటి సీజనల్ సమస్యల నుంచి కాపాడుకోవడానికి కూడా ఈ రెసిపీ చక్కగా పనిచేస్తుంది. అంతేకాదు.. ఈ మిరియాల చారు చేయడానికి ఎంతో సమయం పట్టదు. కేవలం 5 నిమిషాల్లోనే ఈ చారు సిద్ధమైపోతుంది. ఈ చారు కాంబినేషన్​లో బంగాళాదుంప ఫ్రై మొదలు.. ఏ వేపుడు అయినా చాలా టేస్టీగా ఉంటుంది. మటన్, చికెన్ వంటి నాన్​వెజ్​ వేపుళ్లు కూడా అద్భుతంగా ఉంటాయి. మరి.. ఇంతటి రుచికరమైన మిరియాల చారు ఎలా తయారు చేసుకోవాలో ఈ స్టోరీలో చూద్దాం.

కావాల్సిన పదార్థాలు..

• మిరియాలు - 1 టేబుల్ స్పూన్
• వెల్లుల్లి రెబ్బలు - 10 - 12
• జీలకర్ర - 1 టేబుల్ స్పూన్
• పెద్ద నిమ్మకాయ సైజు చింతపండు (నానబెట్టి రసం సిద్ధం చేసుకోవాలి)
• టమాటాలు - 4
• నూనె - 1 టేబుల్ స్పూన్
• పసుపు - పావు టేబుల్ స్పూన్
• ఎండు మిర్చి - 3
• ఆవాలు - 1 టేబుల్ స్పూన్
• కరివేపాకు - 3 - 4
• కొత్తిమీర – చిన్న కట్ట
• ఇంగువ - 2 చిటెకెలు
• ఉప్పు - రుచికి సరిపడా

తయారీ విధానం..

• ముందుగా.. మిరియాలు, జీలకర్ర, వెల్లుల్లి రోట్లో వేసి దంచుకోవాలి. అయితే.. మెత్తగా కాకుండా బరకగా నూరుకోవాలి.
• ఇప్పుడు స్టౌమిద గిన్నె పెట్టి.. అందులో ఆయిల్ వేసి వేడెక్కిన తర్వాత అందులో ఆవాలు, పసుపు, ఎండుమిర్చి వేసి వేగనివ్వాలి.
• తర్వాత టమాటా ముక్కలు అందులో వేసి, గుజ్జుగా అయ్యేదాక మగ్గినివ్వాలి.
• మగ్గిన తర్వాత చింతపండు రసం, దంచిపెట్టుకున్న మిరియాల మిశ్రమం, కరివేపాకు కొత్తిమీరా, ఉప్పు, ఇంగువ వేయాలి.
• ఇప్పుడు మీడియం ఫ్లేమ్ పైన ఒక పొంగు వచ్చే వరకు ఉంచి, ఆ వెంటనే దింపేసుకోవాలి. అంతే.. అద్భుతమైన మిరియాల రసం సిద్ధమైపోతుంది.
• ఈ మిరియాల చారు అన్నంతోపాటు ఇడ్లీ, వడ వంటి టిఫెన్​లోనూ సూపర్​గా ఉంటుంది.
• వర్షాకాలం సీజన్​లో జలుబు, దగ్గుతో బాధపడుతున్న వారు.. వడకట్టి ఛాయ్​ మాదిరిగా తాగితే ఎంతో రిలీఫ్​గా ఉంటుంది.
• మిరియాలు, జీలకర్ర, వెల్లుల్లిని రోటిలో దంచితేనే బాగుంటాయి. మిక్సీలో వేస్తే ఫ్లేవర్​ మిస్ అవుతుంది.
• ఇక.. కొత్తిమీర, కరివేపాకు కాడలతో సహా చారులో వేసేయాలి.
• అన్నిటికన్నా ముఖ్యమైనది.. చారు ఒక్క పొంగుతోనే దింపేసుకోవాలి. బాగా మరిగితే చారులోని సువాసన తగ్గిపోతుంది.