Apollo Ramchran Biopic : మెగా పవర్ స్టార్ రామ్ చరణ్ ఇప్పటి వరకైతే ఎవరి బయోపిక్లోనూ నటించలేదు. ఒకవేళ అలాంటి అవకాశం వస్తే, తాను స్పోర్ట్స్ పర్సన్ రోల్ చేయాలని ఉందంటూ ఆ మధ్య తన మనసులో మాటను బయట పెట్టారు. దీంతో టీమ్ ఇండియా స్టార్ క్రికెటర్ విరాట్ కోహ్లీ బయోపిక్ ఓకేనా అని అడగగా - ఛాన్స్ వస్తే తప్పకుండా చేస్తానని అన్నారు. అయితే తాజాగా రామ్చరణ్ ఓ బయోపిక్లో నటించడంపై ఉపాసన మాట్లాడారు. తన తాత బయోపిక్లో రామ్చరణ్ నటిస్తారా? అన్న విషయంపై ఆమె సమాధానమిచ్చారు.
'ప్రతాప్ రెడ్డి'గా రామ్ చరణ్ : రామ్ చరణ్ సతీమణి, ఎంట్రప్రెన్యూర్ ఉపాసన కామినేని కొణిదెల తాతయ్య ప్రతాప్ సి రెడ్డి. ఈయన గురించి చాలా మందికి తెలుసు. అపోలో హాస్పిటల్ వ్యవస్థాపకుడాయన. దేశ విదేశాల్లో అపోలో సేవలను విస్తరించారు. హెల్త్ కేర్ రంగంలో అరుదైన ఖ్యాతి గడించారు. ఎన్నో అవార్డులను అందుకున్నారు. ఫిబ్రవరి 5న ఆయన పుట్టినరోజు.
తాతయ్య పుట్టినరోజు సందర్భంగా 'ది అపోలో స్టోరీ' పేరుతో ఉపాసన ఓ పుస్తకాన్ని లాంఛ్ చేశారు. చెన్నైలో జరిగిన ఈ కార్యక్రమానికి ప్రతాప్ సి రెడ్డి కుటుంబ సభ్యులు కొందరు హాజరై సందడి చేశారు. అయితే ఈ పుస్తకావిష్కరణలో ఉపాసనకు ఓ ప్రశ్న ఎదురైంది. అదేంటంటే 'మీ తాతయ్య జీవితంపై బయోపిక్ ఏమైనా తీసే ఆలోచన ఉందా? సినిమా వస్తుందా?' అని అడగగా - 'భవిష్యత్తులో బయోపిక్ రావచ్చు' అని ఉపాసన పేర్కొన్నారు. 'ప్రతాప్ సి రెడ్డి పాత్రలో రామ్ చరణ్ నటించే అవకాశం ఉంటుందా?' అని అడగగా - 'అది డైరెక్టర్ విజన్పై ఆధారపడి ఉంటుంది' అని ఉపాసన చెప్పుకొచ్చింది.
ప్రస్తుతం రామ్ చరణ్ నటిస్తున్న సినిమాల విషయానికి వస్తే - దిగ్గజ దర్శకుడు శంకర్ దర్శకత్వంలో 'గేమ్ ఛేంజర్' అనే పొలిటికల్ యాక్షన్ డ్రమా చేస్తున్నారు. ఈ మూవీ షూటింగ్ దాదాపు చివరి దశకు చేరుకుంది. దసరాకు రిలీజయ్యే అవకాశం ఉంది. దీని తర్వాత 'ఉప్పెన' ఫేమ్ బుచ్చిబాబు సానా దర్శకత్వంలో మరో సినిమా చేయనున్నారు. ప్రీ ప్రొడక్షన్ వర్క్ పూర్తైంది. త్వరలోనే సెట్స్పైకి వెళ్లే అవకాశం ఉంది. స్పోర్ట్స్ డ్రామా నేపథ్యంలో ఇది తెరకెక్కనుందని సమాచారం.
SSMB 29 - వారిని పక్కన పెట్టేసిన జక్కన్న!
కొత్త ప్రపంచంలోకి 'తెలుగు సినిమా'- అప్కమింగ్ సినిమాలన్నీ ఆ జానర్లోనే!
