Reliance Disney Merger : రిలయన్స్ ఇండస్ట్రీస్‌కు చెందిన వయాకామ్‌ 18, ది వాల్ట్‌ డిస్నీ కంపెనీకి చెందిన స్టార్ ఇండియా ప్రైవేట్‌ లిమిటెడ్‌ వినోద వ్యాపారాలు లివీనం కానున్నాయి. ఈ విలీనానికి నేషనల్‌ కంపెనీ లా ట్రెబ్యునల్‌ (ఎన్సీఎల్టీ) శుక్రవారం ఆమోదం తెలిపింది. దీంతో రూ.70,000 కోట్ల విలువతో దేశంలోనే అతిపెద్ద మీడియా సామ్రాజ్యంగా వయాకామ్‌ 18 మారనుంది.
మీడియా ఆస్తుల విలీనానికి కాంపిటీషన్‌ కమిషన్‌ ఆఫ్‌ ఇండియా (సీసీఐ) ఇటీవల ఆమోదించింది. ఈ విలీనం అనంతరం జాయింట్ వెంచర్ ఏర్పాటు కానుందని సీసీఐకు సమర్పించిన నోటీసులో పేర్కొంది. ఈ లావాదేవీల వల్ల దేశంలోని పోటీ వ్యాపారాలపై ఎలాంటి ప్రభావం పడబోదని రిలయన్స్ వెల్లడించింది. సీసీఐ ఆమోదం పూర్తయిన రెండు రోజులకే ఎన్సీఎల్టీ సైతం పచ్చజెండా ఊపింది. రిలయన్స్ ఛైర్మన్‌ ముకేశ్‌ అంబానీ ఈ విషయంపై గురువారం ప్రస్తావించారు. రిలయన్స్, వాల్ట్‌ డిస్నీ వీడియా ఆస్తుల విలీనం, దేశంలో వినోద పరిశ్రమలో కొత్త శకానికి నాంది పలికిందని పేర్కొన్నారు. రిలయన్స్ కుటుంబంలోకి డిస్నీని స్వాగతిస్తూ, జియో, రిటైల్‌ వ్యాపారం లాగే ఈ మీడియా వ్యాపారం రిలయన్స్ గ్రూప్‌లో దూసుకెళ్తుందని ఆశాభావం వ్యక్తం చేశారు.
దేశంలో స్టార్ ఇండియా ప్రైవేట్‌ లిమిటెడ్‌ సంస్థ వివిధ టీవీ ఛానెళ్లతో పాటు, ఓటీటీ ప్లాట్‌ఫామ్‌ (డిస్నీ+హాట్‌స్టార్‌)ను నిర్వహిస్తోంది. వయాకామ్‌ 18 కూడా బ్రాడ్‌కాస్టింగ్‌ టెలివిజన్‌ ఛానెళ్ల వ్యాపారాలతో పాటుగా, ఓటీటీని (జియో సినిమా) కూడా నడుపుతోంది. దీంతోపాటు ప్రొడక్షన్‌, మోషన్‌ పిక్చర్స్‌ డిస్ట్రిబ్యూషన్‌లోనూ ఉంది. జాయింట్ వెంచర్‌ను ఏర్పాటుచేయాలని ఈ ఏడాది ఫిబ్రవరిలో రిలయన్స్, వాల్ట్‌ డిస్నీ ఓ ఒప్పందానికి వచ్చాయి. ఈ డీల్‌ పూర్తయితే వివిధ భాషల్లో వందకు పైగా ఛానెళ్లు, 2 ఓటీటీలు విలీన సంస్థ చేతిలో ఉండనున్నాయి. విలీనం అనంతరం ఈ జాయింట్ వెంచర్కు నీతా అంబానీ ఛైర్‌పర్సన్‌గా వ్యవహరిస్తారు. ఈ సంయుక్త సంస్థలో 63.13 శాతం వాటా రిలయన్స్‌కు, 36.84 శాతం వాటా డిస్నీకి వెళ్లనున్నాయి. విలీనం అనంతరం ఓటీటీ వ్యాపారాభివృద్ధికి రూ.11,500 కోట్లు రిలయన్స్ పెట్టుబడిగా పెట్టనున్నట్లు రిలయన్స్ ఇప్పటికే ప్రకటించింది.
దీపావళి నుంచి జియో ఏఐ క్లౌడ్, జియో బ్రెయిన్ - ఏఐ ఫోన్ కాల్స్ కూడా! - Jio AI Cloud Storage
రిలయన్స్, డిస్నీ డీల్‌ ఖరారు- 120 ఛానళ్లు ఒకే గొడుకు కిందకు
