సుందర్​ పిచాయ్​ చెప్పిన ఈ టిప్స్ పాటిస్తే - సాఫ్ట్​వేర్ జాబ్​ గ్యారెంటీ! - Sundar Pichai Advice To Engineers

Sundar Pichai's Advice To Engineers : ఆర్టిఫీషియల్ ఇంటెలిజెన్స్‌ రోజురోజుకూ పెరుగుతున్న నేపథ్యంలో సాఫ్ట్‌వేర్‌ ఇంజినీర్లకు గూగుల్‌ సీఈఓ సుందర్‌ పిచాయ్‌ కొన్ని మంచి సలహాలు అందించారు. అవేంటో ఇప్పుడు చూద్దాం.

Sundar Pichai's Advice To Engineers : ఆర్టిఫీషియల్‌ ఇంటెలిజెన్స్‌ (AI) వినియోగం రోజురోజుకీ విపరీతంగా పెరిగిపోతోంది. దీనితో సాఫ్ట్​వేర్ ఇంజినీర్లలో తీవ్రమైన ఆందోళన నెలకొంది. తమకు ఉద్యోగాలు రావని, ఉన్న ఉద్యోగాలు కూడా పోతాయోమోనని భయపడుతున్నారు. ఈ నేపథ్యంలో గూగుల్ సీఈఓ సుందర్​ పిచాయ్​ సాఫ్ట్​వేర్ ఇంజినీర్లకు కొన్ని కీలకమైన సూచనలు చేశారు. అవేంటో ఇప్పుడు చూద్దాం.

బట్టీ పట్టి చదవకండి!
విద్యార్థి దశలో ఉన్న వారెవరైనా రోట్​ లెర్నింగ్​కు అలవాటు పడకూదని అంటే బట్టి పట్టి చదవకూడదని సుందర్ పిచాయ్​ సూచించారు. ఇటీవల నిర్వహించిన ఓ ఇంటర్వ్యూలో, టాప్‌ టెక్‌ కంపెనీలు అయిన FAANG (ఫేస్‌బుక్, యాపిల్, అమెజాన్, నెట్‌ఫ్లిక్స్, గూగుల్) సంస్థల్లో యువతీ, యువకులు ఇంటర్వ్యూల్లో విజయం ఎలా సాధించాలి? ఉద్యోగం ఎలా సంపాదించాలి? అనే విషయాలపై సలహా ఇవ్వాలని ఇంటర్వ్యూయర్‌ సుందర్​ పిచాయ్‌ని కోరారు. దీనితో రోట్ లెర్నింగ్​ (బట్టీ పట్టి చదవడం) మంచిది కాదని సుందర్ పిచాయ్​ స్పష్టం చేశారు. ఏ విషయాన్ని అయినా లోతుగా అర్థం చేసుకోవాలని సూచించారు. అప్పుడే నిజమైన విజయం లభిస్తుందని పేర్కొన్నారు. కనుక ఇదే పద్ధతిని సాఫ్ట్​వేర్ ఇంజినీర్లు అందరూ పాటించాలని సుందర్ పిచాయ్ సూచించారు.

త్రీ ఇడియట్స్​ లాగా
ఏదైనా అంశాన్ని తెలుసుకోవడానికి, అర్థం చేసుకోవడానికి మధ్య చాలా వ్యత్యాసం ఉందని సుందర్ పిచాయ్​ పేర్కొన్నారు. ఈ వ్యత్యాసాన్ని వివరించేందుకు 'త్రీ ఇడియట్స్‌' సినిమాలోని ఓ సన్నివేశాన్ని ఆయన గుర్తుచేశారు. త్రీ ఇడియట్స్ సినిమాలోని ఓ సన్నివేశంలో 'వాట్​ ఈజ్​ ఏ మెషిన్?​' అని ప్రొఫెసర్​ ఓ విద్యార్థి(హీరో)ని అడుగుతారు. అప్పుడు అతను కంఠస్థం చేసిన డెఫినిషన్​ను చెప్పకుండా, సాధారణ పదాలతో యంత్రం అంటే ఏమిటో వివరిస్తాడు. అది ఏ విధంగా పనిచేస్తుందో తెలియజేస్తాడు. విషయాన్ని గ్రహించడమంటే ఇదే అని సుందర్ పిచాయ్​ అన్నారు.

‘‘ఎవరైనా సాంకేతికతను లోతుగా అర్థం చేసుకోవాలి. అలా చేస్తేనే సరిగ్గా పరివర్తన చెందగలరు. ఏదైనా సాధించగలరు అని నేను నమ్ముతాను’’ అని సుందర్​ పిచాయ్‌ అన్నారు.

ఆ ఫుడ్స్ అంటే చాలా ఇష్టం!
ఇదే ఇంటర్వ్యూలో ఇష్టమైన భారతీయ వంటకం ఏమిటని అడగగా, ప్రాంతాన్ని బట్టి తనకు వంటకాలు నచ్చుతాయని సుందర్​ పిచాయ్​ అన్నారు. "బెంగళూరులో ఉన్నప్పుడు దోశ బాగా తినేవాడిని. అది నాకు చాలా ఇష్టమైన టిఫిన్​. దిల్లీలో ఉన్నప్పుడు చోలే బటూరె బాగా ఇష్టంగా తినేవాడిని. ఇక ముంబయిలో అయితే పావ్‌ భాజీ చాలా బాగుంటుంది’’ అని చెప్పారు.