24வது கார்கில் போர் வெற்றி தின கொண்டாட்டம்... இந்திய ராணுவத்தின் ஆயுத கண்காட்சியை ரசித்த மக்கள்!

கார்கில் : 24வது கார்கில் போர் வெற்றி தினத்தை முன்னிட்டு இந்தியா ராணுவத்தின் ஆயுத கண்காட்சியை பள்ளி மாணவ மாணவியர்கள் பொது மக்கள் உள்ளிட்டோர் உற்சாகமாக கண்டு ரசித்தனர்.  

இந்தியப் பகுதியில் சட்டவிரோதமாக ஆக்கிரமிப்பு செய்த பாகிஸ்தான் படைகளை விரட்டியடித்த இந்திய ராணுவ வீரர்கள் கொண்டாடும் வகையிலும், நாட்டிற்காக போரில் உயிர் தியாகம் செய்த ராணுவ வீரர்களை நினைவு கூறும் வகையில் ஆண்டுதோறும் ஜூலை 26ஆம் தேதி கார்கில் போர் வெற்றி தினம் அல்லது கார்கில் விஜய் திவாஸ் கொண்டாடப்படுகிறது.  

இந்நிலையில் 24வது கார்கில் போர் வெற்றி தினத்தை முன்னிட்டு லடாக்கில் உள்ள கார்கிலில் இந்திய ராணுவத்தின் ஆயுதக் கண்காட்சி நடத்தப்பட்டது. மேக் இன் இந்தியா திட்டத்தில் உள்நாட்டு தொழில்நுட்பத்தில் தயாரிக்கப்பட்ட ஆயுதங்கள் பொது மக்கள் பார்வைக்கு காட்சிப்படுத்தப்பட்டன.  

கண்காட்சியை காணக் குவிந்த பள்ளி மாணவர்கள், பொது மக்கள் அனைவருக்கும் ஆயுதங்களை இயக்குவது உள்ளிட்ட பல்வேறு விளக்கங்களை இந்திய ராணுவ வீரர்கள் வழங்கினர். மேலும் பயங்கரவாத தடுப்பு நடவடிக்கை உள்ளிட்ட செயல்களை இந்திய ராணுவ வீரர்கள் நடித்து காட்டியதை பொது மக்கள், குழந்தைகள் கண்டு ரசித்தனர்.