மதுபோதையில் அதிவேகம்.. விபத்தில் சிக்கிய மாணவன் பலி.. பதைபதைக்கு வீடியோ!

சென்னை: அமைந்தகரை ஸ்கைவாக் அருகே நள்ளிரவில் அதிவேகமாக வந்த இருசக்கர வாகனம் ஒன்று கட்டுப்பாட்டை இழந்து அருகிலிருந்த நடைமேடையின் மீது மோதி விபத்துக்குள்ளானது. இந்த விபத்தில் தூக்கி வீசப்பட்ட வாகன ஓட்டி சம்பவ இடத்திலேயே உயிரிழந்தார். பின்னால் அமர்ந்து வந்த நபர் படுகாயங்களுடன் உயிர் தப்பினார். 

இதனைக் கண்ட அப்பகுதி மக்கள், இது குறித்து அண்ணா நகர் போக்குவரத்து புலனாய்வு பிரிவு காவல்துறைக்குத் தகவல் கொடுத்தனர். தகவலின் அடிப்படையில் சம்பவ இடத்திற்குச் சென்ற போலீசார், சம்பவ இடத்திற்குச் சென்று, இறந்தவரில் உடலைக் கைப்பற்றி, உடற்கூராய்வுக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர். மேலும் காயமடைந்த நபரைச் சிகிச்சைக்காக அனுமதித்துள்ளனர். 

இந்த விபத்து குறித்து வழக்குப் பதிவு செய்த காவல்துறையினர், இது தொடர்பாக விசாரணை மேற்கொண்டனர். விசாரணையில், உயிரிழந்த இளைஞர் தென்காசியைச் சேர்ந்த இப்ராஹிம் (21) என்பதும், பின்னால் அமர்ந்து வந்த நபர் சிவபாரதி என்பதும், கோவையில் உள்ள தனியார் கல்லூரியில் பி.ஏ ஆங்கிலம் மூன்றாமாண்டு படித்து வந்த இப்ராஹிம் நண்பரை பார்ப்பதற்காக வடபழனி வந்ததும் தெரியவந்தது. 

பின்னர் நண்பர்களுடன் சேர்ந்து மது அருந்திவிட்டு, இருசக்கர வாகனத்தில் அண்ணா நகரில் மற்றொரு நண்பரைச் சந்திப்பதற்காக சிவபாரதி உடன் இப்ராஹிம் சென்ற போது, அமைந்தகரை ஸ்கைவாக் அருகே  கட்டுப்பாட்டை இழந்து நடைமேடையில் மோதி தூக்கிவீசப்பட்டு உயிரிழந்திருப்பது தெரியவந்தது. 

மேலும் இந்த விபத்து தொடர்பான பதறவைக்கும் சிசிடிவி காட்சிகள் வெளியாகி உள்ளது. இந்த சிசிடிவி காட்சிகளை வைத்து போக்குவரத்து புலனாய்வு போலீசார் மேலும் விசாரணை நடத்தி வருகின்றனர்.