எளிய முறையில் குறட்டையை குறைக்கலாம்! ஆய்வுகள் என்ன சொல்கின்றன?

உறங்கும்போது பலருக்கும் ஏற்படும் பிரச்னை என்றால், அது குறட்டைதான்! அருகில் இருப்பவர்களுக்கும் சற்று அசௌகரியத்தை ஏற்படுத்தும் குறட்டையால், நமக்கு ஆரோக்கியமான தூக்கமும் இல்லாமல் நாளே சோர்வடைய வாய்ப்புகள் உள்ளன. இந்நிலையில், இந்தப் பிரச்னைக்கு தீர்வளிக்கும் எளிய வழியை ஆராய்ச்சியாளர்கள் கண்டுபிடித்துள்ளனர்.

தூக்கத்தில் குறட்டை விடுவது என்பது, நம்மில் பலருக்கும் சர்வ சாதாரணமாகிப்போன விஷயம். எனினும், இதனால் பலருக்கு தூக்கம் கெடுவது, உடல் ஆரோக்கியக் கேடு உள்ளிட்ட பல முக்கியப் பிரச்னைகள் எழுகின்றன.

அதிக சத்தமாக குறட்டை விடுவது ஸ்லீப் அப்னியா எனப்படும் தூக்க கோளாறுக்கு நம்மை இட்டுச் செல்லும். இந்தக் கோளாறு ஏற்பட்டால் மூச்சு விடும்போது சுவாசம் தடைப்பட்டு மீண்டும் தொடங்கும். இது மிகவும் ஆபத்தான உறக்கக் கோளாறு என்கின்றனர் ஆராய்ச்சியாளர்கள்.

குறட்டையை முடிந்த அளவிற்கு குறைக்க சமீபத்தில் ஆய்வுகளை நடத்தியுள்ள ஆராய்ச்சியாளர்கள், குறட்டை விடுவதை எளிய முறையில் குறைக்கும் வழிகளையும் தெரிவித்துள்ளனர்.

இந்த எளிய வழியைப் பின்பற்றுங்கள்!

குறட்டையை குறைக்க எளிய வழி ஒன்றை நேஷனல் சென்டர் ஃபார் பயோடெக்னாலஜி இன்பர்மேஷன் (National Center for Biotechnology Information) கண்டறிந்துள்ளது. ஒரு நாளைக்கு அதிக நேரம் நிற்கும்போது, உட்காரும்போது கால்களை நகர்த்திக்கொண்டே இருப்பதன் மூலம் இரவில் குறட்டை விடுவது குறைகிறதாம்.

அது எப்படி என்று கேட்கிறீர்களா? பதில் வைத்திருக்கிறார்கள் ஆராய்ச்சியாளர்கள். இந்த ஆய்வை நடத்த, தூங்கும்போது குறட்டை விடும் சுமார் 16 பேரை ஆராய்ச்சியாளர்கள் தேர்வு செய்துள்ளனர். அவர்களின் கால்களில் பின் பகுதியில் இருக்கும் திரவத்தின் அளவை குறித்து வைத்துள்ளனர்.

பின்பு அனைவரையும் நான்கு மணி நேரத்திற்கு உட்கார வைத்துள்ளனர். இதனைத் தொடர்ந்து, இரவில் அவர்களின் குறட்டைவிடும் நேரம் குறைந்துள்ளது. இரண்டாவதாக, பாதி பேரை தரையில் கால்களை அழுத்தமாக வைக்க அறிவுறுத்தியுள்ளனர். மீதி பாதி பேர் சாதாரணமாக அமர வைக்கப்பட்டனர். ஒரு வாரம் கழித்து மீண்டும் முதல் குழுவை சாதாரணமாக அமர வைத்துவிட்டு, இரண்டாவது குழுவினரை கால்களை தரையில் அழுத்தமாக வைக்கச் சொல்லியிருக்கின்றனர்.

இந்த இரு குழுவினரும் குறட்டைவிடும் நேரம் ஆரம்பத்திலிருந்து குறித்து வைக்கப்பட்டு வந்த நிலையில், ஆய்வு முடிவில் கால்களை தரையில் அழுத்தமாக வைத்திருந்தவர்களின் குறட்டை நேரம் வெகுவாகக் குறைந்திருந்ததை கண்டறிந்தனர்.

இது எவ்வாறு சாத்தியமானது என்றால், கால்களை சாதாரணமாக வைத்திருக்கும்போது திரவம் அதிகமாக கால்களின் பின் பகுதியில் தங்குகிறது. அதிகப்படியாக தங்கும் திரவம் உணவுக்குழாயை குறுக்குகிறது. இதனால் காற்று தொண்டையில் வேகமாகப் பயணிக்கிறது. இதன் காரணமாக ஏற்படும் அதிர்வால் நாம் குறட்டை விடுகிறோம். அதே சமயம், கால்களை அழுத்தமாக வைப்பதால் காலில் திரவம் தங்குவது குறைந்து, குறட்டை விடுவது கணிசமாகக் குறைகிறது.

இஞ்சி, தேன் டீ குடிங்க!

உறங்குவதற்கு முன்பாக ஒரு கப் இஞ்சி, தேன் கலந்த தேநீரை அருந்துவதால், குறட்டை விடுவதிலிருந்து நிவாரணம் பெறலாம். காரணம், இஞ்சி வாயில் உமிழ்நீர் சுரப்பதை அதிகரிக்கும். இதன் காரணமாக குறட்டை விடுவதால் ஏற்படும் அழற்சியில் இருந்து நிவாரணம் கிடைக்கிறது.

அன்னாசி, வாழை, ஆரஞ்சு!

அன்னாசி, வாழை, ஆரஞ்சுப் பழங்களில் உள்ள மேலாடோனின் (melatonin) உறக்கத்தைத் தூண்டும் தன்மையைக் கொண்டது. உறங்குவதற்கு முன்பாக இந்தப் பழங்களை சிறிதளவு எடுத்துக் கொண்டால் நல்ல உறக்கம் வரும். இதையும் கொஞ்சம் ட்ரை செய்து பாருங்கள்.

இதையும் படிங்க... இயர்ஃபோன் அதிகம் பயன்படுத்தும் நபரா நீங்கள்? இதை முதலில் தெரிஞ்சிக்கோங்க!