OAS1 எனப்படும் இந்த மரபணு மாறுபாடு, ஒட்டுமொத்த மக்கள்தொகையில் 3-6 விழுக்காடு நபர்களில் அல்சைமர் நோய் அபாயத்தை அதிகரிக்கிறது. இதே மரபணு மாறுபாடு, கடும் கரோனா பாதிப்புகளையும் ஏற்படுத்தவல்லது.
இது குறித்து பேசியுள்ள குயின் ஸ்கொயர் இன்ஸ்டிடியூட் ஆப் நியூரோலஜியின் முன்னணி நரம்பியல் மருத்துவரும் எழுத்தாளருமான டெர்விஸ் சாலிஹ், "அல்சைமர்ஸ், மூளைப் பகுதியில் தீங்கு விளைவிக்கும் வகையில் தேங்கும் அமிலாய்டு புரதத்தால் தோன்றுகிறது. கடுமையான கரோனா தொற்று உள்ள நோயாளிகளுக்கு மூளையில் வீக்கம் ஏற்படலாம்.
அல்சைமர்ஸ், கரோனா ஆகிய இரண்டு நோய்களிலும் நோயெதிர்ப்பு மண்டலத்தில் ஏற்படும் பொதுவான மாற்றங்கள் சிலவற்றை நாங்கள் கண்டறிந்துள்ளோம். அல்சைமர்ஸ், கரோனா இரண்டின் அபாயங்களையும் அதிகரிக்கக்கூடிய, நோயெதிர்ப்பு மண்டலத்தில் அதிக எதிர்வினையாற்றும் மரபணு ஒன்றை நாங்கள் அடையாளம் கண்டறிந்துள்ளோம்" என மருத்துவ இதழ் ஒன்றில் அவர் தெரிவித்துள்ளார்.
இது குறித்து தெரிவித்துள்ள ஆராய்ச்சிக் குழு, ”இந்த மரபணுவுக்கும் அல்சைமர்க்கும் இடையேயான தொடர்பு குறித்து கண்டறிய, 2,547 நபர்களிடமிருந்து மரபணு தரவுகளை வரிசைப்படுத்தினோம். அவர்களில் பாதி நபர்களுக்கு மூளைக் கோளாறு இருந்தது குறிப்பிடத்தக்கது.
இவர்களில் OAS1 எனப்படும் குறிப்பிட்ட மரபணுவின் rs1131454 எனப்படும் குறிப்பிட்ட மாறுபாடு உள்ளவர்களுக்கு அல்சைமர்ஸ் நோய் வருவதற்கான வாய்ப்புகள் அதிகம் உள்ளது கண்டறியப்பட்டுள்ளது.
இவர்களுக்கு அல்சைமர்ஸ் நோய்க்கான ஆபத்து 11-22 விழுக்காடு அதிகமாக உள்ளது. வயதுக்கு ஏற்ப OAS1இன் செயல்பாடு மாறுகிறது. அல்சைமர்ஸ், கோவிட் -19 மற்றும் பிற தொடர்புடைய நோய்களால் ஏன் வயதானவர்கள் அதிகம் பாதிக்கப்படுகின்றனர் என்பதைப் புரிந்துகொள்ள மேலும் ஆராய்ச்சிகள் தேவை” என்றும் தெரிவித்துள்ளனர்.
இதையும் படிங்க: குழந்தைகளின் மனத்திடத்தை காக்க உதவும் காய்கறி, பழ வகைகள்!
