கல்லூரி மாணவிகளை தவறாக வழிநடத்த முயன்றதாக அருப்புக்கோட்டை தனியார் கல்லூரி உதவி பேராசிரியையாக இருந்த நிர்மலா தேவி கடந்த ஆண்டு ஏப்ரல் 16 ஆம் தேதி கைது செய்யப்பட்டார். பின்னர் நீதிமன்றத்தில் ஆஜர்படுத்தப்பட்டு மதுரை பெண்கள் சிறையில் அடைக்கப்பட்டார்.
இந்நிலையில் நிர்மலா தேவிக்கு ஜாமின் வழங்க உத்தரவிடக்கோரி மதுரை உயர்நீதிமன்ற கிளையில் வழக்கு தொடரப்பட்டது. கடந்த மார்ச் 12 ஆம் தேதி இந்த வழக்கை விசாரித்த நீதிபதிகள் கிருபாகரன், எஸ்எஸ் சுந்தர் ஆகியோர் அடங்கிய அமர்வு, சில நிபந்தனைகளுடன் நிர்மலாதேவிக்கு ஜாமின் வழங்க உத்தரவிட்டனர். வழக்கு விசாரணைக்கு இடையூறு ஏற்படும் வகையில் ஊடகங்களுக்கு பேட்டி அளிக்ககூடாது என உயர்நீதிமன்றம் நிபந்தனை விதித்துள்ளது.
ஆனால் நிர்மலா தேவிக்கு யாரும் ஜாமின் கொடுக்க முன்வரவில்லை. ஜாமின் கொடுக்கக் கூடாது என நிர்மலாதேவியின் உறவினர்கள் மிரட்டப்படுவதாகவும் புகார் எழுந்தது. இந்நிலையில் நிர்மலாதேவியின் சகோதரர் ரவி, குடும்ப நண்பர் மாயாண்டி ஆகியோர் ஜாமின் அளிக்க முன்வந்தனர். இவர்களின் உத்தரவாத கடிதங்களை ஏற்று விருதுநகர் மாவட்ட முதலாவது குற்றவியல் நடுவர் நீதிபதி மும்தாஸ், நிர்மலாதேவியை ஜாமினில் விடுவிக்க உத்தரவிட்டார்.
இதனிடையே இன்று செய்தியாளர்களிடம் பேசிய நிர்மலா தேவியின் வழங்கறிஞர் பசும்பொன் பாண்டியன், மதுரை சிறையில் இருந்து நாளை நிர்மலா தேவி ஜாமினில் வெளிவர உள்ளதாக தெரிவித்தார்.
