தேர்தல் நாள் நெருங்கும் நிலையில் விருதுநகர் மாவட்டம் சாத்தூர் தொகுதியில் பண பட்டுவாடா செய்வதாக சாத்தூர் துணை வட்டார வளர்ச்சி அலுவலர் உஷாவிற்கு ரகசிய தகவல் கிடைத்தது. தொடர்ந்து அவர் தலைமையிலான பறக்கும் படை குழுவினர், மேலக்காந்தி நகரில் சோதனையில் ஈடுபட்டனர்
அப்போது சாத்தூரைச் சேர்ந்த வெயிலா (50) வாக்காளர்களுக்கு பணம் கொடுக்க முயன்றபோது, கையும் களவுமாக பிடிப்பட்டார். அவரிடமிருந்த 42 ஆயிரத்து 300 ரூபாய் பணத்தைப் பறிமுதல் செய்த பறக்கும் படையினர், அவரை சாத்தூர் காவல் நிலையத்தில் ஒப்படைத்தனர். இவர் அதிமுக மகளிரணி அமைப்பு நிர்வாகி உள்ளார்.
இதைப் போலவே குருலிங்காபுரம் பகுதியைச் சேர்ந்த இன்பராஜ் (50) என்பவர் வாக்காளர்களிடம் பணம் கொடுக்கும்போது, சாத்தூர் நகர காவல் துறையினர் அவரை கைது செய்தனர். அவரிடம் இருந்த ரூபாய் இரண்டாயிரத்தைப் பறிமுதல் செய்து, வழக்குப் பதிவும் செய்துள்ளனர்.
சாத்தூர் அருகே முத்தார்பட்டி பேருந்து நிறுத்தத்தில் திமுகவை சேர்ந்த அழகன் (60), அழகர்சாமி(40), முருகேசன் (30) ஆகியோர் பணத்துடன் இருப்பதாக இருக்கன்குடி காவல் துறைக்கு தகவல் வந்தது. அவர்களை சோதனை செய்த காவல் துறையினர் ரூபாய் 58 ஆயிரம் பணத்தையும், பெயர் பட்டியலையும் பறிமுதல் செய்து, அவர்களை கைது செய்தனர்.
படந்தால் கிராமத்தை சேர்ந்த பெரியபாண்டி என்பவரிடம் அதிமுகவிற்கு ஒட்டு போட சொல்லி, அதே பகுதியை சங்கர் ரூபாய் 2000 ஆயிரத்தை கொடுத்துள்ளார். அப்போது அங்கு வந்த பறக்கு படையினரைக் கண்டு சங்கர் ஓட்டம் பிடித்தார். இதையடுத்து, தேர்தல் பறக்குபடை குழு தலைமை அலுவலர் சசிகலாவிடம் பெரியபாண்டி அந்தப் பணத்தை ஒப்படைத்தார். டவுன் காவல் துறையினர் சங்கர் மீது வழக்குப் பதிவு செய்தனர்.
இதையும் படிங்க:'ஈ'க்கள் இம்சையால் தேர்தலைப் புறக்கணிக்கும் மக்கள்!
