விருதுநகரில் ஆசிரியையிடம் 5 பவுன் தாலி செயின் பறிப்பு!

விருதுநகர்: பேருந்து நிலையத்திற்கு நடந்து சென்ற ஆசிரியையிடம், பைக்கில் வந்த அடையாளம் தெரியாத நபர்கள் 5 புவன் தங்க செயினை பறித்து சென்ற சம்பவம் பரபரப்பை ஏற்படுத்தியுள்ளது.

விருதுநகர் அல்லம்பட்டியைச் சேர்ந்தவர் வேலுமணி (58), திருமங்கலம் அரசுப் பள்ளியில் ஓவிய ஆசிரியையாக பணிபுரிந்து வருகிறார். இவர், இன்று காலை விருதுநகர் அருப்புக்கோட்டை சாலை மேம்பாலம் அருகே கருமாதிமடம் பேருந்து நிறுத்தத்திற்கு பேருந்தில் ஏறுவதற்காக நடந்து சென்று கொண்டிருந்தார்.

அப்போது, பின்னால் இருசக்கர வாகனத்தில் வந்த இருவர் 5 பவுன் தாலி செயினை பறித்துவிட்டு தப்பிச்சென்றனர். இது குறித்து வேலுமணி உடனடியாக பஜார் காவல் நிலையத்தில் புகார் அளித்தார். புகாரின் பேரில் வழக்குப்பதிவு செய்த காவல் துறையினர், தப்பி சென்ற குற்றவாளிகளை சிசிடிவி காட்சிகளின் அடிப்படையில் தேடி வருகின்றனர்.