மருத்துவம் பயில தவித்த ஏழை மாணவன் - கை கொடுத்த சமூக வலைதளம்!

விழுப்புரம் : உளுந்தூர்பேட்டை அருகே மருத்துவப் படிப்புக்கு பணம் இல்லாமல் தவித்த கூலித் தொழிலாளியின் மகனுக்கு சமூக வலைதளங்கள் மூலம் ரூபாய் ஐம்பதாயிரம் நிதி கிடைத்துள்ளது.

விழுப்புரம் மாவட்டம் உளுந்தூர்பேட்டை அருகே உள்ள வடகுரும்பூர் கிராமத்தைச் சேர்ந்தவர் சக்கரவர்த்தி (50). கூலி வேலை செய்து வரும் இவர் புற்றுநோயால் பாதிக்கப்பட்டு சிகிச்சைப் பெற்று வருகிறார். கூலித்தொழிலாளி சக்கரவர்த்தியின் மகன் மணிகண்டன் நல்ல முறையில் படித்ததால் பன்னிரெண்டாம் வகுப்பு பொதுத்தேர்வில் சிறப்பான மதிப்பெண் பெற்றார். இதைத் தொடர்ந்து நீட் தேர்வில் தேர்ச்சி பெற்று, சிவகங்கையில் உள்ள அரசு மருத்துவக் கல்லூரியில் படிக்க இடம் கிடைத்தது.

இதனைத் தொடர்ந்து கடந்த 2014ஆம் ஆண்டு சிவகங்கை அரசு மருத்துவக் கல்லூரியில் சேர்ந்த மணிகண்டன் முதலாம் ஆண்டு படிக்கும் பொழுது தனது குடும்பத்தினர், உறவினர்கள் உதவியோடு கல்விக் கட்டணம், தேர்வுக் கட்டணம் ஆகியவற்றை கட்டி படித்து வந்தார்.

ஆனால், தற்போது இரண்டாம் ஆண்டிற்கான கல்விக் கட்டணம், தேர்வுக் கட்டணம் செலுத்த பணம் இல்லாத நிலையில் இருந்து வந்துள்ளார். இதனால், மணிகண்டன் 'தனது கல்வியைத் தொடர தனக்குப் பணம் தந்து உதவுங்கள்' என என சமூக நல அமைப்பினரை நாடியுள்ளார். பின்பு, இது குறித்த தகவல் வாட்ஸ்அப், சமூக வலைதளங்களில் பரவியது.

இதனைத் தொடர்ந்து உளுந்தூர்பேட்டையில் உள்ள பல்வேறு சமூக நல அமைப்பினரும் சேர்ந்து சமூக வலைதளங்களின் மூலம் ரூபாய் ஐம்பதாயிரம் பணத்தைத் திரட்டி ஒன்று சேர்த்தனர். பின்பு, பணத்தை மாணவன், பெற்றோர்களிடம் உளுந்தூர்பேட்டை அரசு ஆண்கள் மேல்நிலைப் பள்ளியில் வைத்து வழங்கப்பட்டது.

மேலும், இந்த மாணவனின் கல்விக்காக விழுப்புரம் மாவட்ட காவல் துறை கண்காணிப்பாளர் ஜெயக்குமார் தனது பங்கிற்கு ரூபாய் ஆயிரம் ரொக்கப் பணமாக வழங்கியுள்ளார்.

அதேபோல், மாணவன் தொடர்ந்து கல்வி பயில விழுப்புரம் மாவட்ட ஆட்சியர் சுப்பிரமணியன் வங்கிகள் மூலம் கல்விக் கடன் வழங்க ஏற்பாடு செய்துள்ளதாகத் தெரிவித்துள்ளார்.

இதையும் படிங்க : மாநில குத்துச்சண்டை போட்டிக்குத் தேர்வான அரசு பள்ளி மாணவர்