"எந்த தேர்தலிலும் யாருக்கும் ரஜினியின் ஆதரவு கிடையாது" - சொல்கிறார் ரஜினியின் சகோதரர் சத்திய நாராயண ராவ்!

Rajinikanth: சந்திராயன் 3 திட்ட இயக்குனர் வீரமுத்துவேல் தந்தை பழனிவேலுவை சந்தித்த நடிகர் ரஜினிகாந்தின் சகோதரர் சத்யநாராயணராவ் நாடாளுமன்ற தேர்தல் மட்டுமல்ல இனி வரும் எந்த தேர்தலிலும் யாருக்கும் ரஜினியின் ஆதரவு தெரிவிக்க மாட்டார் என்று தெரிவித்தார்.

விழுப்புரம்: சந்திரனில் காலடி தடம் பதித்த நான்காவது நாடு மற்றும் தென் துருவத்தில் முதலாவதாக காலடி பதித்த நாடு இந்தியா என்கிற பெருமையுடன் சந்திராயன் மூன்று (chandraayan 3) விண்கலம் தற்போது நிலவில் தன்னுடைய ஆராய்ச்சி பணிகளை திறம்பட செய்து வருகிறது.

நேற்றைய தினம் (ஆகஸ்ட். 29) கந்தகம், இரும்பு, மற்றும் ஆக்சிஜன் போன்ற தனிமங்கள் இருப்பதனை தன்னுடைய ஆராய்ச்சி மூலமாக உலக விஞ்ஞானிகளுக்கு தெரிவித்த சந்திராயன் 3 ரோவர் கருவிக்கு உலகம் முழுவதும் இணையத்தில் பாராட்டுக்கள் குவிந்து வருகின்றன.

இத்தகைய வரலாற்று சிறப்புமிக்க விஞ்ஞான ஆராய்ச்சிக்கு இந்தியாவின் இப்போதைய ஆராய்ச்சி நிலையத்தில் சந்திராயன் 3 வெற்றிக்கு முதன்மை மூளையாக செயல்பட்டவர் திட்ட இயக்குனர் விழுப்புரத்தில் சேர்ந்து பி வீர முத்துவேல். அவர்களுக்கு பிரதமர் மோடி, தமிழ்நாடு முதலமைச்சர் ஸ்டாலின், உயர் கல்வித்துறை அமைச்சர் பொன்முடி, மற்றும் சிறுபான்மை மற்றும் வெளிநாடு வாழ் நலத்துறை அமைச்சர், சட்டமன்ற உறுப்பினர்கள், முக்கிய நிர்வாகிகள் இந்திய மற்றும் சினிமா பிரபலங்கள், தொழிலதிபர்கள் என அனைவரும் பாராட்டுகளை தெரிவித்தனர்.

இதனை தொடர்ந்து அவருடைய தந்தையான பழனிவேலை நேரில் சந்தித்து பலரும் பாராட்டு தெரிவித்து வருகின்றனர். இதன் ஒரு பகுதியாக விழுப்புரம் திரு.வி.கா பகுதியில் வசித்து வரும் பழனிவேலை இன்று (ஆகஸ்ட். 30) நடிகர் ரஜினிகாந்தின் சகோதரர் சத்ய நாராயனண் ராவ் நேரில் சந்தித்து வாழ்த்துக்களை தெரிவித்தார்

இதனை தொடர்ந்து செய்தியாளர்களுக்கு பேட்டியளித்த ரஜினிகாந்த் அண்ணன் சத்திய நாராயணன் ராவ், "இந்தியாவிற்கு பெருமை சேர்க்கும் விதமாக பழனிவேல், தன் மகனை பெற்றுள்ளதாகவும், அவரின் ஆசிர்வாதம் தங்களுக்கு வேண்டும் என்றும் கூறினார். ஜெயிலர் படம் மிகப்பெரிய வெற்றி பெற்றுள்ளதாகவும் திரையரங்குகளில் இன்றும் கூட்டம் அதிகரித்து காணப்படுவதாக தெரிவித்தார்.

மேலும் இனி வரவிருக்கும் ரஜினி படங்கள் வெற்றி பெறும் எனவும், விரைவில் வெளியாகவுள்ள லால் சலாம் திரைப்படம் மிகப்பெரிய அளவில் வெற்றி பெறும் என தெரிவித்தார். மேலும் நாடாளுமன்ற தேர்தல் மட்டுமல்ல இனி வரும் எந்த தேர்தலிலும் யாருக்கும் ரஜினியின் ஆதரவு கிடையாது என்றார்.

உத்தரபிரதேச முதலமைச்சர் யோகி ஆதித்யநாத் காலில் விழுந்து ரஜினி ஆசிர்வாதம் பெற்றது குறித்த செய்தியாளரின் கேள்விக்கு பதிலளித்த ரஜினியின் சகோதரர், ரஜினிக்கும், யோகி ஆதித்யநாத் ஆகிய இருவருக்கும் பல வருடங்களாக பழக்கம் உள்ளதால் மடங்களுக்கு செல்வது, பாபாவை தரிசனம் செய்வது, இமயமலை செல்வது போன்ற செயல்களை ரஜினி வழக்கமாக வைத்துள்ளார். அதன் அடிப்படையில் தான் யோகி ஆதித்யநாத் காலில் ரஜினி விழுந்து ஆசிர்வாதம் பெற்றார் என்று கூறினார்.

இதையும் படிங்க: சந்திரயான் நாயகன் வீட்டிற்கு சென்ற அமைச்சர் பொன்முடி -வீரமுத்துவேலின் தந்தையை பாராட்டி வாழ்த்து!