விழுப்புரம் மாவட்டம் கள்ளக்குறிச்சி அருகே தியாகத்துருகம் புறவழிச்சாலையில் சென்னையிலிருந்து கோவையை நோக்கி தனியார் சொகுசுப் பேருந்து ஒன்று சென்றுகொண்டிருந்தது. இப்பேருந்துக்கு முன்னால் கம்பி ஏற்றிக் கொண்டு லாரி ஒன்று சென்றுகொண்டிருந்தது.
இந்நிலையில் தனியார் சொகுசுப் பேருந்து லாரியை முந்த முயன்றபோது எதிர்பாராதவிதமாக லாரியின் பின் பக்கத்தில் மோதி விபத்துக்குள்ளானது. இந்த விபத்தில் பேருந்தின் முன்பக்கத்தில் அமர்ந்திருந்த சேலம் ஆத்தூரைச் சேர்ந்த வினோத், ஈரோட்டைச் சேர்ந்த முகமது ஜில்பர், அடையாள தெரியாத ஒருவர் என மூவர் நிகழ்விடத்திலேயே பலியாகினர்.
மேலும் பேருந்தில் பயணம் செய்த பத்துக்கும் மேற்பட்டோர் கள்ளக்குறிச்சி அரசு மருத்துவமனையில் சிகிச்சை பெற்றுவருகின்றனர். இது குறித்து தகவல் அறிந்த காவல் துறையினர், தீயணைப்புத் துறையினர் நிகழ்விடத்திற்கு வந்து பலியானவர்களின் உடல்களை மீட்டு உடற்கூறாய்வுக்காக அரசு மருத்துவமனைக்கு அனுப்பிவைத்தனர்.
மேலும் இந்த விபத்து குறித்து காவல் துறையினர் வழக்குப்பதிவு செய்து விசாரணை மேற்கொண்டுவருகின்றனர். இந்த விபத்து காரணமாக அப்பகுதியில் அரை மணி நேரம் போக்குவரத்து பாதிக்கப்பட்டது.
