வேலூர் மாவட்டம் குடியாத்தத்தை அடுத்த குடிமிப்பட்டியில் விவசாயி ஒருவர், தன்னுடைய நிலத்துக்குள் வன விலங்குகள் வருவதைத் தடுக்க சட்டவிரோதமாக மின்வேலி அமைத்துள்ளார். நேற்று முன்தினம் இரவு அந்த மின்வேலியில் சிக்கி காட்டுயானை ஒன்று இறந்துள்ளது. மறுநாள் காலையில் இறந்து கிடந்த யானையைப் பார்த்த அந்த நிலத்தின் குத்தகையாளர் யாருக்கும் தெரியாமல் அதன் மீது தென்னை ஓலைகளை போட்டு மூடி வைத்துள்ளார்.
அதோடு மட்டுமல்லாமல் நேற்று மாலை அந்தப்பகுதியில் ஜேசிபி இயந்திரம் மூலம் குழிதோண்டி, அதில் யானையை புதைத்துள்ளார். இந்தத் தகவல் மாவட்ட ஆட்சியர் சண்முகசுந்தரம், மாவட்ட வன அலுவலர் பார்கவ் தேஜா ஆகியோருக்கு தெரியவந்தது. இதுகுறித்து நடவடிக்கை எடுக்க அவர்கள் வனத்துறை அதிகாரிகளுக்கு உத்தரவிட்டனர். அதன்பேரில் சம்பவ இடத்துக்கு விரைந்த வனத்துறையினர், வருவாய்த்துறையினர் ஆகியோர் நடத்திய விசாரணையில் யானை புதைக்கப்பட்டது உறுதியானது.
இதையடுத்து அந்த இடம் இன்று தோண்டப்பட்டு, யானையின் உடல் வெளியே எடுக்கப்பட்டது. பின்னர், கால்நடை மருத்துவரால் உடற் கூறாய்வு செய்யப்பட்டு, அதே இடத்தில் யானை அடக்கம் செய்யப்பட்டது. மேலும் இதுகுறித்து வழக்குப்பதிவு செய்த காவல் துறையினர் ஜேசிபி இயந்திரத்தை பறிமுதல் செய்து மூன்று பேரை கைது செய்து விசாரணை மேற்கொண்டு வருகின்றனர்.
இதையும் படிங்க: 'சிங்கிளாக வலம்வரும் ஒற்றைக்கொம்பனை அதன் கூட்டத்தோடு சேர்த்துவிடுங்க'
