திருப்பத்தூர் மாவட்டம் நாட்டறம்பள்ளி அடுத்த முத்தனப்பள்ளி கிராமப் பகுதியில் கடந்த ஒரு வருடமாக குடிநீர் விநியோகம் தடைபட்டதால் திடீரென்று 100-க்கும் மேற்பட்டோர் காலிக்குடங்களுடன் டோல்கேட் - பச்சூர் செல்லும் சாலையில் ஆஞ்சநேயர் கோயில் அருகில் சாலையில் மறியல் போராட்டத்தில் ஈடுபட்டனர்.
பலமுறை அலுவலர்களிடம் மனு அளித்தும் குடிநீர் கிடைக்காததால் ஆத்திரத்தில் அனைவரும் சாலை மறியல் போராட்டத்தில் ஈடுபட்டனர்.
இதனால் ஒரு மணி நேரத்திற்கும் மேலாக போக்குவரத்து தடைபட்டது. விரைந்துவந்த நாட்டறம்பள்ளி காவல் துறையினர் பொதுமக்களுடன் பேச்சுவார்த்தை நடத்தி ஒருவார காலத்திற்குள் குடிநீர் பிரச்சனை சரி செய்யப்படும் என்று கூறியதன் அடிப்படையில் அனைவரும் கலைந்துசென்றனர். இதனால் சிறிது நேரம் அப்பகுதியில் பரபரப்பு காணப்பட்டது.
இதையும் படிங்க: அண்ணா பல்கலைக்கழக பெயரை மாற்ற எதிர்ப்பு - ஆளுநருக்கு பேராசிரியர்கள் கடிதம்
