வேலூர் மாவட்டம் மூன்றாக பிரிக்கப்பட்டு ராணிப்பேட்டை, திருப்பத்தூர் ஆகிய மூன்று புதிய மாவட்டங்கள் உருவாக்கப்பட்டுள்ளன. இதில் ராணிப்பேட்டை மாவட்ட தொடக்க விழா இன்று நடைபெற்றது. இதில் முதலமைச்சர் எடப்பாடி பழனிசாமி கலந்துகொண்டு புதிய மாவட்டத்தை தொடக்கி வைத்து புதிய திட்ட பணிகளுக்கு அடிக்கல் நாட்டினார். தொடர்ந்து ரூ.90 கோடி மதிப்பில் நலத்திட்ட உதவிகளை முதலமைச்சர் வழங்கினார். நிகழ்ச்சியில் துணை முதலமைச்சர் ஓ. பன்னீர்செல்வம் உள்ளிட்ட அமைச்சர்கள் கலந்துகொண்டனர்.
இந்த நிகழ்ச்சியில் முதலமைச்சர் எடப்பாடி பழனிசாமி பேசுகையில், ‘ஆங்கிலேயர் ராணுவத்தில் இடம் பெற்ற பெரிய குதிரைப்படை ராணிப்பேட்டையில் தான் நிறுத்தப்பட்டது. இந்த மாவட்டத்தில் உள்ள வாலாஜா தான் தமிழ்நாட்டின் முதல் நகராட்சி ஆகும். இத்தனை சிறப்புமிக்க ராணிப்பேட்டைக்கு இன்று மேலும் ஒரு சிறப்பு. ஒரு லட்சத்துக்கும் அதிகமானோருக்கு நேரடியாகவும் மறைமுகவாகவும் வேலை வழங்கும் மாவட்டமாக உள்ளது. இன்னும் பல சிறப்புகளை எதிர்காலத்தில் இந்த மாவட்டம் பெறும்.
உள்ளாட்சித் தேர்தல் நடைபெறாது என்று போகும் இடங்களில் எல்லாம் ஸ்டாலின் பொய் கூறி வருகிறார். நிச்சயமாக உள்ளாட்சித் தேர்தல் நடைபெறும். அதற்கான அனைத்து பணிகளையும் தேர்தல் ஆணையம் மேற்கொண்டு வருகிறது. அதிமுக எந்த காலத்திலும் எந்த தேர்தலையும் கண்டு அஞ்சியது இல்லை.
தேர்தலை எப்படியாவது நிறுத்த வேண்டும் என ஸ்டாலின் முயற்சிக்கிறார். இந்த ஆட்சியில் 10 லட்சம் பேருக்கு வேலைவாய்ப்பு உருவாக்க உள்ளோம். இந்தியாவிலேயே முதன்மை தொழில் மாநிலமாக தமிழ்நாடு உருவாக உள்ளது’ என்று பேசினார்.
இதையும் படிங்க: உள்ளாட்சித் தேர்தல்: அங்கீகரிக்கப்பட்ட கட்சியினருடன் தேர்தல் ஆணையம் ஆலோசனை
