வேலூர்: முத்துரங்கம் அரசு கலை மற்றும் அறிவியல் கல்லூரியில், "சட்டமன்ற நாயகர் கலைஞர்" என்ற தலைப்பில் மாணவர்களுக்கான கருத்தரங்கம் இன்று (டிச.12) நடைபெற்றது. முத்துரங்கம் அரசினர் கலைக்கல்லூரி முதல்வர் மலர் தலைமையில் நடைபெற்ற கருத்தரங்கில், வேலூர் மாவட்ட ஆட்சியர் குமாரவேல் பாண்டியன், தமிழக சட்டமன்ற பேரவை துணை சபாநாயகர், கு.பிச்சாண்டி ஆகியோர் கலந்துகொண்டு சிறப்புரை ஆற்றினார்.
இந்த கருத்தரங்கில், வேலூர் மாவட்டத்தில் உள்ள பல்வேறு கல்லூரிகளைச் சேர்ந்த மாணவர்கள் கலந்து கொண்டு, "சட்டமன்ற நாயகர் கலைஞர்" என்ற தலைப்பில் பேசினர். இதில், சிறப்பாக பேசிய மாணவர்களுக்கு சட்டமன்ற துணை சபாநாயகர் கு.பிச்சாண்டி பரிசுகளை வழங்கினார்.
பின்னர், பேசிய துணை சபாநாயகர் கு.பிச்சாண்டி, "முன்னாள் முதலமைச்சர் கருணாநிதி ஆட்சிக்காலத்தில் தமிழக வளர்ச்சிக்கு கொண்டுவந்த திட்டங்கள் ஏழை எளிய மக்களுக்கானதாக இருந்தது. ஒட்டுமொத்த இந்தியாவில் கல்வி வளர்ச்சியில் மற்ற மாநிலங்களைவிட தமிழகம் முன்னிலையில் உள்ளது. பீகார் போன்ற பல வடமாநிலங்கள் கல்வியில் பின்தங்கி இருக்கின்றன.
இந்தியாவிலேயே பெண் கல்வியில் தமிழகம்தான் முன்னோடி மாநிலமாக விளங்கி வருகின்றது. இதற்கு காரணம், முன்னாள் முதலமைச்சர் கருணாநிதிதான். நில ஒதுக்கீடு சட்டத்தைக் கொண்டு வந்து ஏழை மக்களுக்கு நிலங்கள் வழங்கியவர். பெண்களுக்கு சொத்தில் சம உரிமை சட்டத்தைக் கொண்டுவந்து இந்தியாவிற்கே வழிகாட்டியவர். மாணவர்கள் அனைவரும் முன்னாள் முதலமைச்சர் கருணாநிதியின் வரலாற்றைப் படிக்க வேண்டும்" என கூறினார்.
இந்த விழாவில், வேலூர் சட்டமன்ற உறுப்பினர் கார்த்திகேயன், மேயர் சுஜாதா, முன்னாள் எம்பி முகமது சகி, முன்னாள் எம்எல்ஏ ஞானசேகரன் மற்றும் 200-க்கும் மேற்பட்ட மாணவர்கள் இந்நிகழ்ச்சியில் கலந்து கொண்டனர்.
இதையும் படிங்க: அமெரிக்க அதிபர் பைடனின் இந்தியா பயணம் ரத்து? என்ன காரணம்?
