திருப்பத்தூர் மாவட்டம் ஆம்பூர் அடுத்த சின்னவரிகம் ரகுநாதபுரம் பகுதியைச் சேர்ந்தவர் அமலா. இவர் கைலாசகிரி மலைப்பகுதி அடிவாரத்தில் பல ஆண்டுகளாக தனது நிலத்தில் விவசாயம் செய்து வந்துள்ளார். அந்த நிலத்தில் நல்ல விளைச்சலை பெற்றுள்ள நெல் பயிர்களை பிரித்து இயந்திரம் வரவழைத்து அறுவடை செய்யவிருந்தார். இந்த சூழலில், நேற்றிரவு இவரது நிலத்தில் புகுந்த யானை கூட்டங்கள் நிலத்தில் கட்டி வைக்கப்பட்டிருந்த நெல்களை மிதித்தும் வாரி ஆங்காங்கே வீசியும் சென்றுள்ளது.
இன்று காலை தனது நிலத்திற்கு வந்த அமலா, நிலத்தில் நெல்கள் ஆங்காங்கே சிதறி கிடந்ததைக் கண்டு அதிர்ச்சியடைந்து ஊர் மக்களிடம் தெரிவித்துள்ளார். இவரது நிலத்திற்கு மேல் அமைந்துள்ள இதே பகுதியைச் சேர்ந்த பலரது நிலத்தில் பயிரிடப்பட்ட வாழை மரங்கள், தென்னஞ்செடிகளையும் யானை கூட்டம் சேதப்படுத்தியுள்ளது.
கடந்த ஞாயிற்றுக்கிழமை மாச்சம்பட்டு மலைப்பகுதி அடிவாரத்தில் உள்ள விவசாய நிலத்தை யானை கூட்டம் சேதப்படுத்தியிருந்த நிலையில் இன்று மறுபடியும் யானை கூட்டம் நிலப்பகுதிக்கு வந்திருப்பது அப்பகுதி மக்களிடையே பெரும் அச்சத்தை ஏற்படுத்தியுள்ளது.
மேலும் இதுகுறித்து தமிழ்நாடு விவசாயிகள் சங்கத்தினர் கூறுகையில், மலைப்பகுதியிலிருந்து வன விலங்குகள் நிலப்பகுதிக்கு வருவதை தடுக்க மலைப்பகுதியின் அடிவாரத்தில் தடுப்பு வேலிகளும், அகழிகளும் அமைக்க வழியுறுத்தப்பட்டு வருகிறது. ஆனால், இதுவரையில் எந்தவித நடவடிக்கையும் எடுக்கப்படாததால் இதுபோன்ற நிகழ்வுகள் ஏற்படுகிறது. இனி வன விலங்குகள் நிலப்பகுதிக்கு வராமல் தடுக்க வனத்துறையினர் தகுந்த நடவடிக்கை எடுக்க வேண்டும் மற்றும் சேதமடைந்த பயிர்களுக்கு அரசாங்கம் உரிய இழப்பீடு வழங்க வேண்டும் என விவசாயிகள் கோரிக்கை விடுத்துள்ளனர்.
மேலும் சம்பந்தப்பட்ட நிலப்பகுதிகளை ஆம்பூர் சட்டப்பேரவை உறுப்பினர் வில்வநாதன் பார்வையிட்டு உரிய இழப்பீடு வழங்க நடவடிக்கை எடுக்கப்படும் என உறுதியளித்தார்.
இதையும் படிங்க: சிறுமியை பாலியல் வன்புணர்வு செய்த காவலர் போக்சோவில் கைது!
