வேலூர்: திருவள்ளுவர் பல்கலைக்கழகத்தில் 'புத்தகத் திருவிழா' இன்று தொடங்கி இரண்டு நாட்கள் நடைபெறுகிறது. இதில், 80 ஆயிரத்துக்கும் அதிகமான புத்தகங்களை விற்பனைக்கு வைக்கப்பட்டுள்ளன.
உயர்கல்வி பயிலும் மாணவர்களிடம் பல்துறை நூல்கள் வாங்கும் பழக்கத்தையும், அவற்றை வாசிக்கும் பழக்கத்தையும் ஊக்கப்படுத்தும் வகையில் வேலூர் திருவள்ளுவர் பல்கலைக்கழகத்தில் புத்தக திருவிழா இன்று (நவ. 28) தொடங்கப்பட்டது. இதனை துணைவேந்தர் டி.ஆறுமுகம் ஏற்பாட்டில் இரு நாட்கள் நடைபெறும் இந்த புத்தக திருவிழாவில் 25-க்கும் மேற்பட்ட புத்தக பதிப்பாளர்கள், விற்பனையாளர்கள் கலந்து கொண்டு 80 ஆயிரத்துக்கும் அதிகமான புத்தகங்களை விற்பனைக்கு வைத்துள்ளனர்.
இதில் துறை சார்ந்த புத்தகங்கள், பொது அறிவு, வரலாறு, போட்டித் தேர்வுக்கான புத்தகங்கள் என பல்வேறு தலைப்புகளில் புத்தகங்கள் இடம்பெற்றுள்ளன. இந்த புத்தக திருவிழாவை பல்கலைக்கழக பதிவாளர் ஜெ.செந்தில் வேல்முருகன் குத்துவிளக்கேற்றி தொடங்கி வைத்தார்.
அப்போது பேசிய பல்கலைக்கழக பதிவாளர் ஜெ.செந்தில் வேல்முருகன், 'பல்கலைக்கழகம், உறுப்பு கல்லூரி மாணவர்களின் வாசிப்பு, பல்துறை சார்ந்த திறனை வளர்க்கவே துணைவேந்தர் இந்த புத்தக திருவிழாவுக்கு ஏற்பாடு செய்துள்ளார். எனவே, பேராசிரியர்களும், மாணவர்களும் இந்த நல்ல வாய்ப்பினை பயன்படுத்திக் கொள்ளவேண்டும்' என்றார்.
முன்னதாக, பல்கலைக்கழக நூலகர் பி.விநாயகமூர்த்தி வரவேற்றார். முதல்வர் சி.தண்டபாணி, தேர்வு கட்டுப்பாட்டு அலுவலர் பி.பாபுஜனார்த்தனன், துறைத்தலைவர்கள் எம்.சித்ரா, கே.தினகரன், ஜி.யோகானந்தம், ஏ.ராஜசேகர், எம்.கவிதா, எஸ்.யுவராஜன், பி.பாமா, முத்துச்சாமி உள்ளிட்டோர் பங்கேற்றனர். இதன் நிறைவாக, உதவி நூலகர் ஏ.கண்ணன் நன்றியுரை கூறினார்.
இதையும் படிங்க: கல்வி இடைநிற்றல்.... போதையால் சீரழியும் இளைஞர்கள் : தத்ரூப நடிப்பால் கண்கலங்க வைத்த பழங்குடியின மாணவ, மாணவியர்!
