ஆம்பூர் அடுத்த நரியாம்பட்டி கே. தெருவைச் சேர்ந்தவர் சாதிக் பாஷா. இவரது மனைவி சபானா. இவர், இன்று மதியம் வீட்டிலிருந்தபோது வீட்டில் நுழைந்த அடையாளம் தெரியாத நபர்கள் கத்தியைக் காட்டி மிரட்டி சபானா அணிந்திருந்த இரண்டு சவரன் நகையைப் பறித்துச் சென்றுள்ளனர்.
உடனடியாக சத்தம் போட்ட சபானாவை ஷோபாவில் தள்ளிவிட்டு அந்த அடையாளம் தெரியாத நபர்கள் அங்கிருந்து தப்பிச் சென்றுள்ளனர்.
இது குறித்து, காவல் துறையினருக்குத் தகவல் அளிக்கப்பட்டது. அதனடிப்படையில் சம்பவம் இடத்துக்கு விரைந்துவந்த காவல் துறையினர் அங்கு விசாரணை மேற்கொண்டதில், சாதிக் பாஷாவின் வீட்டின் அருகிலிருந்த பைரோஸ் என்பவர் சில மாதங்களுக்கு முன் மும்பை சென்று ஆட்டோ ஓட்டி வந்துள்ளார் என்பதும், ஒரு மாதத்திற்கு முன் வீடு திரும்பிய பைரோஸ் திரும்பி மும்பை செல்லவில்லை என்பதும் தெரியவந்தது.
மேலும், பைரோஸை தேடிவந்த நபர்கள் இந்தக் கொள்ளை சம்பவத்தில் ஈடுபட்டிருக்கலாம் என அக்கம்பக்கத்தினர் தெரிவித்தனர்.
பைரோஸிற்கும் அந்த அடையாளம் தெரியாத நபர்களுக்கும் ஏற்கனவே பிரச்னை இருந்திருக்கக்கலாம் எனவும், அவரைத் தேடிவந்த நபர்கள் வீடு தெரியாமல் சாதிக்கின் வீட்டில் நுழைந்து அவரது மனைவியை மிரட்டி நகையைக் கொள்ளையடித்துச் சென்றிருக்கலாம் என சந்தேகிக்கும் காவல் துறையினர், இச்சம்பவம் குறித்து தீவிர விசாரணை மேற்கொண்டுவருகின்றனர்.
பட்டப்பகலில் வீடு புகுந்து பெண்ணிடம் கத்தியைக் காட்டி கொள்ளை சம்பவம் நடந்திருப்பது, அப்பகுதியில் பெரும் பரபரப்பை ஏற்படுத்தியுள்ளது.
