திருச்சி: ஸ்ரீரங்கம் வைகுண்ட ஏகாதசி திருவிழா கடந்த 15ஆம் தேதி தொடங்கியது. அதனைத் தொடர்ந்து 10 நாள்கள் பகல்பத்து வைபவத்தில் உற்சவர் நம்பெருமாள் தினமும் ஒரு சிறப்பு அலங்காரத்தில் மூலஸ்தானத்திலிருந்து புறப்பட்டு, அர்ச்சுன மண்டபத்தில் எழுந்தருளி பக்தர்களுக்கு அருள்பாலித்தார்.
இதைத்தொடர்ந்து கடந்த 25ஆம் தேதி அதிகாலை வைகுண்ட ஏகாதசி திருவிழாவின் முக்கிய நிகழ்வான சொர்க்கவாசல் திறப்பு நிகழ்ச்சி நடைபெற்றது. இதையடுத்து ராப்பத்து நிகழ்ச்சி தொடங்கியது.
இன்றைய சிறப்பு அலங்காரம்
ராப்பத்து நிகழ்ச்சியின் மூன்றாம் திருநாளில் நம்பெருமாள் சாய்முத்து கிரீடம், ரத்தின அபயஹஸ்தம், ரத்தின காது காப்பு, பவளமலை, திருஆபரணங்கள் அணிந்து பக்தர்களுக்குச் சேவை சாதித்தார்.
பின்னர் இரவு 8 மணிக்கு ஆயிரங்கால் மண்டபத்திலிருந்து புறப்பட்ட நம்பெருமாள் 9 மணிக்கு மூலஸ்தானத்தைச் சென்றடைந்தார். ஆயிரக்கணக்கான பக்தர்கள் நீண்ட வரிசையில் காத்திருந்து ரங்கநாதரின் முத்தங்கி சேவையையும், உற்சவர் நம்பெருமாள் சேவையையும் தரிசித்தனர்.
இதையும் படிங்க: ஸ்ரீரங்கம் ராப்பத்து வைபவத்தின் இரண்டாம் நாள் உற்சவம்!
