திருச்சி: திருச்சி மாவட்ட காங்கிரஸ் கட்சி அலுவலகம் அண்ணாமலை மன்றத்தில் மாநில இளைஞர் காங்கிரஸ் தலைவர் விச்சு லெனின் செய்தியாளர்களைச் சந்தித்தார். அப்போது பேசிய அவர், இந்திய ஒற்றுமை பயணம் என்கின்ற பயணத்தை தொடங்கிய ராகுல் காந்தி, ஆதிக்க சக்திகள் ஏற்படுத்திய பல தடைகளையும் தகர்த்தெறிந்து வெற்றிகரமாக ஓராண்டை நிறைவு செய்தார். அதில் பலதரப்பட்ட மக்களை சந்தித்து அவர்களின் தேவைகளை கேட்டு அறிந்தார்.
பாரத் ஜோடோ லீடர்ஷிப்: அதனை கொண்டாடும் வகையில் அகில இந்திய இளைஞர் காங்கிரஸ் சார்பாக, மாநிலம் முழுவதும் பல்வேறு கட்ட நிகழ்வுகளை தமிழ்நாடு இளைஞர் காங்கிரஸ் நடத்த இருக்கின்றோம். குறிப்பாக விளையாட்டுப் போட்டிகள், கலை நிகழ்ச்சிகள், இளைஞர்களுக்கான நிகழ்ச்சிகள் போன்றவற்றை நடத்திக் கொண்டாட உள்ளோம். அந்த வகையில் இன்று யூத் காமர்ஸ் சார்பாக, பாரத் ஜோடோ லீடர்ஷிப் என்ற ஒரு திட்டத்தை அறிமுகம் செய்திருக்கின்றோம்.
இளைஞர் காங்கிரஸ் சார்பாக பலதரப்பட்ட நிகழ்ச்சிகள்: இந்த திட்டத்தில் பங்கேற்க ஏராளமான பெண்கள் ஆன்லைன் மூலம் பதிவு உள்ளனர். இதன் நோக்கம், இளைஞர்களின் திறமைகளை கண்டறிந்து அதை வெளிப்படுத்தும் வகையில் அறிமுகப்படுத்தி இருக்கின்றோம். வரும் நாடாளுமன்ற தேர்தலை முன்னிட்டு இளைஞர் காங்கிரஸ் சார்பாக பலதரப்பட்ட நிகழ்ச்சிகள் நடைபெற்று வருகிறது. குறிப்பாக பூத் கமிட்டி அமைப்பது, மண்டல கூட்டங்கள் நடத்துவது உள்ளிட்ட நிகழ்வுகள் நடைபெற்று வருகிறது.
மணிப்பூர் சம்பவத்திற்கு ஏன் வாய் திறக்கவில்லை: கடந்த இரண்டு மூன்று நாட்களாக தமிழக விளையாட்டு துறை அமைச்சர் உதயநிதி பேசிய விஷயம் மிகவும் வைரல் ஆகி வருகிறது. சனாதனம் பற்றி அவர் கூறிய கருத்துக்களுக்கு மோடி உடனடியாக எதிர்வினையாற்றிருக்கிறார். நாங்கள் என்ன கேட்கிறோம் என்றால், தமிழ்நாடு அமைச்சர் பேசியதற்கு உடனடியாக பதில் கொடுக்கும் மோடி, மணிப்பூரில் மூன்று மாதங்களுக்கு மேலாக ஒரு பிரச்சினை நடந்து கொண்டிருக்கின்றது. அதைப்பற்றி வாயை திறக்கவே இல்லை.
மக்களால் தேர்ந்தெடுக்கப்பட்ட ஒரு அரசு, மக்களுக்காக இருக்க வேண்டிய பிரதிநிதிகள், இதை பற்றி எல்லாம் கவலைப்படாமல் உடனடியாக அமைச்சர்களை அழைத்து சரியான பதிலடி கொடுக்க வேண்டும் என்று கூறி இருக்கிறார் என்றால் இந்த நாடு எதை நோக்கிப் போய்க் கொண்டிருக்கிறது என்ற கேள்வி எழுகிறது. சனாதனம் என்ற பெயரில் சொன்ன கருத்துக்களை தவறாக எடுத்துக் கொண்டு தவறான பிம்பங்களை ஏற்படுத்துவது சரியானது அல்ல.
சாமியாரை கைது செய்ய வேண்டும்: மேலும் ஒரு சாமியார் 10 கோடி தரேன், 20 கோடி தரேன் என கூறுகிறார். தமிழ்நாட்டில் பிறந்தநாளுக்கு கேக் வெட்ட கத்தி வைத்திருந்தால் கூட காவல்துறை கைது செய்கிறது. அந்த அளவுக்கு சட்டம் ஒழுங்கு சிறப்பாக இருக்கிறது. ஆனால் இந்த சாமியார் கூறும் இடத்தில் உள்ள காவல்துறை எப்படி இருக்கிறார்கள் என்று தெரியவில்லை. அந்த மாநிலத்தின் முதலமைச்சர் நியாயமாக இருந்திருந்தால் அந்த சாமியாரை தற்போது கைது செய்திருக்க வேண்டும்.
தமிழனை தொட விடமாட்டோம்: அதை விட்டுவிட்டு இதை பிரபலமாக பேசி, சாமியாரின் கருத்து உண்மைதான் என்பது போல செய்வது மிகவும் வியப்பாக இருக்கிறது. இது தான் ஏற்றத்தாழ்வு என்பது எங்களுடைய கருத்து. உதயநிதியை யாரும் எளிதாக தொட்டு விட முடியாது. அதற்கு அப்பாற்பட்டு ஒரு தமிழனை யாரும் தொடுவதற்கு, அவ்வளவு சீக்கிரம் விட்டு விட மாட்டோம். வாய் இருக்கிறது என்பதற்காக யார் வேண்டுமானாலும், எது வேண்டுமானாலும் பேசலாம் என்பது வேடிக்கையாக இருக்கிறது.
ஒரு மாநிலத்தின் அமைச்சரும், முதலமைச்சரின் மகனுமான உதயநிதியின் தலையை, சீவி விட்டு வா என்று சொல்பவர்களை பாஜக அரசு ஆதரிக்கிறது. இது வன்முறையை தூண்டும் வகையில் உள்ளது. அவரை கைது செய்ய வேண்டும் என்பதுதான் எங்களுடைய கோரிக்கை.
இதையும் படிங்க: உதயநிதி பேச்சை திரித்து பதிவிட்டதாக பாஜக ஐடி விங் தலைவர் அமித் மாளவியா மீது வழக்கு!
