திருச்சி: தமிழ்நாட்டில் உள்ள அம்மன் தலங்களில் பிரசித்திபெற்றது சமயபுரம் மாரியம்மன் கோவில். இக்கோவிலில் ஆண்டுதோறும் சித்திரைத் திருவிழா வெகு விமரிசையாகக் கொண்டாடப்படுவது வழக்கம். பூச்சொரிதலையடுத்து சித்திரை மாதம் முதல் செவ்வாய்க்கிழமை சித்திரை தேரோட்டம் வெகு விமரிசையாக நடைபெறும்.
அதன்படி இந்த ஆண்டு சித்திரைத் திருவிழாவானது கடந்த 10ஆம் தேதியன்று கொடியேற்றத்துடன் தொடங்கி தினசரி பல்வேறு உற்சவங்கள் நடைபெற்றன. இதனையடுத்து கடந்த 19ஆம் தேதியன்று சித்திரை தேரோட்டம் வெகு சிறப்பாக நடைபெற்றது. இரண்டு வருடங்களுக்குப் பிறகு சித்திரைத் தேரோட்டம் நடைபெற்றதால் இதில் பல்லாயிரக்கணக்கான பக்தர்கள் பங்கேற்றனர்.
அதனைத்தொடர்ந்து சித்திரைத் திருவிழாவின் 13ஆம் நாளான நேற்றிரவு (வெள்ளிக்கிழமை) தெப்பத்திருவிழா வெகு விமரிசையாக நடைபெற்றது. முன்னதாக அம்மனுக்குச் சிறப்புப் பூஜைகள் நடைபெற்றது. தொடர்ந்து சமயபுரம் மாரியம்மன்(உற்சவர்) வீதியுலா வந்து தெப்பக்குள மண்டபத்தில் பிற்பகல் முதல் எழுந்தருளி பக்தர்களுக்குக் காட்சியளித்து வந்தார்.
பின்னர் தீர்த்தக்குளத்தில் வண்ண மின்விளக்குகளாலும், மலர்களாலும் அலங்கரிக்கப்பட்ட மிகப்பெரிய தெப்பத்தில் சமயபுரம் மாரியம்மன் எழுந்தருளி பக்தர்களுக்கு அருள்பாலித்தார். தெப்பமானது தீர்த்தக்குளத்தில் 3 முறை வலம்வந்து பின்னர் அம்மன் மூலஸ்தானத்தைச் சென்றடைந்தார். இத்தெப்பத் திருவிழாவின்போது வாணவேடிக்கைகள் நிகழ்த்தப்பட்டன.
வைரஸ் தொற்று காரணமாக இரண்டு ஆண்டுகளாகத் தெப்பத்திருவிழா நடைபெறாத நிலையில் இந்த ஆண்டு நடைபெற்ற தெப்பத் திருவிழாவில் ஆயிரக்கணக்கான பக்தர்கள் ஓம் சக்தி பராசக்தி எனப் பக்தி கோஷம் எழுப்பி அம்மனை தரிசனம் செய்து சென்றனர்.
இதையும் படிங்க:ஸ்ரீரங்கம் - சிம்மவாகன சிறப்பு ஆரத்தி..!
