திருச்சி: இயக்குனர் தினேஷ் கலைச்செல்வன் இயக்கத்தில் 'இராக்கதன்' (Raakadhan) திரைப்படம் தமிழ்நாடு முழுவதும் உள்ள திரையரங்குகளில் நேற்று (ஜூலை.21) வெளியானது. இந்த படத்தின் படப்பிடிப்பு சென்னை, திருச்சி, காரைக்கால் உள்ளிட்ட பல்வேறு இடங்களில் நடைபெற்ற நிலையில், இறுதிக்கட்ட படப்பிடிப்பு வேளாங்கண்ணியில் உள்ள தனியார் தங்கும் விடுதியில் நடைபெற்றது.
மேலும் திரைப்படத்தின் கதாநாயகனாக வம்சி கிருஷ்ணன் மற்றும் விக்னேஷ் பாஸ்கர் நடித்துள்ளனர். கதாநாயகியாக காயத்ரியும், படத்தின் முக்கிய கதாபாத்திரங்களாக ரியாஸ் கான், நிழல்கள் ரவி, சஞ்சனா சிங், ஷாம்ஸ் உள்ளிட்ட பலர் நடித்துள்ளனர். படத்தின் பாடல்களை சைந்தவி மற்றும் ஜி.வி பிரகாஷ் இணைந்து பாடியுள்ளனர்.
மேலும் படத்திற்கு மனாஸ்பாபு ஒளிப்பதிவு செய்துள்ளார். பிரவீன் குமார் இசை அமைத்துள்ளார். பாடல்களை பாபு கிருஷ்டியன் எழுதியுள்ளார். மேலும் படத்தின் கலை இயக்குனராக இன்ப பிரகாஷ், மக்கள் தொடர்பு தேஜா, சண்டை பயிற்சி சரவணன் ஆகியோர் பணிபுரிந்து உள்ளனர். மருதம் புரொடக்சனுக்காக ராணி ஹென்றி சாமுவேலுடன் இணைந்து எம்.ஏ.ஜி பாஸ்கர் இப்படத்தை தயாரித்துள்ளனர். தற்போது இராக்கதன் படக்குழுவினரின் செய்தியாளர் சந்திப்பு திருச்சியில் நடைபெற்றது.
நடிகர் ரியாஸ் கான் பேசியது, "இப்படத்தின் ஹைலைட்டே அந்த கதாப்பாத்திரம் தான் என மக்கள் சொல்லுகின்றனர். எனக்கும் பிடித்திருந்தது. அந்த கதாபாத்திரத்திற்காக மட்டும் இப்படத்தில் நடித்தேன். இப்படத்தின் முக்கிய கருவே அந்த கதாப்பாத்திரமே தான். இப்படத்தில் அனைவருமே ஹூரோ தான், சொல்லப்போனால் இப்படத்தின் கதைதான் ஹூரோ. அனைவரின் கதாப்பாத்திரமும் சுற்றி சுற்றி வந்து இறுதியில் வெளிவரும்" என்று தெரிவித்தார்.
இயக்குனர் தினேஷ் கலைச்செல்வன் கூறியது, "இந்த படம் பூஜை போட்டதும் அதிகமான காட்சிகளை படம் பிடித்தது திருச்சியில் தான். ஆகையால் திருச்சியில் உள்ள மாரிஸ் திரையரங்கில் இராக்கதன் பார்த்தது மிகவும் மகிழ்ச்சியாக உள்ளது. மேலும் இப்படம் கிரைம் மற்றும் த்ரில்லர் கதையாக உருவாகி உள்ளது. திரைப்பட கல்லூரி மாணவர்கள் இணைத்து பணியாற்றினர். அதே போன்று புதிய தொழில்நுட்பம் கொண்டு ஒளிப்பதிவு செய்துள்ளதாகவும் தகவல் தெரிவித்தார்.
இந்த படம் தமிழ்நாடு முழுவதும் திரையிடப்பட்டது. மக்கள் மத்தியில் நல்ல வரவேற்பை பெற்றதாக திரைப்பட குழுவினர் தெரிவித்துள்ளனர். மேலும் இந்த கதையில் முக்கியமாக ஆண்கள் மாடலிங் செய்வதும், அதில் ஏற்படக்கூடிய பாதிப்புகள், ஆண் விபச்சாரம் பற்றிய சில தகவல்களை கொண்டு இந்த படம் எடுக்கப்பட்டுள்ளது.
இந்த படத்தில் திருச்சியை சேர்ந்த பல புதிய முகங்களாக அறிமுகப்படுத்தி உள்ளேன். மக்கள் அனைவரும் இந்த படத்திற்கு ஆதரவு அளிக்க வேண்டும் என்றார். தொடர்ந்து பேசிய அவர், படத்தின் வெற்றியைப் பொறுத்து இரண்டாம் பாகம் எடுக்க முடிவு செய்துள்ளதாகவும், அதில் சில கதாபாத்திரங்கள் மாற்றப்படும்" எனவும் தெரிவித்தார்.
இதையும் படிங்க: திரைச் சிதறல்... இந்த வார ரிலீஸ் படங்கள் என்னென்ன?
