'நீதித் துறை, ஊடகத் துறை என அனைத்திலும் பாஜகவின் அரசியல் தலையீடு!'

திருச்சி: பாஜக ஆட்சியில் நீதித் துறை,ஊடகத் துறை என அனைத்துத் துறைகளிலும் பாஜகவின் அரசியல் தலையீடு இருக்கிறது என்று விடுதலைச் சிறுத்தைகள் கட்சியின் தலைவரும் சிதம்பரம் மக்களவை உறுப்பினருமான திருமாவளவன் தெரிவித்துள்ளார்.

அரியலூர் மாவட்டத்தில் உள்ள தனது சொந்த கிராமமான அங்கனூரில் வாக்களிப்பதற்காக விடுதலைச் சிறுத்தைகள் கட்சித் தலைவர் தொல். திருமாவளவன் சென்னையிலிருந்து விமானம் மூலம் திருச்சி வந்தார்.

திருச்சி விமான நிலையத்தில் செய்தியாளர்களைச் சந்தித்துப் பேசியபோது, "உள்ளாட்சித் தேர்தலை நடத்தாமல் தமிழ்நாடு அரசு தள்ளிப்போட்டுக்கொண்டே இருந்தது. தற்போது, நீதிமன்ற நெருக்கடியின் காரணமாக தேர்தலை நடத்துகிறது. தேர்தல் அலுவலர்களும் காவல் துறையினரும் ஆளும் கட்சிக்கு ஆதரவான நிலைப்பாட்டை எடுத்துள்ளதாகப் பரவலாகப் பேச்சு எழுந்துள்ளது.

தேசத்திற்கு விரோதமான, மக்களுக்கு எதிரான திட்டங்களுக்கு அதிமுகவும் பாமகவும் தொடர்ச்சியாக ஆதரவு தெரிவித்துவருகின்றன. குடியுரிமை திருத்தச் சட்டத்திற்கு அதிமுகவும் பாமகவும் ஆதரவளித்ததன் விளைவாகத்தான் அந்தச் சட்டம் நிறைவேறியுள்ளது. நாடு முழுவதும் நடைபெறும் துப்பாக்கிச்சூடு, கலவரம் போன்றவற்றிற்கு அதிமுக, பாமகதான் காரணம்" என்றார்.

போராட்டம் மூலம் நாட்டு மக்களை தவறாக வழிநடத்துவதாக ராணுவத் தளபதி தெரிவித்த கருத்து குறித்து பேசிய திருமாவளவன், பாஜக ஆட்சியில் நீதி, ஊடகம் என அனைத்துத் துறைகளிலும் அரசியல் தலையீடு உள்ளது என்றார். பாஜக ஆட்சி செய்தால் ராணுவத் தளபதிகூட அரசியல் பேசுவார் என்பதற்கு இது ஒரு உதாரணம் எனச் சுட்டிக்காட்டினார். ராணுவத்தில் அரசியல் தலையீடு எதுவும் இருக்கக் கூடாது எனவும் அவர் கூறினார்.

தமிழ்நாட்டில் சாதிப் பிரச்னை, மதப் பிரச்னை, ஆணவக்கொலை, மகளிர்-குழந்தைகளுக்கு எதிரான குற்றங்கள் நாளுக்குநாள் அதிகரித்துவருவதாக வேதனை தெரிவித்தார். அதைக்கட்டுப்படுத்த முதலமைச்சர் நடவடிக்கை எடுக்க வேண்டும் என்றும் வலியுறுத்தினார்.

இதையும் படிங்க: 'விரலில் வைத்த மை காயவில்லை' - அலுவலருக்கு அட்வைஸ் செய்த அமைச்சர்