திருச்சி: திருச்சியில், ‘தொழில் நுட்ப பெண்மணி சிறப்பு விருது மற்றும் இணைய தொழில் முனை திறன் பயிற்சி துவக்க விழா’ நேற்று (அக்.21) நடைபெற்றது. இந்த விழாவில் சிறப்பு விருந்தினராக, இந்தியாவின் முதல் சூரிய மின் சக்தி திட்டமான ஆதித்யா L1 திட்ட இயக்குநர் நிஹார் ஷாஜி கலந்து கொண்டார்.
இவ்விழாவில், 30 பசுமை சார்ந்த மற்றும் பருவநிலை மாற்றம் சார்ந்த பெண்களின் சிறு குறு தொழில்களை தேர்ந்தெடுத்து, அவர்களுக்கு விருதுகளை வழங்கினார். இந்த 30 தொழில் முனைவோர்களும், 3 மேலாண்மை மற்றும் தொழில்முனைவு துறை சார் நிபுணத்துவம் உடைய நடுவர்களால் தேர்ந்தெடுக்கப்பட்டனர்.
இந்நிகழ்வில், TREC-STEP (Tiruchirapalli Regional Engineering College Science and Technology Entrepreneurs Park) திறன் பயிற்சி மையத்தின் நிர்வாக இயக்குநர் ஆர்.எம்.பி.ஜவகர், தமிழ்நாடு பவுண்டேஷன் தலைவர் ராஜ ரத்தினம், உதவி பொது மேலாளர் பிந்து பாலகிருஷ்ணன் மற்றும் ஏராளமான பெண்கள் கலந்து கொண்டனர்.
அதனைத் தொடர்ந்து, ஆதித்யா L1 திட்ட இயக்குநர் நிஹார் ஷாஜி செய்தியாளர்களிடம் பேசியதாவது, “விண்வெளியில் மனிதனை அனுப்புவதற்கான சோதனையின் ஒரு பகுதிதான் ககன்யான் திட்டம். ராக்கெட்டில் செல்லும்போது விண்வெளியில் ஏதேனும் பிரச்னை ஏற்பட்டால், எவ்வாறு தப்பித்து மீண்டும் பாதுகாப்பான முறையில் பூமி வந்தடைவது என்பது குறித்து சோதனை நடைபெற்றது.
மேலும், இது குறித்து பல கட்ட சோதனைகள் நடைபெறும். இரண்டு மனிதர்களின் எடைக்கு சமமான சோதனையை நடத்தி, ராக்கெட்டை அனுப்பி வெற்றி கண்ட பின்பு விண்வெளிக்கு மனிதர்களை அனுப்ப முடியும். அடுத்த கட்டமாக சந்திரனில் உள்ள மாதிரிகளை எடுத்து வந்து, ஆராய்ச்சி மையத்தில் சோதனை செய்வது தொடர்பான பணிகள் தொடர்ந்து நடைபெற்று வருகிறது.
சூரியனை ஆய்வு செய்ய அனுப்பப்பட்ட ஆதித்யா எல்1, சூரியன் எவ்வாறு இயங்குகிறது என்பதை ஆய்வு செய்யும். சூரியனில் பல்வேறு நிகழ்வுகள் நடைபெறுகிறது. குறிப்பாக, 11 வருடங்களுக்கு ஒரு முறை சூரியன் ஆக்ரோஷம் அடைந்து வரும். இதனால் விண்வெளியில் உள்ள செயற்கைக்கோள்கள் பாதிக்கப்படும். எனவே, சூரியனை ஆய்வு செய்து அதனை தற்காத்துக் கொள்ள ஆதித்யா உதவும்.
மேலும், ஜனவரி முதல் வாரம் ஆதித்யாவின் வெற்றி குறித்து தெரியும். சூரியன் மட்டுமின்றி வெள்ளி, செவ்வாய் போன்ற கோள்களையும் ஆய்வு செய்யும் பணிகள் தொடர்ந்து நடைபெறும்” என்று கூறினார்.
இதையும் படிங்க: ஆர்எஸ்எஸ் பேரணி விவகாரம்; தமிழக உள்துறை செயலாளர், டிஜிபி சங்கர் ஜிவால் உள்ளிட்டோருக்கு நோட்டீஸ்.. பின்னணி என்ன?
