திருப்பூர் மாவட்டம் உடுமலைப்பேட்டை அருகில் அமைந்திருக்கும் திருமூர்த்தி அணைக்கட்டில் இருந்து உடுமலை, தாராபுரம் வரை செல்லும் திருமூர்த்தி வாய்க்காலில் பொதுமக்கள் குப்பைகளை கொட்டி வருகின்றனர். திருமூர்த்தி வாய்க்காலில் குளிக்க வரும் மக்கள் பிளாஸ்டிக் பாட்டில், பிளாஸ்டிக் பைகள் போன்றவற்றை தூக்கி எறிகின்றனர். அங்கு இருக்கும் சிலர் வீடுகளிலிருந்து குப்பைகளையும் கொட்டுகின்றனர். இதனால் வாய்க்கால் குப்பைமேடுகள் போல் காட்சி அளிக்கிறது. அதிகம் குப்பைகள், பழைய துணிகள் மதுபான பாட்டில்கள் உடைக்கப்பட்டு தூக்கி எறியப்படுவதால், அங்கு குளிக்க வரும் மக்களின் கால்களில் குத்தி காயம் ஏற்படுகிறது.
பொதுமக்கள் குப்பைகளை இங்கு வீசும் முன் சற்றும் சிந்திக்காமல் தூக்கி வீசுகின்றனர். அனால், இது மீண்டும் அவர்களுக்கே பாதகமாக அமைகிறது. ஆகவே, இனிமேல் வாய்க்காலில் குப்பை கொட்டாதபடி அலுவலர்கள் உடனடியாக நடவடிக்கை எடுக்க வேண்டும் என சமூக ஆர்வலர்கள் கூறி வருகின்றனர்.
