உடுமலைப்பேட்டையில் 600கிலோ கஞ்சா பறிமுதல் - இருவர் கைது!

திருப்பூர்: உடுமலை அருகே கஞ்சா விற்பனை செய்தவர்களிடம் இருந்து 600கிலோ கஞ்சாவை பறிமுதல் செய்து இருவரை காவல் துறையினர் கைது செய்தனர்.

திருப்பூர் மாவட்டம் உடுமலை பகுதியைச் சேர்ந்தவர்கள் கருப்புசாமி, அருண், அசோக். இவர்கள் மூன்று பேரும் கூட்டு சேர்ந்து ஆந்திர மாநிலம் விஜயவாடா பகுதியில் உள்ள பாடகிரி மலைப்பகுதியிலிருந்து அவசர ஊர்தி வாகனம் மூலம் கஞ்சா வாங்கி வந்து இப்பகுதியில் விற்பனை செய்து வந்துள்ளனர்.

இந்நிலையில், கடந்த மூன்று நாட்களுக்கு முன்பு வழக்கம்போல் உடுமலையில் உள்ள தனியார் அவசர ஊர்தி வாகனம் ஒன்றை வாடகைக்கு எடுத்து தனது உறவினர் ஆந்திராவில் உடல்நிலை சரியில்லாமல் இருப்பதாகவும், அவரை கோவை மருத்துவமனைக்கு அழைத்து வருவதாகவும் கூறி சென்றுள்ளனர்.

இதையடுத்து, மூன்று நாட்கள் கடந்த நிலையில், அவர்கள் மூவரும், அவசர ஊர்தி வாகனமும் திரும்ப வரவில்லை. இதனால் சந்தேகமடைந்த அவசர ஊர்தி வாகனத்தின் உரிமையாளர் உடுமலை காவல் நிலையத்தில் புகார் தெரிவித்தார். இதனிடையே, கோவை போதை தடுப்புப் பிரிவு காவல் துறையினருக்கு அவரசர ஊர்தி மூலம் கஞ்சா கடத்தி வருவதாக ரகசிய தகவல் கிடைத்தது.

அதனையடுத்து, காவல் துறையினர் திருப்பூர், கோவை முழுவதும் சோதனையில் ஈடுபட்டனர். அப்போது, அருண் என்பவரை காவல் துறையினர் கைது செய்து விசாரணை மேற்கொண்டனர். விசாரணைக்குப்பின், உடுமலை காவல் நிலையத்திற்கு பின்புறம் உள்ள சங்கிலி நாடார் தெருவில் உள்ள ஒரு வீட்டில் காவல் துறையினர் சோதனை செய்ததில் 600 கிலோ கஞ்சா பதுக்கி வைத்து இருந்தது தெரியவந்தது.

இதனைத் தொடர்ந்து, அங்கு பதுக்கி வைத்திருந்த கஞ்சாவை பறிமுதல் செய்து அசோக் என்பவரையும் காவல் துறையினர் கைது செய்தனர். ஆனால் முக்கிய குற்றவாளியான கந்தசாமி என்பவர் தலைமறைவாகி விட்டார். அவரை காவல் துறையினர் தீவிரமாக வலை வீசி தேடி வருகின்றனர். மேலும், பறிமுதல் செய்யப்பட்ட கஞ்சாவின் மதிப்பு ரூ. 70 லட்சம் இருக்கும் என காவல் துறையினர் தெரிவித்தனர்.

இதையும் படிங்க:15 கோடி ரூபாய் மதிப்புள்ள கஞ்சா செடிகள் தீயிட்டு அழிப்பு!