திருப்பத்தூர்: ஆம்பூர் கொம்மேஸ்வரம் பகுதியில் இயங்கி வரும் அல்தாப் என்ற தனியார் காலணி தொழிற்சாலை மற்றும் அல்தாப் நிறுவனத்திற்குச் சொந்தமான ஆம்பூர் கஸ்பா-ஏ பகுதியில் இயங்கி வரும் ’ருமானா தோல் தொழிற்சாலையில்’ நேற்று வருமானவரித்துறை அதிகாரி சந்தோஷ் தலைமையிலான 15 பேர் கொண்ட குழுவினர் சோதனை மேற்கொண்டனர்.
இந்நிலையில் தொடர்ந்து 2-வது நாளாக தொழிற்சாலை மேலாளர்கள், அலுவலகப் பணியாளர்களிடம் விசாரணை மேற்கொண்டு வருகின்றனர். கடந்த மூன்று மாதங்களுக்கு முன்பு ஆம்பூர் பகுதியில் உள்ள பிரபல காலணி தயாரிப்பு மற்றும் ஏற்றுமதி தொழிற்சாலையான பரிதா குழுமத்தில் சுமார் 6 நாட்கள் வருமான வரித்துறை அதிகாரிகள் சோதனை நடத்தி ஆவணங்களைக் கைப்பற்றினர். இந்நிலையில் தற்போது மேலும் ஒரு நிறுவனத்தில் தொடர் சோதனையில் ஈடுபட்டுள்ளனர்.
