தூத்துக்குடி மாவட்டம் எட்டயபுரம் நடுவப்பட்டி ஆறுமுக முதலியார் தெருவைச் சேர்ந்தவர் கருப்பசாமி (35). இவர் கறிக்கடையில் வேலை பார்த்துவருகிறார். இவரது மனைவி முனீஸ்வரி (32). இவர்களுக்கு முகேஷ் (11) என்ற மகனும், மஞ்சு (9) என்ற மகளும் உள்ளனர்.
இன்று மாலை மதுபோதையில் வீட்டுக்கு வருகை தந்த கருப்பசாமியை, அவரது மனைவி முனீஸ்வரி கண்டித்துள்ளார். இதனால் கணவன்-மனைவி இருவருக்கும் இடையே தகராறு ஏற்பட்டுள்ளது. இதில் வாக்குவாதம் முற்றவே ஆத்திரமடைந்த கருப்பசாமி மனைவி முனீஸ்வரியை அரிவாளால் தலையின் பின்பக்கம், காதுப்பகுதியில் வெட்டிவிட்டு தப்பிச் சென்றுள்ளார்.
இதில் பலத்த காயமடைந்த முனீஸ்வரி வீட்டிலேயே ரத்தவெள்ளத்தில் உயிரிழந்தார். சத்தம் கேட்டு ஓடி வந்து பார்த்த அண்டை வீட்டுக்காரர்கள், ரத்த வெள்ளத்தில் மிதந்து கொண்டிருந்த முனீஸ்வரியை பார்த்து அதிர்ச்சி அடைந்தனர். இதையடுத்து எட்டயபுரம் காவல்நிலையத்திற்கு கொலை சம்பவம் குறித்து தகவல் தெரிவித்தனர்.
பின்னர் தகவலறிந்து சம்பவ இடத்திற்கு வந்த காவல்துறையினர் சடலத்தை மீட்டு உடற்கூறாய்வுக்காக எட்டயபுரம் அரசு மருத்துவமனைக்கு அனுப்பிவைத்தனர். பின்னர் இது குறித்து வழக்குப்பதிவு செய்த காவல் துறையினர் தப்பியோடிய கருப்பசாமியை தேடிவருகின்றனர்.
