தூத்துக்குடி மக்களவைத் தேர்தலில் திமுக சார்பில் அக்கட்சியின் மகளிரணி செயலாளர் கனிமொழி போட்டியிடுகிறார். தேர்தலை முன்னிட்டு, மாவட்டம் முழுவதும் தீவிரமாக வாக்கு சேகரிப்பில் ஈடுபட்டுவருகிறார். இந்நிலையில், இன்று தூத்துக்குடி மடத்தூர் பகுதியில் அவர் தீவிர வாக்கு சேகரிப்பில் ஈடுபட்டார்.
அப்போது கனிமொழி பேசுகையில், “தொடர்ந்து தமிழ்நாட்டிற்கு எதிராக செயல்பட்டு துரோகம் செய்யும் பாஜக அரசை வீட்டுக்கு அனுப்பும் தேர்தல் இது. அந்த நினைவோடு மக்கள் வாக்களிக்க வேண்டும். புயல், வறட்சி என எது வந்தாலும் நிவாரணம் கொடுக்கமாட்டார்கள்.
விவசாயிகள் மாத கணக்கில் டெல்லியில் தங்கியிருந்தாலும் அவர்களை பிரதமர் சந்திக்கமாட்டார். ஆனால், தமிழ்நாட்டிற்கு தேவையில்லையாத நீட் தேர்வு, ஸ்டெர்லைட் ஆலை உள்ளிட்ட திட்டங்களை கொண்டு வந்து திணிக்ககூடியவர்களாக இருக்கும் பாஜகவையும், அதோடு கூட்டணி வைத்திருக்கும் அதிமுகவையும் விரட்டியடிக்கும் தேர்தல் இது என்பதை மக்கள் உணர்த்திட வேண்டும். ஆகவே, உதயசூரியன் சின்னத்திற்கு வாக்களியுங்கள்” என பரப்புரை மேற்கொண்டார்.
