தூத்துக்குடி மாவட்டத்தில், கடந்த 6 மாதத்தில் 25 பேருக்கும் மேல் கொலை செய்யப்பட்டுள்ளனர். இதுதவிர சாலை விபத்துகளால் ஏற்படும் உயிரிழப்புகள், வழிப்பறி, கொள்ளை, கொலை, பாலியல் வன்புணர்வு போன்ற சம்பவங்களால் தூத்துக்குடி மாவட்ட மக்கள் அச்சத்தில் உறைந்துள்ளனர்.
இந்த நிலையில் தூத்துக்குடி மாநகர் அருகே பண்டாரம்பட்டி கிராமம் உள்ளது. இந்த கிராமத்தைச் சேர்ந்த இளைஞர்கள் சிலர் கும்பலாகச் சேர்ந்து பண்டாரம்பட்டி - மீளவிட்டானுக்கு இடைப்பட்ட சாலையில் உள்ள வெற்றிடத்தில் வைத்து பிறந்தநாள் கொண்டாடினர்.
இந்த பிறந்தநாள் விழாவில் இளைஞர் ஒருவர் கையில் ஆளுயர அரிவாளை வைத்து கேக்கினை வெட்டி, பிறந்த நாள் கொண்டாடியுள்ளனர்.
இந்த வீடியோ காட்சிகள் சமூக வலைதளங்களில் வைரலாகப் பரவியது. இதுபற்றி தகவல் அறிந்த சிப்காட் காவல் நிலைய காவல் துறையினர் வீடியோவில் இருக்கும் இளைஞர்கள் குறித்து விசாரணை நடத்தினர்.
காவல் துறையினரின் விசாரணையில் வீடியோவில் பிறந்தநாள் கொண்டாடும் இளைஞர்கள் பண்டாரம்பட்டி மற்றும் மீளவிட்டான் பகுதியைச் சேர்ந்த தமிழ்ச்செல்வன், சுரேஷ், பிரதீப், அமர்நாத், ரமணி, ஜான்போஸ்கோ, பிரதீப் ஆகியோர் என்பது முதற்கட்ட விசாரணையில் தெரிய வந்தது. மற்ற இளைஞர்கள் யார் யார் என்பதைக் கண்டுபிடிக்கும் பணியில் காவல் துறையினர் தீவிர விசாரணை மேற்கொண்டு வருகின்றனர்.
இந்நிலையில் காவல் துறையினர் தங்களை தேடுவதாக அறிந்த அவர்கள் தலைமறைவாகி உள்ளனர். இதனையடுத்து தலைமறைவான இளைஞர்களைப் பிடிக்கும் பணியில் மாவட்ட காவல் துறையினர் தீவிர தேடுதல் வேட்டையில் இறங்கியுள்ளனர்.
இன்றைய கால இளைஞர் தங்களை ஹீரோவாக நினைத்துக் கொண்டு சமூக வலைதள மோகத்தினால் பல்வேறு தவறுகளை செய்து குற்றவாளியாக தன்னை உருவகப்படுத்திக் கொள்கின்றனர். இந்த மாதிரியான மனநிலையிலிருந்து இளைஞர்கள் விடுப்பட்டால் மட்டுமே குற்றங்கள் குறையும் என்பது அனைவரின் கருத்தாகும்.
இதையும் படிங்க :சுங்கச்சாவடி காவலர் அடித்துக் கொலை - வழிப்பறி கொள்ளையர்கள் அட்டூழியம்
