தூத்துகுடியில் விற்பனைக்காக கஞ்சாவைப் பதுக்கி வைத்திருப்பதாக, மாவட்ட காவல் கண்காணிப்பாளர் ஜெயக்குமாருக்கு ரகசிய தகவல் கிடைத்தது. இந்தத் தகவலையடுத்து காவல் கண்காணிப்பாளர் உத்தரவின் பேரில் தாளமுத்துநகர் காவல் நிலைய ஆய்வாளர் ஜெயந்தி தலைமையிலான காவல்துறையினர் தருவைக்குளம் - கிழக்கு கடற்கரை சாலை சந்திப்பில் வாகன தணிக்கையில் ஈடுபட்டனர்.
அப்போது அவ்வழியாக இருசக்கர வாகனத்தில் வந்த ஒருவரை மறித்து சந்தேகத்தின் பேரில் விசாரணை செய்ததில், அவர் விளாத்திகுளம் சிப்பிக்குளம், சுனாமி நகரைச் சேர்ந்த அமலன் பச்சேக் (வயது 53) என்பதும், விற்பனைக்காக 6 கிலோ கஞ்சா வைத்திருந்ததும் தெரியவந்தது. இதனைத் தொடர்ந்து காவல்துறையினர் அமலன் பச்சேக்கை கைது செய்து அவரிடமிருந்த 6 கிலோ கஞ்சாவையும் பறிமுதல் செய்து தொடர் விசாரணை மேற்கொண்டு வருகின்றனர்.
