தூத்துக்குடி மாநகராட்சியில் குடிநீர் தேவை, குடிநீர் சிக்கன நடவடிக்கை குறித்து பொதுமக்களுக்கு விழிப்புணர்வு ஏற்படுத்தும் வகையில் நீர் சேமிப்பு விழிப்புணர்வு குறும்படம் வெளியிடும் நிகழ்ச்சி இன்று நடைபெற்றது.
நிகழ்ச்சிக்கு மாவட்ட ஆட்சியர் சந்தீப் நந்தூரி தலைமை தாங்கினார். மாநகராட்சி ஆணையர் ஜெயசீலன் முன்னிலை வகித்தார். இதில் தமிழ்நாடு செய்தி; விளம்பரத் துறை அமைச்சர் கடம்பூர் ராஜு சிறப்பு விருந்தினராகக் கலந்துகொண்டு குடிநீர் சிக்கனம் குறித்த விழிப்புணர்வு குருந்தகட்டை வெளியிட்டார்.
இதனையடுத்து செய்தியாளர்களிடம் அவர் பேசுகையில், ”தூத்துக்குடி மாவட்டத்திற்கு, மறைந்த குரூஸ் பெர்னாண்டஸ்தான் முதன்முதலில் முதலாவது பைப்லைன் திட்டம் மூலமாக குடிநீர் கொண்டு வர நடவடிக்கை எடுத்தார். அதைத் தொடர்ந்து அதிமுக அரசுதான் தூத்துக்குடி மாவட்டத்திற்கு இரண்டாவது, மூன்றாவது, நான்காவது குடிநீர் பைப்லைன் திட்டங்களை கொண்டு வந்து தூத்துக்குடி மாவட்ட மக்களின் தண்ணீர் தேவையை தீர்த்து வைக்க நடவடிக்கை எடுத்தது.
அதிமுக அரசு காலத்தில்தான் 282.44 கோடி ரூபாய் மதிப்பில் குடிநீர் தேவைக்காக வல்லநாடு பகுதியில் தாமிரபரணி ஆற்றுப் படுகையிலிருந்து நீர் உறிஞ்சப்பட்டு நீர் சுத்திகரிப்பு நிலையங்கள் அமைக்கப்பட்டு தொலைநோக்குத் திட்டம் செயல்படுத்தப்பட்டது.
தற்போது 50 எம்.எல்.டி. அளவு தண்ணீர் தேவை உள்ள நிலையில் 30 எம்.எல்.டி. அளவு தண்ணீர் தூத்துக்குடி மாவட்ட பகுதிகளுக்கு வழங்கப்பட்டுவருகிறது. மீதம் குடிநீருக்கு தேவையாக உள்ள 20 எம்.எல்.டி. தண்ணீர் தேவையை பூர்த்தி செய்யும் விதமாக தமிழ்நாடு அரசு தகுந்த நடவடிக்கைகளை எடுத்துவருகிறது.
இந்த நிலையில் குடிநீர் பற்றாக்குறை என்று வரும்போது அதில் தகுந்த ஆலோசனைகளை எடுத்து கூறுவதுதான் நல்ல எதிர்க்கட்சியாகும். ஆனால் திமுகவினர் தண்ணீர் பிரச்னையை அரசியல் ஆதாயமாக்க நினைத்து போராட்டம் நடத்துகின்றனர். அதிமுக அரசு மீது குறை கூறுவதையே ஸ்டாலின் குறியாக கொண்டுள்ளார்.
இந்நேரத்தில் அவர்கள் நடத்துகிற ஆர்ப்பாட்டங்களையெல்லாம் கண்டுகொள்ளாமல் ஆக்கப்பூர்வமான பணிகளை செய்ய தமிழ்நாடு அரசு நடவடிக்கை எடுத்துவருகிறது.
நடிகர் சங்கத் தேர்தலில் அரசியல் தலையீடு என்பது இல்லை. நடிகர் சங்கம் என்பது தனி ஒரு அமைப்பு. எனவே அதில் அரசியல் தலையீடுக்கு வாய்ப்புகள் இல்லை. திரைப்படத்துக்கு ஏதாவது பிரச்னை எனில் அதில் அரசு தலையிட்டு தீர்த்துவைக்கும்” என்றார்.
