தூத்துக்குடி மாநகராட்சியில் குப்பையிலிருந்து தயாரிக்கப்படும் நுண் உரங்களை விற்பனை செய்யும் வகையில் 'முத்துரம்' என்ற லோகோவை தூத்துக்குடி மாநகராட்சி மேயர் ஜெகன் வெளியிட்டார்.
மாநகராட்சியில், நாளொன்றுக்கு 150 டன் குப்பைகள் சேகரித்து குப்பைக்கிடங்கிற்கு அனுப்பப்படும் நிலையில் மக்கும் குப்பைகளைப் பிரித்து மாநகராட்சியில் 7 உரம் தயாரிக்கும் மையங்கள் மூலம் விவசாயத்துக்கு வேண்டிய நுண் உரம் தயாரிக்க ஏற்பாடு செய்யப்பட்டுள்ளது.
அதன்படி, நாளொன்றுக்கு 50 டன் வரை நுண் உரம் உற்பத்தி செய்யப்படும் நிலையில், குப்பையில் இருந்து தயாரிக்கக் கூடிய உரத்தில் அதிக சத்துகள் இருப்பதால் இந்த உரங்களைப் பயன்படுத்துவதற்கு தூத்துக்குடியில் உள்ள கிள்ளிகுளம் வேளாண்மை அறிவியல் கல்லூரி நிர்வாகத்தினர் இந்த உரத்தைப் பெறுவதற்கு முன்வந்துள்ளனர்.
இதைத்தொடர்ந்து, ஒரு கிலோ உரம் ஒரு ரூபாய் வீதம் வழங்க மாநகராட்சி நிர்வாகம் முடிவுசெய்து அதற்கான லோகோவை அறிமுகம் செய்தது. இந்நிகழ்ச்சியில் மாநகராட்சி ஆணையர் சாருஸ்ரீ தலைமையில், தூத்துக்குடி மாநகராட்சி மேயர் ஜெகன் பெரியசாமி கலந்துகொண்டு லோகோவை இன்று (ஆக.18) அறிமுகப்படுத்தினார்.
முத்துரம் என்ற பெயரில் அறிமுகப்படுத்தப்பட்டுள்ள இந்த உரத்தை கிள்ளிகுளம் வேளாண்மை கல்லூரி வளாகத்தில் உள்ள விவசாயப் பணிகளுக்கும் மற்ற விவசாயிகளுக்கும் வழங்க உரிய நடவடிக்கை எடுக்கப்பட்டுள்ளன என வேளாண்மை கல்லூரி நிர்வாகத்தினர் தெரிவித்துள்ளனர்.
இதையும் படிங்க: 15ஆம் ஆண்டில் அடியெடுத்து வைக்கும் தூத்துக்குடி மாநகராட்சி!!
